വിനീത് ശ്രീനിവാസന്‍ സംവിധാനം ചെയ്യുന്ന വര്‍ഷങ്ങള്‍ക്ക് ശേഷം എന്ന ചിത്രത്തിന്റെ ഷൂട്ടിങ് പൂര്‍ത്തിയായി. ഇന്ന് പുലര്‍ച്ചെ രണ്ട് മണിക്ക് ധ്യാന്‍ ശ്രീനിവാസന്റെ പിറന്നാള്‍ ദിനത്തിലായിരുന്നു ചിത്രത്തിന്റെ പാക്കപ്പ്. പാക്കപ്പിനോട് അനുബന്ധിച്ചുള്ള വീഡിയോയും സോഷ്യല്‍ മീഡിയയില്‍ വൈറലായി.
40 ദിവസം കൊണ്ടാണ് വിനീതും സംഘവും സിനിമയുടെ ചിത്രീകരണം പൂര്‍ത്തിയാക്കിയത്. അന്‍പതിലധികം ലൊക്കേഷനുകള്‍ ഉണ്ടായിരുന്ന ചിത്രീകരണത്തില്‍ 132 അഭിനേതാക്കളും ഇരുനൂറ് പേരോളമടങ്ങുന്ന ക്രൂവും പങ്കെടുത്തു.
‘ചെയ്യുന്ന കാര്യങ്ങളോട് പാഷനേറ്റായ ഒരു സൈന്യം എനിക്കൊപ്പമുണ്ട് എന്നതില്‍ ഞാന്‍ ദൈവത്തോട് നന്ദി പറയുന്നു. ഫിലിം മേക്കിങ് പ്രോസസ് എത്ര മനോഹരമാണെന്ന് ഞാന്‍ കണ്ടത് ഈ ചിത്രത്തിലാണ്. എല്ലാ ദിവസവും എല്ലാ കാര്യങ്ങളും കൃത്യമായി ആസൂത്രണം ചെയ്താല്‍, സിനിമയുടെ നിര്‍മ്മാണ പ്രക്രിയ എത്ര മനോഹരമാകുമെന്ന് ഞാന്‍ കണ്ട ഒരു സിനിമയാണിത്’ എന്ന് വിനീത് സോഷ്യല്‍ മീഡിയ പോസ്റ്റില്‍ പറയുന്നു.
‘ഹൃദയ’ത്തിന് ശേഷം മെറിലാന്‍ഡ് സിനിമാസിന്റെ ബാനറില്‍ വിശാഖ് സുബ്രഹ്‌മണ്യമാണ് വര്‍ഷങ്ങള്‍ക്ക് ശേഷം നിര്‍മിക്കുന്നത്. നിവിന്‍ പോളി ചിത്രത്തില്‍ അതിഥി കഥാപാത്രമായി എത്തും. പ്രണവിനും കല്യാണിക്കും ധ്യാന്‍ ശ്രീനിവാസനുമൊപ്പം അജു വര്‍ഗീസ്, ബേസില്‍ ജോസഫ്, നീതാ പിള്ള, അര്‍ജുന്‍ ലാല്‍, നിഖില്‍ നായര്‍, ഷാന്‍ റഹ്‌മാന്‍, നീരജ് മാധവ് എന്നിങ്ങനെ വലിയ താരനിര തന്നെ ചിത്രത്തില്‍ അണിനിരക്കുന്നുണ്ട്. ചിത്രം 2024 ഏപ്രിലില്‍ തീയറ്ററുകളില്‍ എത്തും.
Recent Comments