ജയറാമിനെ നായകനാക്കി മിഥുന്‍ മാനുവല്‍ തോമസ് സംവിധാനം ചെയ്ത ചിത്രം അബ്രഹാം ഓസ്ലര്‍ ഇന്ന് തീയേറ്ററില്‍ റിലീസ് ചെയ്തു.
ചിത്രം പ്രഖ്യാപിക്കപ്പെട്ടത് മുതല്‍ ജയറാമിനൊപ്പം നടന്‍ മമ്മൂട്ടിയും എത്തുമെന്ന തരത്തിലുള്ള വാര്‍ത്തകള്‍ പുറത്തു വന്നിരുന്നു. പിന്നീട് ട്രെയിലര്‍ വന്നപ്പോള്‍ അതില്‍ മമ്മൂട്ടിയുടെ ശബ്ദവും ഉണ്ടായിരുന്നു. എന്നാല്‍ ചിത്രത്തില്‍ മമ്മൂട്ടി ഉണ്ടാകില്ലെന്ന് തന്നെയായിരുന്നു സംവിധായകനും നായകന്‍ ജയറാമും പ്രതികരിച്ചത്.
എന്നാലിപ്പോള്‍ ചിത്രം റിലീസ് ചെയ്തതിന് പിന്നാലെ മമ്മൂട്ടിയുടെ പോസ്റ്റര്‍ പുറത്തു വിട്ടിരിക്കുകയാണ് സംവിധായകന്‍ മിഥുന്‍ മാനുവല്‍ തോമസ്.
‘അബ്രഹാം ഓസ്ലറിനെ ആവേശത്തോടെ സ്വീകരിക്കുന്ന പ്രേക്ഷകര്‍ക്ക് നന്ദി. ഓസ്ലറിനെ അവിസ്മരണീയമാക്കിയ ഇന്ത്യയുടെ മഹാനടന്‍ മമ്മൂക്കയ്ക്കയ്ക്ക് നന്ദി.’ എന്ന കുറിപ്പോടെയാണ് ചിത്രം തന്റെ ഫെയ്‌സ് ബുക്കില്‍ പോസ്റ്റ് ചെയ്തത്. പോസ്റ്ററിന് മുകളിലായി ‘ഇന്തിയാവിന്‍ മാപെരും നടികര്‍’ എന്നും ചേര്‍ത്തിട്ടുണ്ട്.
അഞ്ചാം പാതിരയ്ക്ക് ശേഷം മിഥുന്‍ മാനുവല്‍ തോമസ് സംവിധാനം ചെയ്ത ചിത്രമാണിത്. എബ്രഹാം ഓസ്ലറില്‍ ജയറാമിന് പുറമെ അനശ്വര രാജന്‍, അര്‍ജുന്‍ അശോകന്‍, സൈജുകുറുപ്പ് എന്നിവരും ചിത്രത്തില്‍ അണിനിരക്കുന്നു. അര്‍ഷാദ് എം. ഹസനും മിഥുന്‍ മാനുവല്‍ തോമസും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
Recent Comments