ഒരു വയനാടന്‍ പ്രണയകഥ എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. പ്രശസ്ത നടീനടന്മാരുടെ ഫേസ്ബുക്ക് പേജ് മുഖേനയാണ് പോസ്റ്റര്‍ റിലീസ് ചെയ്തത്.
കൗമാര മനസ്സുകളുടെ പ്രണയ ചാപല്യങ്ങള്‍ സ്‌കൂള്‍ തലങ്ങളില്‍ നിന്നാണ് ആരംഭിക്കുന്നത്. കൂടെ പഠിക്കുന്ന ഒരു പെണ്‍കുട്ടിയോട് തോന്നുന്ന ആദ്യ അനുരാഗത്തിന്റെ വേളയില്‍, നായകന് വന്നുചേരുന്ന അബദ്ധങ്ങളും ഇണക്കങ്ങളും പിണക്കങ്ങളുമെല്ലാം കോര്‍ത്തിണക്കിയാണ് സിനിമ.
വയനാടിന്റെ ഹരിതാഭയാര്‍ന്ന പശ്ചാത്തലത്തില്‍ കുളിര്‍മയോടു കൂടിയ ഒരു പ്രണയകഥ അണിയിച്ചൊരുക്കി സംവിധാനം ചെയ്തിരിക്കുന്നത് ഇല്യാസ് മുടങ്ങാശ്ശേരിയാണ്. രചനയും ഇല്യാസ് തന്നെ നിര്‍വഹിക്കുന്നു.
എംകെ പ്രൊഡക്ഷന്‍സിന്റെ ബാനറില്‍ ലത്തീഫ് കളമശ്ശേരി, ഇല്യാസ് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. പുതുമുഖങ്ങളായ ജീസജ് ആന്റണി നായകനായും ജൂഹി നായികയായും എത്തുന്നു.
ഒരു വയനാടന്‍ പ്രണയകഥയ്ക്ക് ഛായാഗ്രഹണം നിര്‍വ്വഹിച്ചിരിക്കുന്നത് മധുമാടശ്ശേരിയാണ്. മെലഡിയുടെ മാന്ത്രിക സ്പര്‍ശമുള്ള ഗാനം വിജയ് യേശുദാസ് ആലപിച്ചിരിക്കുന്നു. ലെജിന്‍ ചെമ്മാനി എഴുതിയ ഗാനങ്ങള്‍ക്ക് മുരളി അപ്പാടത്ത് സംഗീതം പകര്‍ന്നു. പിആര്‍ഒ എംകെ ഷെജിന്‍ ആലപ്പുഴ.
Recent Comments