തോമസ് തിരുവല്ല ഫിലിംസിന്റെ ബാനറില്‍ തോമസ് തിരുവല്ല നിര്‍മ്മിക്കുന്ന പുതിയ ചിത്രം തിരക്കഥ എഴുതി സംവിധാനം ചെയ്യുന്നത് നവാഗതനായ കൃഷ്ണദാസ് മുരളിയാണ്. ഷോര്‍ട്ട് ഫിലിമുകളിലൂടെയും വെബ് സീരിസുകളിലൂടെയും ശ്രദ്ധേയനാണ് കൃഷ്ണദാസ് മുരളി.
ഒരിടത്തരം ഗ്രാമ പശ്ചാത്തലത്തില്‍ ഒരു തറവാട്ടില്‍ അരങ്ങേറുന്ന ഫാമിലി ഡ്രാമയാണ് ചിത്രം. കുടുംബങ്ങളിലും സമൂഹത്തിലുമെല്ലാം നിത്യേന സംഭവിക്കുന്ന കാര്യങ്ങളാണ് ചിത്രത്തിലൂടെ പറയാന്‍ ശ്രമിക്കുന്നത്.
സൈജു കുറുപ്പാണ് കേന്ദ്രകഥാപാത്രത്തെ അവതരിപ്പിക്കുന്നത്. നാട്ടിലെ പൊതു ക്കാര്യങ്ങളിലെല്ലാം സജീവമായി ഇടപെടുന്ന ഒരു യുവാവിനെയാണ് സൈജുക്കുറുപ്പ് ഈ ചിത്രത്തില്‍ അവതരിപ്പിക്കുന്നത്.
സായ്കുമാര്‍, അഭിരാം രാധാകൃഷ്ണന്‍ കലാരഞ്ജിനി, മണികണ്ഠന്‍ പട്ടാമ്പി, സോഹന്‍ സീനുലാല്‍, നന്ദു പൊതുവാള്‍, ഗംഗ (ആന്‍ഡ്രോയ്ഡ് കുഞ്ഞപ്പന്‍ ഫെയിം) ശ്രുതി സുരേഷ് (പാല്‍ത്തൂജാന്‍വര്‍ഫെയിം) എന്നിവരും പ്രധാന താരങ്ങളാണ്.
ചിത്രത്തിന്റെ ഷൂട്ടിംഗ് മാര്‍ച്ച് 10 ന് ആരംഭിക്കും. അഞ്ചുമന ക്ഷേത്രത്തില്‍വച്ചാണ് അതേ ദിവസം പൂജ. മാള, അന്നമനട എന്നിവിടങ്ങളിലായി ചിത്രീകരണം പൂര്‍ത്തിയാകും.
ബ്ലെസ്സി സംവിധാനം ചെയ്ത കളിമണ്ണ് എന്ന ചിത്രം നിര്‍മ്മിച്ചു കൊണ്ടാണ് തോമസ് തിരുവല്ല ചലച്ചിത്രനിര്‍മ്മാണ രംഗത്തേക്കു കടന്നു വരുന്നത്. തുടര്‍ന്ന് സാം സംവിധാനം ചെയ്ത ഓട്ടം, ലാല്‍ ജോസിന്റെ മ്യാവു, ജിബു ജേക്കബിന്റെ എല്ലാം ശരിയാകും, മെ ഹൂം മൂസ, ഷിന്റോസണ്ണി സംവിധാനം ചെയ്ത പാപ്പച്ചന്‍ ഒളിവിലാണ് എന്നിവയാണ് ഈ ബാനറില്‍ നിര്‍മ്മിച്ച മറ്റു ചിത്രങ്ങള്‍.
മനുമഞ്ജിത്തിന്റെ വരികള്‍ക്ക് സാമുവല്‍ എബി ഈണം പകര്‍ന്നിരിക്കുന്നു. ഛായഗ്രഹണം ബബിലൂ അജു, എഡിറ്റിംഗ് ഷഫീഖ് വി.ബി, കലാസംവിധാനം ബാബു പിള്ള, നിര്‍മ്മാണ നിര്‍വ്വഹണം ജിതേഷ് അഞ്ചുമന, പി.ആര്‍.ഒ വാഴൂര്‍ ജോസ്.
Recent Comments