ഡോ. ബിജു സംവിധാനം ചെയ്യുന്ന 15-ാമത്തെ ചിത്രത്തിന് പേരിട്ടു- പപ്പാ ബുക്ക. ചിത്രത്തിന്റെ ഷൂട്ടിംഗ് ജൂലൈയില്‍ ആരംഭിക്കുമെന്ന് ഡോ. ബിജു സോഷ്യല്‍ മീഡിയ പേജിലൂടെ അറിയിച്ചു.
സംവിധായകന്‍ പാ രഞ്ജിത്ത് , നടനും നിര്‍മ്മാതാവുമായ പ്രകാശ് ബാരെ , പപ്പുവ ന്യൂ ഗിനിയയിൽ നിന്നും NAFA നിർമാണ കമ്പനിയെ പ്രതിനിധീകരിച്ചു മിസ് കാത്തി സൈക് എന്നിവര്‍ ചേര്‍ന്നാണ് “പപ്പാ ബുക്ക” നിർമിക്കുന്നത് .
പൂര്‍ണ്ണമായും പപ്പുവ ന്യൂ ഗിനിയയില്‍ ചിത്രീകരിക്കുന്ന പപ്പാ ബുക്കയില്‍ ഇന്ത്യയില്‍നിന്നും രണ്ട് അഭിനേതാക്കളേ ഉള്ളൂ. ബാക്കി അഭിനേതാക്കള്‍ എല്ലാം പപ്പുവായില്‍നിന്നുമുള്ളവരാണ്. പ്രകാശ് ബാരെയും ബംഗാളി താരം റിതാഭാരി ചക്രബര്‍ത്തിയുമാണ് ഇന്ത്യന്‍ താരങ്ങള്‍. പപ്പുവ ന്യൂ ഗിനിയയിലെ ഭാഷയായ ടോക് പിസിനിലാണ് ചിത്രം ഒരുങ്ങുന്നത്. റിക്കി കേജാണ് ചിത്രത്തിനുവേണ്ടി സംഗീതം ഒരുക്കുന്നത്.
ഡോ. ബിജുവിന്റെ ഫെയ്‌സ്ബുക്ക് പോസ്റ്റ്‌
പപ്പുവ ന്യൂ ഗിനിയയിലെ നാഷണല്‍ ഫിലിം ഇന്‍സ്റ്റിറ്റ്യൂട്ടില്‍നിന്നും തെരഞ്ഞെടുത്ത വിദ്യാര്‍ത്ഥികള്‍ ഈ സിനിമയുടെ ഷൂട്ടിംഗ് പ്രോസസ്സില്‍ പങ്കു ചേരുന്നുണ്ട്. സംവിധാനം, ക്യാമറ, സിങ്ക് സൗണ്ട്, എഡിറ്റിംങ്, പ്രൊഡക്ഷന്‍ ഡിസൈന്‍ തുടങ്ങിയ സാങ്കേതിക മേഖലകളില്‍ ഇവര്‍ക്ക് പ്രാക്ടിക്കല്‍ പരിശീലനം ഷൂട്ടിംഗിനൊപ്പം ലഭിക്കുന്നു. ഇന്ത്യാ പപ്പുവാ ന്യൂ ഗിനിയാ സിനിമാറ്റിക് കള്‍ച്ചറല്‍ എക്‌സ്‌ചേഞ്ചിന്റെ ഭാഗമായാണിതെന്നും ഡോ. ബിജു പറയുന്നു.
Recent Comments