ഷെയ്ന്‍ നിഗത്തിന്റെ 25-മത് ചിത്രത്തിന്റെ പൂജയും സ്വിച്ച് ഓണ്‍ കര്‍മ്മവും നടന്നു. കോയമ്പത്തൂരില്‍ ഷൂട്ടിംഗ് ആരംഭിച്ച സ്‌പോര്‍ട്‌സ് ആക്ഷന്‍ മൂഡില്‍ ഒരുങ്ങുന്ന ഈ മാസ്സ് എന്റര്‍ടൈനര്‍ ചിത്രത്തില്‍ ശാന്തനു ഭാഗ്യരാജും പ്രധാന വേഷത്തില്‍ എത്തുന്നു.
എസ് ടി കെ ഫ്രെയിംസിന്റെ ബാനറില്‍ സന്തോഷ് ടി കുരുവിളയും ബിനു അലക്‌സാണ്ടര്‍ ജോര്‍ജും ചേര്‍ന്നാണ് ചിത്രം നിര്‍മ്മിക്കുന്നത്. നിരവധി ഹിറ്റ് ചിത്രങ്ങളിലൂടെ പുതുമുഖ സംവിധായകരെ മലയാള സിനിമയ്ക്ക് നല്‍കിയ നിര്‍മ്മാതാവ് സന്തോഷ് ടി കുരുവിളയുടെ ഈ പുതിയ ചിത്രത്തിന്റെയും സംവിധായകന്‍ ഒരു പുതുമുഖമാണ്. പാലക്കാട് സ്വദേശിയായ ഉണ്ണി ശിവലിംഗം ചിത്രത്തിന്റെ കഥയും തിരക്കഥയും സ്വയം ഒരുക്കിക്കൊണ്ടാണ് സിനിമയിലേക്കുള്ള അരങ്ങേറ്റം കുറിച്ചത്. ഷെയ്ന്‍ നിഗമും ചിത്രത്തിലെ നായിക പ്രീതി അസ്രാണിയും ചേര്‍ന്ന് സ്വിച്ച് ഓണ്‍ ചെയ്തു.
ശാന്തനു ഭാഗ്യരാജും ഭാര്യ കീര്‍ത്തിയും ചേര്‍ന്ന് ക്ലാപ്പ് അടിച്ചു. പ്രൊഡ്യൂസര്‍മാരായ സന്തോഷ് ടി കുരുവിളയും ബിനു അലക്‌സാണ്ടര്‍ ജോര്‍ജും ചേര്‍ന്ന് തിരക്കഥ ഡയറക്ടര്‍ക്ക് കൈമാറി ഷൂട്ടിംഗ് ആരംഭിച്ചു. എസ്.ടി.കെ ഫ്രെയിംസിന്റെ 14-മത് ചിത്രവും സന്തോഷ് ടി കുരുവിള നിര്‍മ്മാതാവായ ചിത്രങ്ങളിലെ 6-ാമത്തെ നവാഗത സംവിധായകന്റെ ചിത്രം എന്നീ പ്രത്യേകതകള്‍ കൂടി ഈ ചിത്രത്തിനുണ്ട്. ഭാവന സ്റ്റുഡിയോസ് നിര്‍മിച്ച ‘തങ്കം’ എന്ന സിനിമയുടെ അസിസ്റ്റന്റ് ഡയറക്ടറായിരുന്നു ചിത്രത്തിന്റെ സംവിധായകനായ ഉണ്ണി ശിവലിംഗം.
കബഡി കളിക്കുന്ന നാല് യുവാക്കളുടെ കഥ കേന്ദ്രീകരിച്ചാണ് സിനിമ ഒരുക്കുന്നത്. മലയാളം തമിഴ് എന്നീ രണ്ടു ഭാഷകളിലായി ഒരുക്കുന്ന ചിത്രത്തിന്റെ ഷൂട്ടിംഗ് കോയമ്പത്തൂര്‍, പാലക്കാട്, പൊള്ളാച്ചി എന്നിവിടങ്ങളിലാണ്. 90 ദിവസം നീളുന്ന ഷൂട്ടിംഗ് ഷെഡ്യൂളാണ് ചിത്രത്തിനുള്ളത്. ഷെയ്ന്‍ നിഗത്തിന്റെ ഇതുവരെയുള്ള കരിയറിലെ വ്യത്യസ്തമാര്‍ന്ന വേഷമുള്ള മാസ്സ് പടമാകും ഇതെന്നാണ് സൂചന. തമിഴ്, തെലുങ്ക്, മലയാളം സിനിമയിലെ മുന്‍നിര താരങ്ങള്‍ കൂടി ചിത്രത്തിന്റെ ഭാഗമാകും. അതോടൊപ്പം തന്നെ ഒരു അതിഗംഭീര സംഗീത സംവിധായകന്റെ മലയാളത്തിലേക്കുള്ള അരങ്ങേറ്റവും ഈ ചിത്രത്തിലൂടെ ഉണ്ടാകും എന്ന സൂചനകളാണ് അണിയറപ്രവര്‍ത്തകര്‍ നല്‍കുന്നത്. ചിത്രത്തിന്റെ ടൈറ്റിലും ഇപ്പോള്‍ പുറത്തുവിടാതെ മറ്റൊരു സസ്‌പെന്‍സ് കാര്യമായി നിലനിര്‍ത്തുന്നു. ഇതെല്ലാം തന്നെ ഒരു മികച്ച സിനിമയുടെ കാത്തിരിപ്പിന് ആവേശം കൂട്ടുമെന്നതില്‍ തര്‍ക്കമില്ല.
ഛായാഗ്രഹണം അലക്‌സ് ജെ പുള്ളിക്കല്‍, എഡിറ്റര്‍ ശിവകുമാര്‍ പണിക്കര്‍ (ബോളിവുഡ് ചിത്രം ‘കില്‍’ ന്റെ എഡിറ്റര്‍), എക്‌സിക്യൂട്ടീവ് പ്രൊഡ്യൂസര്‍ സന്ദീപ് നാരായണ്‍,
രചന വിനായക് ശശികുമാര്‍, പ്രൊഡക്ഷന്‍ ഡിസൈനര്‍ ആഷിക് എസ്, മേക്കപ്പ് ജിതേഷ് പൊയ്യ, കോസ്റ്റ്യൂംസ് മെല്‍വി, ആക്ഷന്‍ കൊറിയോഗ്രാഫി വിക്കി മാസ്റ്റര്‍, പ്രൊഡക്ഷന്‍ കണ്‍ട്രോളര്‍ കിഷോര്‍ പുറക്കാട്ടിരി. ചീഫ് അസോസിയേറ്റ് ശ്രീലാല്‍, സൗണ്ട് ഡിസൈന്‍ നിതിന്‍ ലൂക്കോസ്, ഫിനാന്‍സ് കണ്‍ട്രോളര്‍ ജോബീഷ് ആന്റണി, പിആര്‍ഒ മഞ്ജു ഗോപിനാഥ്, സ്റ്റില്‍സ് ഷാലു പേയാട്, ഡിസൈന്‍സ് വിയാക്കി.
Recent Comments