ബിജുമേനോനെയും ആസിഫ് അലിയെയും കേന്ദ്രകഥാപാത്രങ്ങളാക്കി ജിസ് ജോയ് സംവിധാനം ചെയ്ത തലവന്‍ എന്ന സൂപ്പര്‍ഹിറ്റ് ചിത്രത്തിന്റെ രണ്ടാം ഭാഗം വരുന്നു. ബ്ലോക്ക് ബസ്റ്റര്‍ ഹിറ്റായി മാറിയ ആദ്യ ഭാഗത്തിന്റെ 65-ാം ദിന വിജയാഘോഷ ചടങ്ങില്‍വച്ച് സംവിധായകനും നടനുമായ ദിലീഷ് പോത്തനാണ് രണ്ടാം ഭാഗമായ തലവന്‍ 2 ന്റെ ഔദ്യോഗിക പ്രഖ്യാപനം നടത്തിയത്. തലവനില്‍ ഒരു പ്രധാന വേഷം കൈകാര്യം ചെയ്തത് ദിലീഷ് പോത്തനാണ്.
രണ്ട് വ്യത്യസ്ത റാങ്കുകളിലുള്ള പോലീസ് ഓഫീസര്‍മാരുടെ ഇടയിലുണ്ടാകുന്ന പ്രശ്‌നങ്ങള്‍, ഒരു ഇന്‍വെസ്റ്റിഗേഷന്‍ ത്രില്ലറിന്റെ രൂപത്തില്‍ പ്രേക്ഷകരുടെ മുന്നില്‍ അവതരിപ്പിച്ച ചിത്രമാണ് തലവന്‍. ഇക്കഴിഞ്ഞ മെയ് 24 നാണ് ചിത്രം റിലീസ് ചെയ്തത്. ചിത്രത്തിന് വന്‍ പ്രേക്ഷക-നിരൂപക പ്രശംസയാണ് ലഭിച്ചത്. ബിജുമേനോന്‍, ആസിഫ് അലി, ജിസ് ജോയ് എന്നിവരുടെ കരിയറിലെ തന്നെ ഏറ്റവുംവലിയ ഹിറ്റുകളിലൊന്നായി തലവന്‍ മാറി. അരുണ്‍ നായര്‍ പ്രൊഡക്ഷന്‍സിന്റെയും ലണ്ടന്‍ സ്റ്റുഡിയോസിന്റെയും ബാനറുകളില്‍ അരുണ്‍ നാരായണന്‍, സിജോ സെബാസ്റ്റിയന്‍ എന്നിവര്‍ ചേര്‍ന്ന് നിര്‍മ്മിച്ച ഈ ചിത്രം രചിച്ചത് ശരത് പെരുമ്പാവൂര്‍, ആനന്ദ് തേവരക്കാട്ട് എന്നിവര്‍ ചേര്‍ന്നാണ്.
കോട്ടയം നസീര്‍, അനുശ്രീ, മിയ, ശങ്കര്‍ രാമകൃഷ്ണന്‍, ജോയി കെ. ജോണ്‍, ദിനേശ്, അനുരൂപ്, നന്ദന്‍ ഉണ്ണി, ബിലാസ് എന്നിവരാണ് ചിത്രത്തിലെ മറ്റു അഭിനേതാക്കള്‍.
Recent Comments