മോഹന്‍ലാലിനെ നായകനാക്കി സത്യന്‍ അന്തിക്കാട് സംവിധാനം ചെയ്യുന്ന ചിത്രത്തില്‍ സംഗീത് പ്രതാപും. ചിത്രത്തില്‍ മുഴുനീള വേഷത്തിലാകും സംഗീത് എത്തുക. പ്രേമലു എന്ന ചിത്രത്തില്‍ അമല്‍ ഡേവിസ് എന്ന കഥാപാത്രം പ്രേക്ഷകശ്രദ്ധ നേടിയിരുന്നു. സംഗീതിന്റെ കരിയറിലെ മറ്റൊരു പ്രധാനപ്പെട്ട പ്രോജക്ടാകും ഈ ചിത്രം.
View this post on Instagram
‘മനസ്സിനക്കരെ എന്ന സിനിമയില്‍ ഏറ്റവും ഇഷ്ടപ്പെടുന്ന ഒരു കുട്ടിയില്‍നിന്നും അദ്ദേഹത്തിന്റെ അടുത്ത യാത്രയില്‍ ഒപ്പം ചേരുന്നതുവരെ. സത്യന്‍ അന്തിക്കാട്, സ്‌നേഹം മാത്രം. അഖില്‍ സത്യനും അനൂപ് സത്യനും നന്ദി’- സത്യന്‍ അന്തിക്കാടിനും അഖില്‍ സത്യനുമൊപ്പമുള്ള ചിത്രം പങ്കുവച്ച് സംഗീത് കുറിച്ചു.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മ്മിക്കുന്ന ചിത്രത്തിന്റെ കഥ സത്യന്‍ അന്തിക്കാടിന്റേതാണ്. സോനു ടി.പിയാണ് തിരക്കഥ എഴുതുന്നത്. നൈറ്റ് കോള്‍ എന്ന ഹ്രസ്വചിത്രത്തിലൂടെ ശ്രദ്ധേയനാണ് സോനു. യുവ സംഗീതജ്ഞന്‍ ജസ്റ്റിന്‍ പ്രഭാകരനാണ് സംഗീതം ഒരുക്കുന്നത്. അനു മുത്തേടത്താണ് ഛായാഗ്രാഹകന്‍. കൊച്ചി, പൂനെ എന്നിവയാണ് പ്രധാന ലൊക്കേഷനുകള്‍.
Recent Comments