ജോജു ജോര്‍ജ്ജിനെ നായകനാക്കി തന്‍സീര്‍ സംവിധാനം ചെയ്യുന്ന റസ്റ്റ് ആന്റ് പീസ് എന്ന ചിത്രത്തിന്റെ ലൊക്കേഷനിലായിരുന്നു അനില്‍ നെടുമങ്ങാട്. ശക്തമായ ഒരു പോലീസ് ഓഫീസറുടെ വേഷമാണ് അനിലിന് ഈ ചിത്രത്തിലും. തൊടുപുഴയാണ് ചിത്രത്തിന്റെ ലൊക്കേഷന്‍. അവിടെ മൂണ്‍ലൈറ്റ് ഹോട്ടലിലായിരുന്നു താമസം.
ഇന്നലെയും ഇന്നും അനിലിന് വര്‍ക്ക് ഉണ്ടായിരുന്നില്ല. അതുകൊണ്ട് ഹോട്ടലില്‍തന്നെ ഉണ്ടായിരുന്നു. ഇന്ന് രാവിലെ അനിലിന്റെ മൂന്നു സുഹൃത്തുക്കള്‍ അദ്ദേഹത്തെ കാണാനെത്തി. അവരോടൊപ്പം ഉച്ചവരെ കളിയും ചിരിയുമായി ഹോട്ടലില്‍തന്നെ ചെലവഴിച്ചു. ഉച്ചയൂണ് കഴിഞ്ഞ് ഏതാണ്ട് മൂന്നുമണിയോടെ ദി പ്രീസ്റ്റിന്റെ (മമ്മൂട്ടി നായകനാകുന്ന ചിത്രം) ഷൂട്ടിംഗ് ലൊക്കേഷന്‍ കാണാമെന്ന് പറഞ്ഞ് നാലുപേരുംകൂടി ഇറങ്ങിയതാണ്. അവിടെ അടുത്ത് മലങ്കര ഡാമിന് സമീപമായിരുന്നു ലൊക്കേഷന്‍. ധാരാളം ചിത്രങ്ങളുടെ ഷൂട്ടിംഗ് നടന്നിട്ടുള്ള സ്ഥലമാണ്.
മലങ്കര ഡാമിന്റെ താഴ്‌വാരപ്രദേശമായതിനാല്‍ നിറയെ ജലമുണ്ടായിരുന്നു. അവിടെ ചെന്നപ്പോള്‍ കുളിക്കാമെന്ന് തീരുമാനിക്കുകയായിരുന്നു. ഒരാള്‍ കരയില്‍തന്നെ ഇരുന്നു. അനിലും മറ്റു രണ്ടുപേരുംകൂടി കുളിക്കാനിറങ്ങി.
ഇതിനിടെ പോലീസിന്റെ പട്രോളിംഗ് ജീപ്പെത്തി. അഞ്ച് മണിക്കുമുമ്പ് കുളി അവസാനിപ്പിക്കണമെന്ന് പറഞ്ഞു. ചെയ്യാമെന്ന് അവര്‍ സമ്മതിക്കുകയും ചെയ്തു.
അഞ്ച് മണിയായപ്പോള്‍ കുളി മതിയാക്കി മൂന്നുപേരും കരയ്ക്ക് കയറി. അപ്പോള്‍ അനിലിന് വീണ്ടുമൊരു ആഗ്രഹം. ഒന്നുകൂടി കുളക്കാനിറങ്ങണം. അനില്‍ ജലാശയത്തിലേയ്ക്ക് ഇറങ്ങി നടന്നു. നിലതെറ്റി ആഴങ്ങളിലേയ്ക്ക് പതിച്ചു.
പോലീസുകാരും സമീപവാസികളും ചേര്‍ന്നാണ് അനിലിന്റെ ബോഡി കണ്ടെത്തിയത്. കരയ്‌ക്കെത്തിക്കുമ്പോള്‍തന്നെ അനില്‍ മരണമടഞ്ഞിരുന്നു. ഉടനെ അടുത്തുള്ള തൊടുപുഴ ജില്ലാ ആശുപത്രിയിലേയ്ക്ക് കൊണ്ടുപോയി. ഡോക്ടര്‍മാര്‍ മരണം സ്ഥിരീകരിച്ചു.
ബോഡി ഇപ്പോള്‍ തൊടുപുഴയിലെ സെന്റ്‌മേരീസ് ഹോസ്പിറ്റലിലാണുള്ളത്. നാളെ രാവിലെ ജില്ലാ ആശുപത്രിയിലേയ്ക്ക് കൊണ്ടുപോകും. കോവിഡ് ടെസ്റ്റിനുശേഷം പോസ്റ്റുമോര്‍ട്ടം നടത്തിയതിനുശേഷമേ അനിലിന്റെ മൃതദേഹം വിട്ടുനല്‍കൂ.
ടിവി പ്രോഗ്രാമുകളിലൂടെയാണ് അനില്‍ എന്ന നെടുമങ്ങാടുകാരന്‍ തന്റെ കരിയര്‍ ആരംഭിക്കുന്നത്. തസ്‌കരവീരനായിരുന്നു അദ്ദേഹത്തിന്റെ ആദ്യത്തെ ചിത്രം. രാജീവ് രവിയുടെ ഞാന്‍ സ്റ്റീവ് ലോപസ്സിലൂടെയാണ് ശ്രദ്ധേയനാവുന്നത്. അയ്യപ്പനും കോശിയിലെ സിഐ സതീഷ്‌നായര്‍ അനിലിന്റെ കരിയറിലെ മികച്ച കഥാപാത്രമായി മാറി. പൊറിഞ്ചു മറിയം ജോസിലെ കുര്യന്‍, കമ്മട്ടിപാടത്തിലെ സുരേന്ദ്രന്‍, പരോളിലെ വിജയന്‍ തുടങ്ങിയവ അനിലിന്റെ ശ്രദ്ധേയമായ കഥാപാത്രങ്ങളാണ്.
Recent Comments