ഫിലിം ഫെയര്‍ അവാര്‍ഡ്സ് സൗത്ത് 2023-ലെ മികച്ച നടനുള്ള ക്രിട്ടിക്‌സ് അവാര്‍ഡ് നേടി മലയാളത്തിന്റെ യുവ സൂപ്പര്‍താരം ദുല്‍ഖര്‍ സല്‍മാന്‍. സീതാരാമം എന്ന തെലുങ്ക് ചിത്രത്തിലെ പ്രകടനത്തിനാണ് ഫിലിം ഫെയര്‍ ക്രിട്ടിക്‌സ് അവാര്‍ഡ് ദുല്‍ഖര്‍ സല്‍മാന്‍ സ്വന്തമാക്കിയത്. ദുല്‍ഖര്‍ സല്‍മാന്‍ നേടുന്ന നാലാമത്തെ ഫിലിം ഫെയര്‍ അവാര്‍ഡ് ആണിത്. അതുപോലെ തെലുങ്ക് ചിത്രത്തിലെ പ്രകടനത്തിന് അദ്ദേഹം സ്വന്തമാക്കുന്ന രണ്ടാമത്തെ ഫിലിം ഫെയര്‍ അവാര്‍ഡ് എന്ന പ്രത്യേകതയും ഇതിനുണ്ട്. 2019-ല്‍ മഹാനടി എന്ന ചിത്രത്തിലെ പ്രകടനത്തിനും മികച്ച നടനുള്ള ഫിലിം ഫെയര്‍ ക്രിട്ടിക്‌സ് അവാര്‍ഡ് സൗത്ത് ദുല്‍ഖര്‍ സല്‍മാന്‍ നേടിയിരുന്നു.
ദുല്‍ഖര്‍ സല്‍മാന്‍ മികച്ച നടനുള്ള ക്രിട്ടിക്‌സ് അവാര്‍ഡ് നേടിയതിനൊപ്പം, ഫിലിം ഫെയര്‍ അവാര്‍ഡ്സ് സൗത്ത് 2023-ലെ മികച്ച ചിത്രത്തിനുള്ള ക്രിട്ടിക്‌സ് അവാര്‍ഡും സീതാരാമം നേടിയെടുത്തു. 2022-ല്‍ റിലീസ് ചെയ്ത സീതാരാമം എന്ന തെലുങ്ക് ചിത്രം പ്രേക്ഷകരും നിരൂപകരും ഒരുപോലെ പ്രശംസ ചൊരിഞ്ഞ ചിത്രമാണ്. ദുല്‍ഖര്‍ സല്‍മാന്റെ സിനിമാ ജീവിതത്തിലെ ഇതുവരെയുള്ള ഏറ്റവും വലിയ ബോക്‌സ് ഓഫീസ് ഹിറ്റ് കൂടിയായ സീതാരാമം രചിച്ചു സംവിധാനം ചെയ്തത് ഹനു രാഘവപുടിയാണ്. മൃണാള്‍ താക്കൂര്‍ നായികാ വേഷം ചെയ്ത ഈ ചിത്രത്തില്‍ രശ്മിക മന്ദാനയും നിര്‍ണ്ണായകമായ കഥാപാത്രത്തിന് ജീവന്‍ പകര്‍ന്നു, തെലുങ്ക് കൂടാതെ തമിഴ്, മലയാളം, ഹിന്ദി ഭാഷകളിലും റിലീസ് ചെയ്ത ഈ ചിത്രം നിര്‍മ്മിച്ചത് വൈജയന്തി മൂവീസ്, സ്വപ്ന സിനിമാസ് എന്നിവയുടെ ബാനറില്‍ സി അശ്വനി ദത്താണ്. സൗത്ത് ഇന്ത്യന്‍ ഇന്റര്‍നാഷണല്‍ മൂവി അവാര്‍ഡ്സില്‍ മികച്ച തെലുങ്ക് ചിത്രം, മികച്ച നടിക്കുള്ള ക്രിട്ടിക്‌സ് അവാര്‍ഡ് എന്നിവയും ഈ ചിത്രം നേടിയെടുത്തിരുന്നു.
Recent Comments