പ്രഭാസിന്റെ ഏറ്റവും പുതിയ ചിത്രം രാധേശ്യാമിന്റെ പ്രീ ടീസര്‍ യുട്യൂബിലൂടെ റിലീസ് ചെയ്തു. പ്രഭാസിന്റെ തന്നെ ചിത്രമായ ബാഹുബലിയിലെയും സഹോവിലെയും വേഷപ്പകര്‍ച്ച ഓര്‍മ്മിപ്പിച്ചുകൊണ്ടാണ് പ്രി ടീസര്‍ ആരംഭിക്കുന്നത്. രാധേശ്യാമില്‍ അദ്ദേഹത്തിന് റൊമാന്റിക്ക് പരിവേഷമാണ് നല്‍കിയിരിക്കുന്നത്. ചുവന്ന ഓവര്‍ക്കോട്ട് ധരിച്ച് മഞ്ഞു പൊഴിയുന്ന പാതയോരങ്ങളിലൂടെ നടക്കുന്ന പ്രഭാസിന്റെ മുപ്പത് സെക്കന്‍ഡ് മാത്രം ദൈര്‍ഘ്യമുള്ള പ്രി ടീസറാണ് ഇപ്പോള്‍ പുറത്ത് വിട്ടിരിക്കുന്നത്.
‘നിങ്ങളറിയുന്ന നായകന്റെ ഹൃദയം തൊട്ടറിയാനുള്ള സമയമാണ് ഇനി വരുന്നത്’ എന്ന ടാഗോടുകൂടിയാണ് പ്രി ടീസര്‍ റിലീസ് ചെയ്തിരിക്കുന്നത്. ഇന്ത്യന്‍ സിനിമാ ചരിത്രത്തില്‍ തന്നെ ഒരു താരത്തിന്റെ കഥാപാത്രങ്ങളുടെ പൊതു സ്വഭാവത്തെ ആസ്പദമാക്കി പുറത്തിറങ്ങുന്ന ആദ്യത്തെ പ്രി ടീസറാണ് രാധേശ്യാമിന്റേതെന്ന് അണിയറപ്രവര്‍ത്തകര്‍ അവകാശപ്പെട്ടു. ചിത്രത്തിന്റെ ഔദ്യോഗിക ടീസര്‍ വാലന്‍യിന്‍സ് ദിനമായ ഫെബ്രുവരി 14 ന് റിലീസ് ചെയ്യുമെന്ന് പ്രി ടീസറില്‍ ഉള്‍പ്പെടുത്തിയിട്ടുണ്ട്.
പ്രഭാസും പൂജ ഹെഗ്ഡെയും താരജോഡികളായെത്തുന്ന റൊമാന്റിക്ക് ചിത്രത്തിനായുള്ള കാത്തിരിപ്പിലാണ് പ്രേക്ഷകര്‍. പ്രഭാസിന്റെ ഇരുപതാമത്തെ ചിത്രമാണ് രാധേശ്യാമെങ്കിലും ഏറെ നാളത്തെ ഇടവേളയ്ക്കൊടുവിലാണ് ഒരു റൊമാന്റിക്ക് നായകനായി പ്രഭാസ് ബിഗ് സ്‌ക്രീനിലെത്തുന്നത്. രാധാകൃഷ്ണ കുമാര്‍ സംവിധാനം ചെയ്യുന്ന ചിത്രത്തിന്റെ നിര്‍മ്മാണം ഗോപി കൃഷ്ണ മൂവീസും യുവി ക്രിയേഷനും ചേര്‍ന്നാണ്. തെലുങ്ക്, ഹിന്ദി, തമിഴ്, മലയാളം എന്നീ നാല് ഭാഷകളിലായാണ് ചിത്രം പുറത്തെത്തുക.
Recent Comments