ഉണ്ണിമുകുന്ദനെ നായകനായി എത്തുന്ന ജയ് ഗണേഷിന്റെ റിലീസ് തീയതി പ്രഖ്യാപിച്ചു. 2024 ഏപ്രില്‍ പതിനൊന്നിനായിരിക്കും ചിത്രം പ്രദര്‍ശനത്തിനെത്തുന്നത്. രഞ്ജിത് ശങ്കറാണ് ചിത്രത്തിന്റെ രചനയും സംവിധാനവും നിര്‍വ്വഹിച്ചിരിക്കുന്നത്. മഹിമ നമ്പ്യാരാണ് നായിക. നടി ജോമോള്‍ വക്കീല്‍ വേഷത്തില്‍ എത്തുന്നു.
ഹരീഷ് പേരടി, അശോകന്‍, രവീന്ദ്ര വിജയ്, നന്ദു തുടങ്ങിയവരാണ് മറ്റു പ്രമുഖ താരങ്ങള്‍. ഉണ്ണി മുകുന്ദന്‍ ഫിലിസും രഞ്ജിത്ത് ശങ്കറിന്റെ ഡ്രീംസ് എന്‍ ബിയോണ്ടും ചേര്‍ന്നാണ് ചിത്രം നിര്‍മിക്കുന്നത്. ഛായാഗ്രാഹണം ചന്ദു സെല്‍വരാജാണ്. ചിത്രം ഒരു ത്രില്ലറായിരിക്കുമെന്നാണ് സൂചനകള്‍.
ഉണ്ണി മുകുന്ദന്‍ വീല്‍ ചെയറിലിരിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ ശ്രദ്ധ നേടിയിരുന്നു. എറണാകുളത്തും പരിസര പ്രദേശങ്ങളിലുമായാണ് ഷൂട്ടിങ് നടന്നത്. ശങ്കര്‍ ശര്‍മ്മയാണ് ചിത്രത്തിന് സംഗീതം ഒരുക്കുന്നത്.
തന്റെ കരിയറിലെ വ്യത്യസ്തമായ വേഷമായിരിക്കും ജയ് ഗണേഷിലേത് എന്ന് ഉണ്ണി മുകുന്ദന്‍ നേരത്തെ പറഞ്ഞിരുന്നു. ആക്ഷന്‍ ഹീറോ റോളുകളിലൂടെയാണ് ഉണ്ണി മുകുന്ദനെ മലയാളി പരിചയപ്പെട്ടത്. എന്നാലിപ്പോള്‍ ഉണ്ണി വൈരുദ്ധ്യമുള്ള കഥാപാത്രങ്ങളാണ് തിരഞ്ഞെടുക്കുന്നത്. മേപ്പടിയാനിലൂടെയാണ് ആദ്യമായി മസിലളിയന്‍ ഇമേജില്‍നിന്ന് ഉണ്ണി പുറത്ത് വന്നത്. ജയ് ഗണേഷിന്റെ ഫസ്റ്റ് ലുക്ക് പോസ്റ്ററില്‍ വീല്‍ ചെയറിലിരിക്കുന്ന ഉണ്ണിയെ കണ്ടതോടെ ആകാംഷയുടെ മുള്‍മുനയിലാണ് ആരാധകര്‍.
Recent Comments