ജോജു ജോര്‍ജിനെയും ഷീലു എബ്രഹാമിനെയും കേന്ദ്രകഥാപാത്രങ്ങളാക്കി ഡൊമിന്‍ ഡിസില്‍വ സംവിധാനം ചെയ്യുന്ന സ്റ്റാറില്‍ പൃഥ്വിരാജും അഭിനയിക്കുന്നു.
ഇന്നലെ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്ത് വിടുന്നതുവരെ ഇക്കാര്യം രഹസ്യമായി സൂക്ഷിച്ചിരിക്കുകയായിരുന്നു സ്റ്റാറിന്റെ അണിയറപ്രവര്‍ത്തകര്‍.
അതിഥിവേഷത്തിലാണെങ്കിലും മര്‍മ്മപ്രധാനമായ ഒരു കഥാപാത്രത്തെയാണ് പൃഥ്വി ഈ ചിത്രത്തില്‍ അവതരിപ്പിക്കുന്നത്.
Burst of Myths അഥവാ കാല്‍പ്പനിക കഥയെ പിളര്‍ക്കുന്നത് എന്ന അര്‍ത്ഥമുള്ള ടാഗ് ലൈനാണ് ഫസ്റ്റ് ലുക്ക് പോസ്റ്ററില്‍ പ്രത്യക്ഷപ്പെട്ടിരിക്കുന്നത്. ത്രില്ലറാണ് സിനിമ.
പൈപ്പിന്‍ചുവട്ടിലെ പ്രണയകഥയ്ക്കുശേഷം ഡൊമിന്‍ ഡിസില്‍വ സംവിധാനം ചെയ്യുന്ന ചിത്രമാണ് സ്റ്റാര്‍. സുവിന്‍ സോമശേഖരനാണ് തിരക്കഥാകൃത്ത്. സുവിന്റെ ആദ്യ തിരക്കഥാസംരംഭമാണ്. അബാം ഫിലിംസിന്റെ ബാനറില്‍ എബ്രഹാം മാത്യുവാണ് ചിത്രം നിര്‍മ്മിക്കുന്നത്.
ഗാനഗന്ധര്‍വ്വനില്‍ മമ്മൂട്ടിയുടെ മകളായി അഭിനയിച്ച സാനിയ ബാബു, വെള്ളം എന്ന ചിത്രത്തില്‍ ജയസൂര്യയുടെ മകളായി അഭിനയിച്ച ശ്രീലക്ഷ്മി, ഫോറന്‍സിക്കിലൂടെ ശ്രദ്ധേയനായ തന്മി എന്നിവരും സ്റ്റാറിലെ പ്രധാന കഥാപാത്രങ്ങളാണ്. ജാഫര്‍ ഇടുക്കിയും സബിതയും ഷൈനി രാജനുമാണ് മറ്റ് താരനിരക്കാര്‍. ചിത്രീകരണം പൂര്‍ത്തിയായ സ്റ്റാറിന്റെ പോസ്റ്റ് പ്രൊഡക്ഷന്‍ ജോലികള്‍ പുരോഗമിക്കുകയാണ്.
ബാദുഷ പ്രോജക്ട് ഡിസൈനറാകുന്ന ചിത്രത്തിന്റെ പ്രൊഡക്ഷന്‍ കണ്‍ട്രോളര്‍ റിച്ചാര്‍ഡാണ്. സ്റ്റില്‍സ് അനീഷ് അര്‍ജുനന്‍.
Recent Comments