ഗോവിന്ദ് പത്മസൂര്യയെ നായകനാക്കി റഷീദ് പാറക്കല്‍ തിരക്കഥയെഴുതി സംവിധാനം ചെയ്യുന്ന ചിത്രമാണ് മനോജരാജ്യം. പൂര്‍ണ്ണമായും ഓസ്‌ട്രേലിയയില്‍ ചിത്രീകരിച്ച സിനിമയുടെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. പ്രശസ്ത താരങ്ങളുടെ സോഷ്യല്‍ മീഡിയ പേജിലൂടെയാണ് പോസ്റ്റര്‍ റിലീസ് ചെയ്തത്.
ഇന്‍ഡീജീനിയസ് ഫിലിംസിന്റെ ബാനറില്‍ സി കെ അനസ് മോന്‍ ആണ് ചിത്രത്തിന്റെ നിര്‍മ്മാതാവ്. സമീര്‍ എന്ന ചിത്രത്തിനു ശേഷം റഷീദ് പാറക്കല്‍ സംവിധാനം ചെയ്യുന്ന ചിത്രമാണിത്. ഒരു ഇടവേളയ്ക്ക് ശേഷം ഗോവിന്ദ് പത്മസൂര്യ നായകനായെത്തുന്ന മലയാള ചിത്രം കൂടിയാണ് മനോരാജ്യം.
കേരള തനിമയില്‍ ജീവിക്കാന്‍ ആഗ്രഹിക്കുന്ന ആസ്‌ട്രേലിയയില്‍ താമസിക്കുന്ന മനുവിന്റെയും പ്രവാസ ജീവിതം ആസ്വദിക്കാന്‍ ആഗ്രഹിക്കുന്ന സുഹൃത്തിന്റേയും കഥയാണ് മനോരാജ്യം. മനുവിന്റെയും നായികയായ മിയയുടെയും സംഘര്‍ഷഭരിതമായ ജീവിതമാണ് ചിത്രത്തിന്റെ പ്രമേയം. രഞ്ജിത മേനോന്‍, നവാസ് വള്ളിക്കുന്ന്, ഗോകുലന്‍, ജസണ്‍വുഡ്, റയാന്‍ ബിക്കാടി,യശ്വിജസ്വല്‍ തുടങ്ങിയവരാണ് ചിത്രത്തില്‍ മറ്റ് പ്രധാന വേഷങ്ങളിലെത്തുന്നത്. മെല്‍ബണ്‍ സിറ്റിയുടെ മനോഹാരിതയും കഥാപശ്ചാത്തലത്തിന്റെ നിഷ്‌കളങ്കതയും ചേര്‍ന്ന് ചിരിക്കാനും ചിന്തിക്കാനുമായുള്ള ഫാമിലി ഡ്രാമയാണ് മനോരാജ്യം.
മധേസ് ആര്‍ ക്യാമറമാന്‍ ആയിട്ടുള്ള ചിത്രത്തിന്റെ എഡിറ്റര്‍ നൗഫല്‍ അബ്ദുള്ളയാണ്. റഷീദ് പാറക്കല്‍, രഞ്ജിത മേനോന്‍ എന്നിവരുടെ വരികള്‍ക്ക് യുനസിയോയാണ് ഈണം പകര്‍ന്നിരിക്കുന്നത്. കോ പ്രൊഡ്യൂസര്‍- രശ്മി ജയകുമാര്‍, മാര്‍ക്ക് യു എസ് കോണ്‍സെപ്ഷന്‍- അയൂബ് തലശ്ശേരി പറമ്പില്‍, ബിജിഎം- സുപ, രാമു. ആര്‍ട്ട് ഡയറക്ടര്‍- ശ്രീരാജ് രാജപ്പന്‍, രെജു റാഫെല്‍, മേക്കപ്പ്- ലിജി വര്‍ഗീസ്, യാഷ്വി ജസ്വല്‍, പ്രൊഡക്ഷന്‍ കണ്‍ട്രോളര്‍- പി സി മുഹമ്മദ്, കോസ്റ്റ്യൂംസ്- ശബാന, ഇയ്‌ന, എആര്‍ ഹാന്‍ഡ്ലൂംസ്, ചീഫ് അസോസിയേറ്റ് ഡയറക്ടര്‍- ലിനീഷ് ജോണ്‍, കളറിസ്റ്റ്- ബിലാല്‍ റഷീദ്, സൗണ്ട് ഡിസൈന്‍- കരുണ്‍ പ്രസാദ്, സ്റ്റില്‍സ്- നിസാര്‍ മൊയ്ദീന്‍. ഡിസൈന്‍- സജീഷ് എം ഡിസൈന്‍ തുടങ്ങിയവരാണ് മറ്റു അണിയറ പ്രവര്‍ത്തകര്‍. പിആര്‍ഒ എംകെ ഷെജിന്‍.
Recent Comments