സോഷ്യല്‍മീഡിയയില്‍ ഇപ്പോള്‍ വൈറലായിക്കൊണ്ടിരിക്കുന്നത് കോട്ടയം നസീര്‍, മനോജ് കെ. ജയന് സമ്മാനിച്ച ഒരു ഓയില്‍ പെയിന്റിംഗാണ്. അനന്തഭദ്രം എന്ന സിനിമയില്‍ മനോജ് തന്നെ അവതരിപ്പിച്ച ദിഗംബരന്‍ എന്ന ശക്തമായ കഥാപാത്രത്തിന്റെ ഓയില്‍ പെയിന്റിംഗാണത്. ഒറ്റ നോട്ടത്തില്‍ ജീവനുള്ളതുപോലെ തോന്നും.
‘കഴിഞ്ഞ കുറേക്കാലമായി ഇങ്ങനെയൊരു ചിത്രത്തെക്കുറിച്ച് നസീറും എന്നോട് പറയുന്നുണ്ടായിരുന്നു. പക്ഷേ ഇന്നലെയാണ് നസീര്‍ എന്റെ ഫോണിലേയ്ക്ക് ആ ഓയില്‍പെയിന്റിംഗിന്റെ ഫോട്ടോ അയച്ചുതന്നത്. എനിക്ക് ഒത്തിരി ഇഷ്ടമായി. എത്ര മനോഹരമായിട്ടാണ് നസീര്‍ അത് വരച്ചിരിക്കുന്നത്. ദിഗംബരന്‍ എന്ന കഥാപാത്രത്തിന്റെ എല്ലാ മാനിറസങ്ങളും ആ ചിത്രത്തില്‍ തെളിഞ്ഞുകാണാം. അനന്തഭദ്രം ഇറങ്ങിയിട്ട് 15 വര്‍ഷമാകുന്നു. ഈ സമ്മാനം അങ്ങനെകൂടി വിലമതിക്കുന്നതാണ്. ഞാന്‍ എന്റെ ഫേസ്ബുക്ക് പോസ്റ്റില്‍ പറഞ്ഞതുപോലെ ഒരു കോട്ടയംകാരന് മറ്റൊരു കോട്ടയംകാരന് നല്‍കിയ വലിയൊരു അംഗീകാരം കൂടിയാണ്. അയാളത് എന്റെ മനസ്സിലാണ് വരച്ചിട്ടിരിക്കുന്നത്.’ മനോജ് കെ. ജയന് കാന്‍ ചാനലിനോട് പറഞ്ഞു.
‘കഴിഞ്ഞ ലോക്ഡൗണ്‍ കാലത്താണ് ഞാനീ ചിത്രം വരയ്ക്കാന്‍ തുടങ്ങിയത്.’ ചിത്രത്തിന്റെ നിര്‍മ്മിതിയെക്കുറിച്ച് ചോദിച്ചപ്പോള്‍ ആമുഖമായി നസീര്‍ പറഞ്ഞുതുടങ്ങി.
‘ഈ ചിത്രം വരയ്ക്കാന്‍ കാരണങ്ങള്‍ പലതാണ്. ഒന്നതിന്റെ ഭംഗിതന്നെ. ഒരു പെയിന്റിംഗ് പോലെ സുന്ദരമായ ചിത്രം. സന്തോഷ് ശിവന്‍ എന്ന ഛായാഗ്രാഹകന്റെ മനോഹരമായ ലൈറ്റിംഗിന്റെ മികവാണത്. അതുപോലെ മനോജേട്ടന്റെ കണ്ണുകളില്‍ ഒരുപോലെ നിറഞ്ഞുനില്‍ക്കുന്ന ക്രൗര്യവും സ്‌ത്രൈണതയും. അതും പടത്തെ ആകര്‍ഷകമാക്കുന്നു.’ കോട്ടയം നസീര്‍ തുടര്‍ന്നു.
‘ഒരാഴ്ച എടുത്താണ് ഞാനത് വരച്ചു തീര്‍ത്തത്. സാധാരണഗതിയില്‍ കൂടുതല്‍ സമയം വേണ്ടതാണ്. ഒറ്റ സ്‌ട്രെച്ചിലിരുന്നു വരച്ചതുകൊണ്ടാണ് പെട്ടെന്ന് തീര്‍ന്നത്. ഒരു പൊതുപരിപാടിയില്‍വച്ച് ഈ പടം കൈമാറണമെന്നാണ് ആഗ്രഹിച്ചത്. പക്ഷേ ഈ കോവിഡ് കാലം അതിനൊന്നും സമ്മതിക്കുമെന്ന് തോന്നുന്നില്ല. കഴിഞ്ഞദിവസം മനോജ് ചേട്ടനെ വിളിച്ച് കാര്യം പറഞ്ഞു. തുടര്‍ന്ന് അദ്ദേഹത്തിന്റെ വാട്ട്‌സ്ആപ്പിലേയ്ക്ക് പടം അയച്ചുകൊടുക്കുകയായിരുന്നു. അത് ഇത്രയധികം ശ്രദ്ധിക്കപ്പെട്ടതില്‍ സന്തോഷമുണ്ട്. പക്ഷേ ഒറിജിനല്‍ ഒരു ഫങ്ഷനില്‍വച്ചുതന്നെ കൈമാറും. അത് അമ്മയുടെ മീറ്റിംഗില്‍വച്ച് നല്‍കാനും ആലോചനയുണ്ട്. അങ്ങനെയാകുമ്പോള്‍ എല്ലാ ആര്‍ട്ടിസ്റ്റുകളും ഉണ്ടാകുമല്ലോ.’
‘ലാലേട്ടനാണ് (മോഹന്‍ലാല്‍) ഞാന്‍ ഏറ്റവും കൂടുതല്‍ പടങ്ങള്‍ വരച്ചുകൊടുത്തിരിക്കുന്നത്. എണ്ണത്തില്‍ പത്തെണ്ണം വരുമത്. മമ്മുക്കയുടെയും മഞ്ജു വാര്യരുടെയുമൊക്കെ ചിത്രങ്ങള്‍ വരയ്ക്കാനുള്ള തയ്യാറെടുപ്പിലാണ് ഞാനിപ്പോള്‍.’ നസീര്‍ പറഞ്ഞുനിര്‍ത്തി.
Recent Comments