നവവത്സരദിനത്തില്‍ ഉണ്ണി മുകുന്ദന്‍ ചിത്രം ജയ് ഗണേഷിന്റെ സെക്കന്റ് ലുക്ക് പോസ്റ്റര്‍ പുറത്തിറങ്ങി. വീല്‍ ചെയറിലിരിക്കുന്ന ഉണ്ണി മുകുന്ദനാണ് ഈ പോസ്റ്ററിലുമുള്ളത്. എന്നാല്‍ ഉണ്ണി മുകുന്ദന്റെ പിന്നിലായി സൂപ്പര്‍ഹീറോയുടെ ചിത്രീകരണങ്ങളും പോസ്റ്ററില്‍ കാണാന്‍ കഴിയും. വ്യത്യസ്തമായ ഈ പോസ്റ്ററിന് വന്‍ സ്വീകാര്യതയാണ് ആരാധകരുടെ ഇടയില്‍ നിന്ന് ലഭിക്കുന്നത്.
നേരത്തെ ചിത്രത്തിന്റെ സംവിധായകന്‍ രഞ്ജിത്ത് ശങ്കര്‍ ഇന്‍സ്റ്റാഗ്രാം പോസ്റ്റില്‍ സൂപ്പര്‍ ഹീറോയുടെ സ്‌കെച്ചുകള്‍ പങ്കുവെച്ചിരുന്നു. ആ ഫോട്ടോയിലുള്ള സൂപ്പര്‍ഹീറോയെയാണ് പോസ്റ്ററുകളിലും കാണാന്‍ സാധിക്കുന്നത്. ഒരു സൂപ്പര്‍ഹീറോ ചിത്രമാണ് ജയ് ഗണേഷ് എന്ന തരത്തിലുള്ള ചര്‍ച്ചകളാണ് ഇപ്പോള്‍ സോഷ്യല്‍ മീഡിയയില്‍ നടക്കുന്നത്.
ഉണ്ണി മുകുന്ദന്‍ വീല്‍ ചെയറിലിരിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും ശ്രദ്ധ നേടിയിരുന്നു. എറണാകുളത്തും പരിസര പ്രദേശങ്ങളിലുമായാണ് ഷൂട്ടിങ് നടന്നത്. തന്റെ കരിയറിലെ വ്യത്യസ്തമായ വേഷമായിരിക്കും ജയ് ഗണേഷിലേത് എന്ന് ഉണ്ണി മുകുന്ദന്‍ നേരത്തെ പറഞ്ഞിരുന്നു. ചിത്രം 2024 ഏപ്രില്‍ 11ന് തിയേറ്ററിലെത്തും.
Recent Comments