ബേസിൽ ജോസഫ് സംവിധാനം ചെയ്യുന്ന ടോവിനോ ചിത്രം മിന്നല്‍ മുരളി’ക്ക് പാക്കപ്പ്. മലയാളത്തിലെ ആദ്യ സൂപ്പര്‍ ഹീറോ മൂവി എന്ന സവിശേഷതയും ചിത്രത്തിനുണ്ട്. 2019 ഡിസംബര്‍ 23നാണ് ഷൂട്ടിങ് ആരംഭിക്കുന്നത്. ഇതിനിടയില്‍ പല പ്രതിസന്ധികളും ചിത്രത്തിന് നേരിടേണ്ടി വന്നു.
ചിത്രത്തിന്റ ക്ലൈമാക്സ് ചിത്രീകരിക്കുവാന്‍ വേണ്ടി ആലുവ ക്ഷേത്രത്തിന്റെ സമീപം ക്രിസ്ത്യന്‍ ദേവാലയത്തിന്റെ സെറ്റ് ഒരുക്കിയിരുന്നു. എന്നാല്‍ ഈ സെറ്റ് രാഷ്ട്രീയ ബജ്റംഗ്ദള്‍ പ്രവര്‍ത്തകര്‍ തകര്‍ക്കുകയുണ്ടായി. ശേഷം ഈ സംഭവം വലിയ വര്‍ത്താ പ്രധാന്യം നേടുകയും ചെയ്തു. പിന്നീട് കാലവര്‍ഷം തുടങ്ങിയതിനാല്‍ മണപ്പുറത്ത് വെള്ളം കയറാനുള്ള സാധ്യത കണക്കിലെടുത്ത് ക്ഷേത്ര കമ്മിറ്റിയുടെ ആവശ്യപ്രകാരം സിനിമ പ്രവര്‍ത്തകര്‍ തന്നെ സെറ്റ് പൊളിച്ച് മാറ്റിയിരുന്നു. കൂടാതെകൊവിഡ് ലോക്ക്ഡൗണിനെ തുടര്‍ന്ന് സിനിമ ഷൂട്ടിങ് നിന്നുപോകുകയും ചെയ്തു . സെറ്റ് പൊളിച്ചുമാറ്റിയതുമുള്‍പ്പെടെ ലക്ഷങ്ങളുടെ നഷ്ടമാണ് നിര്‍മാതാക്കള്‍ക്ക് ഉണ്ടായത്.
കഴിഞ്ഞ ദിവസം ഡി കാറ്റഗറിയിലുള്ള തൊടുപുഴയിലെ കുമാര മംഗലം പഞ്ചായത്തില്‍ നടത്തിയ ഷൂട്ടിങ് നാട്ടുകാര്‍ തടഞ്ഞിരുന്നു. പോലീസ് ഇടപെട്ട് ഷൂട്ടിംഗ് നിര്‍ത്തിവെക്കുകയും ചെയ്തു. എന്നാല്‍ ചിത്രീകരണത്തിന് അനുമതിയുണ്ട് എന്ന് വ്യക്തമായത്തോടെ പോലീസ് സംരക്ഷണയിലാണ് ഷൂട്ടിംഗ് വിജയകരമായ് പൂര്‍ത്തിയാക്കിയത്.
അങ്ങനെ സംഭവബഹുലമായ ചിത്രീകരണം ഒരു വര്‍ഷവും ഏഴ് മാസവും മൂന്ന് ദിവസവും എടുത്താണ് പൂര്‍ത്തികരിച്ചത്.
ഗോദയ്ക്ക് ശേഷം ടൊവീനോ തോമസിനെ നായകനാക്കി ബേസില്‍ ജോസഫ് സംവിധാനം ചെയ്യുന്ന രണ്ടാമത്തെ ചിത്രമാണ് മിന്നല്‍ മുരളി. മലയാളത്തിനു പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും ചിത്രം എത്തും. മിസ്റ്റര്‍ മുരളിയെന്നാണ് ഹിന്ദി പതിപ്പിന്റെ പേര്. മെരുപ്പ് മുരളിയെന്ന് തെലുങ്ക് പതിപ്പിനും മിഞ്ചു മുരളിയെന്ന് കന്നഡ പതിപ്പിനും പേരിട്ടിരിക്കുന്നു.
വീക്കെന്‍ഡ് ബ്ലോക്ക്ബസ്റ്റേഴ്സിന്റെ ബാനറില്‍ സോഫിയ പോള്‍ ആണ് നിര്‍മാണം. ചിത്രത്തില്‍ ടോവിനോയെ കൂടാതെ അജു വര്‍ഗീസ്, ബൈജു, ഹരിശ്രീ അശോകന്‍, ഫെമിന ജോര്‍ജ് തുടങ്ങിയവരും പ്രധാന കഥാപാത്രങ്ങളില്‍ എത്തുന്നുണ്ട്. അരുണ്‍ അനിരുദ്ധന്‍, ജസ്റ്റിന്‍ മാത്യു എന്നിവരാണ് ചിത്രത്തിന്റെ രചന നിര്‍വഹിച്ചിരിക്കുന്നത്. ടൊവിനോയുടെ കരിയറിലെ ഏറ്റവും വലിയ ബജറ്റില്‍ ഒരുക്കിയിരിക്കുന്ന ചിത്രം കൂടിയാണിത്.
Recent Comments