പ്രമുഖ ഒടിടി പ്ലാറ്റ്‌ഫോമായ ആമസോണ്‍ പ്രൈം വീഡിയോയുടെ പുതിയ ഒറിജിനല്‍ സീരീസായ പോച്ചറിന്റെ പ്രഖ്യാപനം എത്തി. മലയാളികളായ നിമിഷ സജയന്‍, റോഷന്‍ മാത്യു തുടങ്ങിയവരാണ് സീരീസില്‍ പ്രധാന കഥാപാത്രങ്ങളെ അവതരിപ്പിക്കുന്നത്. ഫെബ്രുവരി 23 മുതല്‍ സ്ട്രീമിംഗ് ആരംഭിക്കും.
എമ്മി അവാര്‍ഡ് ജേതാവായ ചലച്ചിത്ര നിര്‍മ്മാതാവ് റിച്ചി മേത്തയാണ് പോച്ചറിന്റെ തിരക്കഥയും സംവിധാനവും നിര്‍വ്വഹിച്ചിരിക്കുന്നത്. കോടതി രേഖകളുടെയും സാക്ഷ്യപത്രങ്ങളുടെയും അടിസ്ഥാനത്തില്‍, കേരളത്തിലെ നിബിഢ വനങ്ങളിലും ദില്ലിയിലെ കോണ്‍ക്രീറ്റ് കാടുകളിലും നടന്ന സംഭവങ്ങളുടെ സാങ്കല്‍പ്പിക ആവിഷ്‌കാരമാണ് പോച്ചര്‍.
ഇന്ത്യന്‍ ചരിത്രത്തിലെ ഏറ്റവും വലിയ ആനക്കൊമ്പ് വേട്ട സംഘത്തെക്കുറിച്ച് അന്വേഷിക്കാന്‍ ജീവന്‍ പണയപ്പെടുത്തിയ സമരക്കാര്‍ ഉള്‍പ്പെടെയുള്ളവര്‍ നല്‍കിയ മഹത്തായ സംഭാവനകള്‍ ഈ പരമ്പര കാണിച്ചുതരുമെന്ന് അണിയറക്കാര്‍ പറയുന്നു. മലയാളം, ഹിന്ദി, ഇംഗ്ലീഷ് ഭാഷകളിലായാണ് ചിത്രീകരിച്ചിരിക്കുന്നത്. എട്ട് എപ്പിസോഡുകള്‍ ഉള്ള പരമ്പരയുടെ ആദ്യ മൂന്ന് എപ്പിസോഡുകള്‍ 2023-ലെ സണ്‍ഡാന്‍സ് ഫിലിം ഫെസ്റ്റിവലില്‍ പ്രദര്‍ശിപ്പിച്ചു.
Recent Comments