കമല്‍ ആരാധകര്‍ ഏറെ ആകാംശയോടെ കാത്തിരിക്കുന്ന ചിത്രമാണ് ‘വിക്രം’. കമല്‍ ഹാസന്‍ നായകനാകുന്ന 232-ാം ചിത്രമാണ് ‘വിക്രം’. ലോകേഷ് കനകരാജാണ് ചിത്രം സംവിധാനം ചെയ്യുന്നത്. ലോകേഷിന്റെ മാസ്റ്ററിന്റെ വിജയത്തിന് ശേഷം ആരാധകര്‍ ഏറെ പ്രതീക്ഷയിലാണ് ചിത്രത്തിനായി കാത്തിരിക്കുന്നത്.
ചിത്രത്തിന്റെ ടൈറ്റില്‍ ടീസര്‍ കഴിഞ്ഞ നവംബര്‍ 7 നാണ് പുറത്തിറങ്ങിയത്. അന്ന് ടീസര്‍ യൂ ട്യൂബില്‍ വന്‍ തരംഗമായി മാറിയിരുന്നു. ശേഷം അടുത്തിടെ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്ത് വിട്ടതോടെയാണ് ആവേശം ഇരട്ടിച്ചത്. ചിത്രത്തില്‍ കമല്ഹാസന് പുറമെ ഫഹദ് ഫാസിലും വിജയ് സേതുപതിയും അഭിനയിക്കുന്നുണ്ട്. മൂവരും ഒരുമിക്കുന്ന ആദ്യ ചിത്രം കൂടിയാണ് വിക്രം.
1986 ല്‍ രാജശേഖറിന്റെ സംവിധാനത്തില്‍ കമലിന്റെ ‘വിക്രം’ എന്നൊരു സിനിമ പുറത്തിറങ്ങിയിരുന്നു. അന്ന് വന്‍ വിജയമായ ചിത്രത്തിന്റെ തുടര്‍ച്ചയാകില്ല പുതിയ ചിത്രമെന്ന് അണിയറ പ്രവര്‍ത്തകര്‍ നേരത്തെ അറിയിച്ചിരുന്നു.
വിക്രമില്‍ ഫഹദ് ഫാസില്‍ ജോയിന്‍ ചെയ്തു. ഫഹദ് തന്നെയാണ് കമല്‍ഹാസനൊപ്പമുള്ള ചിത്രം സമൂഹമാധ്യമങ്ങളിലൂടെ പങ്കുവെച്ചത്. ഒപ്പം വിക്രം എന്ന ക്യാപ്ഷനും നല്‍കിയിട്ടുണ്ട്.
പൊളിറ്റിക്കല്‍ ത്രില്ലര്‍ ആയ വിക്രമിന്റെ ചിത്രീകരണം ഒറ്റ ഷെഡ്യൂളില്‍ തീര്‍ക്കാനുള്ള പദ്ധതിയിലാണ് അണിയറപ്രവര്‍ത്തകര്‍. ഇന്ത്യന്‍ 2 വിന് ശേഷം കമല്‍ ഹാസന്‍ പ്രധാന വേഷത്തിലെത്തുന്ന ചിത്രമാണ് വിക്രം. നരേനും അര്‍ജുന്‍ ദാസും ചിത്രത്തില്‍ പ്രധാന വേഷം ചെയ്യുന്നുണ്ട്.
സത്യന്‍ സൂര്യനായിരുന്നു വിക്രമിന്റെ ഛായാഗ്രഹകന്‍. എന്നാല്‍ സത്യന്‍ മറ്റൊരു സിനിമയുടെ ഭാഗമായതോടെ ഗിരീഷ് ഗംഗാധരനാണ് പുതിയ ക്യാമറ മാന്‍. ഒരു ആക്ഷന്‍ ത്രില്ലര്‍ ചിത്രമാണ് വിക്രം എന്നാണ് സംവിധായകന്‍ പറഞ്ഞിരുന്നത്. പ്രശസ്ത സ്റ്റണ്ട് കൊറിയോഗ്രാഫര്‍ അന്‍പറിവാണ് ചിത്രത്തിനായി സംഘട്ടനങ്ങള്‍ ഒരുക്കുന്നത്. സംഗീതം അനിരുദ്ധ് രവിചന്ദര്‍.
ഷെരുണ്‍ തോമസ്‌
Recent Comments