കൃഷ്ണന്‍കുട്ടി പണി തുടങ്ങി എന്ന സിനിമയുടെ ട്രെയിലര്‍ റിലീസ് ചെയ്ത് മണിക്കൂറുകള്‍ പിന്നിടുമ്പോള്‍തന്നെ യൂട്യൂബിലെ ട്രെന്റിംഗ് വീഡിയോയായി മാറിക്കഴിഞ്ഞു. ഇതിനോടകം ലക്ഷങ്ങളാണ് ട്രെയിലര്‍ കണ്ടിരിക്കുന്നത്. മോഹന്‍ലാലിന്റെ ഒഫീഷ്യല്‍ ഫേസ്ബുക്കിലൂടെയാണ് ട്രെയിലര്‍ റിലീസ് ചെയ്‌തെങ്കിലും നിരവധി താരങ്ങളും ട്രെയിലര്‍ ഷെയര്‍ ചെയ്തിട്ടുണ്ട്. നടന്‍ മാധവനും തന്റെ ട്വിറ്റര്‍ പേജിലൂടെ ട്രെയിലര്‍ ഷെയര്‍ ചെയ്തിരുന്നു. തുടര്‍ന്ന് അന്യഭാഷാ ചിത്രങ്ങളിലെ നിരവധി ടെക്‌നീഷ്യന്മാരാണ് ചിത്രത്തിന്റെ സംവിധായകന്‍ സൂരജ് ടോമിനെ വിളിച്ച് അഭിനന്ദനങ്ങള്‍ അറിയിച്ചത്.
ഏപ്രില്‍ 11 ന് ZEE5 ഒ.ടി.ടി. പ്ലാറ്റ്‌ഫോമിലൂടെ കൃഷ്ണന്‍കുട്ടി പണി തുടങ്ങി റിലീസിനെത്തും. ആമസോണിനും നെറ്റ്ഫ്‌ളിക്‌സിനും പിന്നാലെ ശക്തമായ സാന്നിദ്ധ്യമായി എത്തുന്ന മറ്റൊരു ഒ.ടി.ടി പ്ലാറ്റ്‌ഫോമാണ് ZEE5. മലയാളത്തിലെ പേരെടുത്ത ചിത്രങ്ങളെ ZEE5 ഇതിനോടകം പര്‍ച്ചേസ് ചെയ്തുകഴിഞ്ഞു. ZEE ചാനലിന്റെ ഒ.ടി.ടി. പ്ലാറ്റ്‌ഫോമാണ് ZEE5. ഏപ്രില്‍ 11 ന് ശേഷം സീ കേരളയിലും കൃഷ്ണന്‍കുട്ടി പണിതുടങ്ങി ടെലികാസ്റ്റ് ചെയ്യും.
സൂരജ് ടോം സംവിധാനം ചെയ്യുന്ന ചിത്രത്തിന്റെ ഛായാഗ്രാഹകന്‍ ജിത്തു ദാമോദറാണ്. താന്‍ ഇതുവരെ ചെയ്ത ചിത്രങ്ങളില്‍നിന്നൊക്കെ വ്യത്യസ്തമായി ഏറ്റവുമധികം ഫീഡ്ബാക്ക് കിട്ടിയ ട്രെയിലറാണ് ഇതെന്ന് ജിത്തു കാന്‍ ചാനലിനോട് പറഞ്ഞു. ‘പൊതുവേ ഡാര്‍ക്ക് ത്രില്ലറോട് എനിക്ക് ഇഷ്ടമാണ്. മുമ്പ് ചെയ്ത ആദം ജോണും അതേ ഗണത്തിലുള്ള ചിത്രമായിരുന്നു. എങ്കിലും അത് കുറച്ചുകൂടി ഹോളിവുഡ് സിനിമയുടെ പാറ്റേണിലാണ് ചെയ്തത്. പെര്‍ഫക്ഷനിലൊക്കെ പ്രത്യേകം ശ്രദ്ധിച്ച സിനിമയാണ്. എന്നാല്‍ കൃഷ്ണന്‍കുട്ടി പണി തുടങ്ങി എന്ന ചിത്രത്തിനുവേണ്ടി ലെന്‍സിംഗിലൊക്കെ റോ, ഡാര്‍ക്ക്, ലൈവ് എന്നൊരു തരം പരീക്ഷണമാണ് നടത്തിയത്. അതിനെക്കുറിച്ച് നല്ല അഭിപ്രായങ്ങള്‍ കേള്‍ക്കുന്നതില്‍ സന്തോഷമുണ്ട്.’
വിഷ്ണു ഉണ്ണികൃഷ്ണന്‍, സാനിയ ഇയ്യപ്പന്‍, വിജിലേഷ്, സന്തോഷ് ദാമോദര്‍, ധര്‍മ്മജന്‍ ബോള്‍ഗാട്ടി, ജോയ് ജോണ്‍ ആന്റണി, ജോമോന്‍ കെ. ജോണ്‍, ടോമി കുംബിടിക്കാരന്‍, അഭിജ ശിവകല, ഷെറിന്‍, ബേബി ശ്രീലക്ഷ്മി, ബേബി ഇസ എന്നിവരാണ് ചിത്രത്തിലെ താരനിരക്കാര്‍.
Recent Comments