കാര്‍ത്തി നായകനായ സുല്‍ത്താന്‍ വെള്ളിയാഴ്ച ലോകമെമ്പാടും റീലീസ് ചെയ്യുകയാണ്. ചിത്രത്തിന്റെ സവിശേഷതകളെ കുറിച്ചു ചോദിച്ചാല്‍ കാര്‍ത്തി ആദ്യം പറയുന്നത് ഒപ്പം അഭിനയിച്ച നടന്‍ ലാലിനെ കുറിച്ചാണ്. നൂറു നാവാണ് കാര്‍ത്തിക്ക് ലാലിനെ കുറിച്ചു പറയുമ്പോള്‍.
സുല്‍ത്താനില്‍ ആദ്യന്തം ലാല്‍ സാര്‍ എന്നോടൊപ്പമുണ്ടാവും. എന്റെ നായക കഥാപാത്രത്തിന്റെ ഓരോ വികാരങ്ങളിലും ഒപ്പം നിന്ന് പങ്കളിയാവുന്ന മുഴുനീള കഥാപാത്രമാണ് അദ്ദേഹത്തിന്റേത്. കട്ടപ്പാ എന്ന കഥാപാത്രത്തെയാണ് അദ്ദേഹം അവതരിപ്പിച്ചത്. വൈകാരികത നിറഞ്ഞ രംഗത്തും സ്റ്റണ്ട്-നൃത്ത രംഗത്തും അദ്ദേഹം സിക്സര്‍ അടിച്ചു എന്നുതന്നെ പറയാം. അത്രത്തോളം മികവുറ്റതായിരുന്നു അദ്ദേഹത്തിന്റെ അഭിനയം. കൂടാതെ വ്യക്തിപരമായി ഒരുപാട് കാര്യങ്ങള്‍ അദ്ദേഹത്തില്‍ നിന്നും പഠിക്കാനും കഴിഞ്ഞു. ചെറുപ്പം മുതലേ സ്റ്റേജ് പെര്‍ഫോം ചെയ്തും സംവിധായകനായും പ്രതിഭ തെളിയിച്ച അനുഭവങ്ങള്‍ എന്നോട് പങ്കു വെച്ചപ്പോള്‍ ലാല്‍ സാറിലെ കലാകാരനില്‍ എനിക്ക് വിസ്മയം തോന്നി. അനുഭവ സമ്പന്നനായ അദ്ദേഹത്തോടൊപ്പം അഭിനയിച്ചതില്‍ ഞാന്‍ ഏറെ അഭിമാനം കൊള്ളുന്നു. സുല്‍ത്താനില്‍ ലാല്‍ എന്ന നടനും അദ്ദേഹം അവതരിപ്പിച്ച കഥാപാത്രവും ചിത്രത്തിന് മുതല്‍ കൂട്ടായിരിക്കും. തീര്‍ച്ചയായും ലാല്‍ സാറിന്റെ കഥാപാത്രം ഏറെ പ്രശംസ നേടും… കട്ടപ്പയെ പോലെ .’ കാര്‍ത്തി പറഞ്ഞു.
ഡ്രീം വാരിയര്‍ പിക്‌ചേഴ്‌സ് നിര്‍മ്മിച്ച് ഭാഗ്യരാജ് കണ്ണന്‍ സംവിധാനം ചെയ്ത സുല്‍ത്താന്‍ പ്രേക്ഷകര്‍ക്ക് പൂര്‍ണ്ണ സംതൃപ്തി പകരുന്ന വിനോദ സിനിമ യായിരിക്കുമെന്ന് നിര്‍മ്മാതാക്കള്‍ അവകാശപ്പെടുന്നു.
Recent Comments