ഇതിനേക്കാളും മികച്ചൊരു പിറന്നാള്‍ സമ്മാനം ജയസൂര്യയ്ക്ക് കിട്ടാനുണ്ടാവില്ല, ജോഷി-ജയസൂര്യ ചിത്രം. ജയസൂര്യയുടെ 42-ാം പിറന്നാള്‍ ദിനത്തില്‍ കാവ്യ ഫിലിംസ് തന്നെയാണ് ഈ അനൗണ്‍സ്‌മെന്റ് പുറത്ത് വിട്ടിരിക്കുന്നത്. മാമാങ്കത്തിനുശേഷം കാവ്യ ഫിലിംസിന്റെ ബാനറില്‍ വേണു കുന്നംപിള്ളി നിര്‍മ്മിക്കുന്ന രണ്ടാത്തെ ചിത്രം കൂടിയാണിത്. ചിത്രത്തിന് പേരിട്ടിട്ടില്ല. നിഷാദ് കോയയാണ് ചിത്രത്തിനുവേണ്ടി കഥയും തിരക്കഥയും സംഭാഷണവും എഴുതുന്നത്. ബാദുഷയാണ് പ്രോജക്ട് ഡിസൈനര്‍. ദുബായിലും കേരളത്തിലുമായി ചിത്രീകരണം പ്ലാന്‍ ചെയ്യുന്ന സിനിമയുടെ ഷൂട്ടിംഗ് അടുത്തവര്‍ഷം ജനുവരിയില്‍ നടക്കും.
ജയസൂര്യയെ നായകനാക്കി ജോഷി സംവിധാനം ചെയ്യുന്ന ആദ്യ ചിത്രം കൂടിയാണിത്. ഇതിനുമുമ്പ് റോബിന്‍ ഹുഡിലെ എ.സി.പി. ഹാരിസ് മുഹമ്മദിന്റെ വേഷവും താരസംഘടനയായ അമ്മയ്ക്കുവേണ്ടി ഒരുക്കിയ ട്വന്റി20 യിലെ അതിഥിവേഷവുമൊഴിച്ചാല്‍ മറ്റൊരു ജോഷി ചിത്രത്തിലും ജയസൂര്യ അഭിനയിച്ചിട്ടില്ല.
Recent Comments