‘ചിറ്റാ’ എന്ന സിനിമക്ക് ശേഷം സിദ്ധാര്‍ത്ഥ് നായകനാവുന്ന ‘മിസ് യു’ നവംബര്‍ 29 ന് ലോകമെമ്പാടുമുള്ള തീയേറ്ററുകളില്‍ റിലീസ് ചെയ്യും. മാപ്പ്‌ള സിങ്കം, കളത്തില്‍ സന്ധിപ്പോം എന്നീ സിനിമകള്‍ക്ക് ശേഷം എന്‍. രാജശേഖര്‍ രചനയും സംവിധാനവും നിര്‍വഹിച്ചിരിക്കുന്ന ചിത്രമാണിത്. ഒരു റൊമാന്റിക് എന്റര്‍ടെയ്‌നറാണ് മിസ് യു. ആഷികാ രംഗനാഥാണ് നായിക.
”Love You’ എന്ന വാക്കിനെക്കാള്‍ ‘Miss You ‘ എന്ന വാക്കിലാണ് പ്രണയം അധികമുള്ളത്. അതു കൊണ്ടാണ് ‘മിസ് യു’ എന്ന ടൈറ്റില്‍ വെച്ചത്. എല്ലാവരും അവര്‍ക്ക് ഇഷ്ടപ്പെട്ട പെണ്ണിനെയാണ് പ്രേമിക്കുക. ഇതില്‍ നായകന്‍ തനിക്ക് ഇഷ്ടമില്ലാത്ത പെണ്ണിനെയാണ് പ്രേമിക്കുന്നത്. കഥയുടെ ഈ ഒരു ലൈനാണ് സിദ്ധാര്‍ത്ഥിനെ ഇംപ്രസ് ചെയ്തത്. എങ്ങനെ ഇഷ്ടമില്ലാത്ത പെണ്ണിനെ ഒരുത്തന്‍ പ്രേമിക്കുന്നു, അവള്‍ക്കത് അറിയാമായിരുന്നിട്ടും എങ്ങനെ അവന്‍ കണ്‍വിന്‍സ് ചെയ്യുന്നു തുടങ്ങിയ ചോദ്യങ്ങള്‍ക്കുള്ള ഉത്തരം കൂടിയാണ് സിനിമ. എന്റെ ഒരു സുഹൃത്തിന്റെ ജീവിതത്തില്‍ നടന്ന സംഭവമാണ് ഈ കഥയ്ക്ക് പ്രചോദനമായത്. സംവിധായകന്‍ എന്‍. രാജശേഖര്‍ പറയുന്നു.
സിനിമാ സംവിധായകനാവാന്‍ വേണ്ടി പരിശ്രമിക്കുന്ന നായക കഥാപാത്രത്തെയാണ് സിദ്ധാര്‍ത്ഥ് അവതരിപ്പിക്കുന്നത്. വീണ്ടും യുവത്വത്തിന്റെ പ്രസരിപ്പുള്ള റൊമാന്റിക് ഹീറോ ആയി ഈ സിനിമയിലൂടെ കളത്തില്‍ ഇറങ്ങുകയാണ് സിദ്ധാര്‍ത്ഥ്. അദ്ദേഹം തെലുങ്കില്‍ ഒട്ടേറെ സൂപ്പര്‍ ഹിറ്റ് പ്രണയ കഥാ ചിത്രങ്ങളില്‍ അഭിയിച്ചിട്ടുണ്ടെങ്കിലും തമിഴില്‍ ഇതു പോലെ റൊമാന്റിക് കഥാപാത്രത്തില്‍ അഭിനയിച്ചിട്ട് നാളുകള്‍ ഏറെയായി. പതിവായി ചെയ്തു കൊണ്ടിരുന്ന ഒന്ന് നീണ്ട നാളുകള്‍ക്ക് ശേഷം വീണ്ടും ചെയ്യുമ്പോള്‍ അതിന് വ്യത്യസ്തതയുണ്ടാവും .അങ്ങനെ നോക്കുമ്പോള്‍ അദ്ദേഹത്തിന് ഇത് വ്യത്യസ്തമായ ഒരു സിനിമ തന്നെയായിരിക്കും. ഇതൊരു ഫീല്‍ ഗുഡ് റൊമാന്റിക് സിനിമയാണ്.
ചിത്രത്തിന്റെ അടുത്തിടെ പുറത്തിറങ്ങിയ ടീസര്‍ യു ട്യൂബില്‍ ഒരു മില്യനിലേറെ കാഴ്ചക്കാരെ നേടി തരംഗമാകുന്നു എന്നതും ശ്രദ്ധയമാണ്.
സി.കെ. അജയ് കുമാര്‍
Recent Comments