ഉടലിനുശേഷം രതീഷ് രഘുനന്ദന്‍ സംവിധാനം ചെയ്യുന്ന ദിലീപ് ചിത്രം ‘തങ്കമണി’യുടെ ടീസര്‍ പുറത്തിറങ്ങി. ചിത്രത്തില്‍ വ്യത്യസ്ത ഗെറ്റപ്പിലാണ് ദിലീപ് പ്രത്യക്ഷപ്പെടുന്നത്. കേരള രാഷ്ട്രീയത്തെ പിടിച്ചു കുലുക്കിയ ഇടുക്കിയിലെ തങ്കമണി സംഭവത്തെ ആസ്പദമാക്കിയാണ് ചിത്രം നിര്‍മിച്ചിരിക്കുന്നത്.
1986 ഒക്ടോബര്‍ 21നു ഇടുക്കി ജില്ലയിലെ കാമാക്ഷി ഗ്രാമപഞ്ചായത്തില്‍ ഉള്‍പ്പെടുന്ന തങ്കമണി എന്ന ഗ്രാമത്തില്‍ ഒരു ബസ് സര്‍വ്വീസുമായി ബന്ധപ്പെട്ടുണ്ടായ തര്‍ക്കങ്ങളെ തുടര്‍ന്ന് പൊലീസ് ലാത്തിച്ചാര്‍ജും വെടിവയ്പ്പുമുണ്ടായി. പോലീസിന്റെ നരനായാട്ടായിട്ടാണ് ഈ സംഭവം ചരിത്രത്തില്‍ രേഖപ്പെടുത്തിയത്. യഥാര്‍ത്ഥ സംഭവത്തെ ആസ്പദമാക്കിയുള്ള ചിത്രമായതിനാല്‍ ചില സുപ്രധാന രംഗങ്ങള്‍ ചിത്രീകരിക്കുന്നതിന് കട്ടപ്പനയ്ക്കടുത്ത് രണ്ടരയേക്കര്‍ സ്ഥലത്ത് വന്‍ സെറ്റ് തന്നെയാണ് അണിയറ പ്രവര്‍ത്തകര്‍ ഒരുക്കിയിരുന്നത്.
‘ആ രാത്രി നടന്ന ക്രൂരതകള്‍ പുറംലോകം അറിഞ്ഞിരുന്നില്ല’ എന്ന ടീസറിലെ സിദ്ദിഖിന്റെ ഡൈലോഗ് ശ്രദ്ധയമാണ്. യഥാര്‍ത്ഥ സംഭവത്തെ എങ്ങനെയായിരിക്കും ചിത്രത്തില്‍ കോര്‍ത്തിണക്കുന്നതെന്ന ആകാംഷയാണ് ടീസര്‍ ഉണര്‍ത്തുന്നത്. മികച്ച ദൃശ്യങ്ങളുടെ പിന്തുണയും തങ്കമണി എന്ന ചിത്രത്തിനുണ്ട്. രണ്ട് ഗെറ്റപ്പിലാണ് ദിലീപിനെ ടീസറില്‍ കാണാന്‍ സാധിക്കുന്നത്.
നീത പിളളയും പ്രണിത സുഭാഷുമാണ് നായികമാരായി എത്തുന്നത്. ബിഗ് ബജറ്റില്‍ ഒരുങ്ങുന്ന സിനിമയില്‍ മലയാളത്തിലേയും തമിഴിലേയും വന്‍ താരനിര തന്നെ അണിനിരക്കുന്നു.സൂപ്പര്‍ ഗുഡ് ഫിലിംസിന്റെ ബാനറില്‍ ആര്‍ബി ചൗധരി ഇഫാര്‍ മീഡിയയുടെ ബാനറില്‍ റാഫി മതിര എന്നിവര്‍ ചേര്‍ന്നാണ് നിര്‍മ്മാണം.
Recent Comments