അവതരണത്തിലെ പുതുമയും പ്രമേയത്തിലെ വ്യത്യസ്തതയും കൊണ്ട് പ്രേക്ഷകര്‍ ഹൃദയത്തില്‍ ഏറ്റെടുത്ത വെബ് സീരീസ് 1000 ബേബീസിലും മികച്ച പ്രകടനം കാഴ്ച വെച്ച് നടന്‍ ആദില്‍ ഇബ്രാഹിം. സംവിധായകന്‍ നജീം കോയ ഒരുക്കിയ ചിത്രമാണ് 1000 ബേബീസ്. ടെലിവിഷന്‍ ചാനല്‍ പ്രോഗ്രാമിലൂടെ മലയാള സിനിമയിലെത്തിയ ആദില്‍ വളരെ വേഗത്തിലാണ് സിനിമയില്‍ ശ്രദ്ധേയനായി മാറിയത്. പ്രേക്ഷകര്‍ ഇരുകൈയും നീട്ടി സ്വീകരിച്ച ഒട്ടേറെ കഥാപാത്രങ്ങള്‍ ആദില്‍ ചെയ്തിട്ടുണ്ട്.
ഹോട്സ്റ്റാറില്‍ റിലീസ് ചെയ്ത 1000 ബേബീസില്‍ എസ്.ഐ മുഹമ്മദ് അന്‍സാരി എന്ന പോലീസ് ഓഫീസറുടെ വേഷത്തിലാണ് ആദില്‍ അഭിനയിച്ചത്. റഹ്‌മാനൊപ്പമുള്ള അന്വേഷണ ഉദ്യോഗസ്ഥനാണ് ആദില്‍. 1000 ബേബീസ് കാണുന്ന പ്രേക്ഷകരുടെ ഹൃദയത്തില്‍ ചേക്കേറുന്ന കഥാപാത്രം കൂടിയാണ് ആദില്‍ ഇബ്രാഹിം. ചിത്രത്തിന്റെ ഭാഗമാകാന്‍ കഴിഞ്ഞതില്‍ ഒത്തിരി സന്തോഷമെന്ന് ആദില്‍ പറഞ്ഞു.
ഒരു കുറ്റന്വേഷണ ത്രില്ലര്‍ തന്നെയാണ് ചിത്രം. റഹ്‌മാന്‍, സഞ്ജു ശിവരാം, നീന ഗുപ്ത, അശ്വിന്‍ കുമാര്‍ തുടങ്ങി ഓരോ എപ്പിസോഡിലും ഓരോരോ പുതിയ കഥാപാത്രങ്ങളും മികച്ച പ്രകടനമാണ് കാഴ്ചവച്ചിരിക്കുന്നത്.
റേഡിയോ ജോക്കി, മോഡല്‍ എന്നീ നിലകളിലും ആദില്‍ പ്രശസ്തനാണ്. ദുബായിലാണ് ആദില്‍ പഠിച്ചതും വളര്‍ന്നതും. 2013 മുതല്‍ ചലച്ചിത്രരംഗത്ത് സജീവമാണ്. നിര്‍ണായകം, കാപ്പി തുരുത്ത്, അച്ചായന്‍സ്, ഹലോ ദുബായ്ക്കാരന്‍, ലൂസിഫര്‍, മോഹന്‍കുമാര്‍ ഫാന്‍സ്, കല്ല്യാണിസം, സുഖമായിരിക്കട്ടെ, ചെരാതുകള്‍ തുടങ്ങി പാലും പഴവും, കള്ളം എന്നിങ്ങനെ ഇരുപതിലധികം ചിത്രങ്ങളില്‍ ആദില്‍ അഭിനയിച്ചു.
ആര്യ ഭുവനേന്ദ്രന്‍ കഥ-തിരക്കഥ-സംഭാഷണം- നിര്‍മ്മാണം എന്നിവ നിര്‍വഹിച്ച് പ്രമുഖ സംവിധായകന്‍ അനുറാം ഒരുക്കുന്ന ‘കള്ളം’ എന്ന ചിത്രത്തില്‍ നായകന്‍ ആദില്‍ ഇബ്രാഹിം ആണ്. ചിത്രം അടുത്ത മാസം റിലീസ് ചെയ്യും. മഴവില്‍ മനോരമ ചാനലിലെ ഡി ഫോര്‍ ഡാന്‍സ് എന്ന റിയാലിറ്റി ഷോയുടെ അവതാരകന്‍ ആദിലായിരുന്നു.
Recent Comments