സുബീഷ് സുധി നായകനാകുന്ന ‘ഒരു ഭാരത സര്‍ക്കാര്‍ ഉത്പന്നം’ ടീസര്‍ പുറത്തിറങ്ങി. ഷെല്ലി കിഷോര്‍ നായികയാകുന്ന ചിത്രം ടി.വി. രഞ്ജിത്ത്സംവിധാനം ചെയ്യുന്നു. കേന്ദ്രസര്‍ക്കാറിന്റെ ഒരു പദ്ധതി ഒരു കുടുംബത്തിലുണ്ടാക്കുന്ന പ്രതിസന്ധികളുടെ നര്‍മ്മത്തില്‍ ചാലിച്ച ആഖ്യാനമാണ് സിനിമയുടെ ഇതിവൃത്തം.
സുബീഷ് സുധിയുടെ ‘എന്റെ എല്ലാം എല്ലാം അല്ലെ’ എന്ന പാട്ടോടെയാണ് ടീസര്‍ തുടങ്ങുന്നത്. പ്രദീപ് എന്നയാളുടെ കുടുംബ ജീവിതത്തിലേക്കാണ് ടീസര്‍ പ്രേക്ഷകരെ കൂട്ടി കൊണ്ട് പോകുന്നത്. കുടുംബാസൂത്രണവും ജനസംഖ്യാ നിയന്ത്രണവുമെല്ലാം ടീസറില്‍ ചര്‍ച്ചയാകുന്നുണ്ട് .ഒരു മുഴുനീള കോമഡി എന്റര്‍ടെയ്‌നറാകും സിനിമയെന്നാണ് ടീസര്‍ നല്‍കുന്ന സൂചന.
അജു വര്‍ഗീസ്, ഗൗരി ജി. കിഷന്‍,ദര്‍ശന എസ്. നായര്‍, ലാല്‍ ജോസ്, വിനീത് വാസുദേവന്‍, ജാഫര്‍ ഇടുക്കി, ഗോകുല്‍, രാജേഷ് അഴീക്കോടന്‍ തുടങ്ങിയ പ്രമുഖരും അഭിനയിക്കുന്നു. ഭവാനി പ്രൊഡക്ഷന്‍സിന്റെ ബാനറില്‍ രഞ്ജിത്ത് ജഗനാഥന്‍, ടി.വി. കൃഷ്ണന്‍ തുരുത്തി, കെ.സി. രഘുനാഥ് എന്നിവര്‍ ചേര്‍ന്ന് നിര്‍മ്മിക്കുന്ന ഈ ചിത്രത്തിന്റെ ഛായാഗ്രഹണം അന്‍സര്‍ ഷാ നിര്‍വഹിക്കുന്നു.
Recent Comments