യോദ്ധയ്ക്ക് ശേഷം നേപ്പാളിന്റെ പശ്ചാത്തലത്തില്‍ ഒരു ചിരിചിത്രം അണിഞ്ഞൊരുങ്ങുന്നു- തിരിമാലി. നവാഗതനായ രാജീവ് ഷെട്ടി സംവിധാനം ചെയ്യുന്ന ഈ ചിത്രം നിര്‍മ്മിക്കുന്നത് എസ്.കെ. ലോറന്‍സാണ്. ശിക്കാരി ശംഭുവിനു ശേഷം ഏയ്ഞ്ചല്‍ മരിയാ സിനിമാസിന്റെ ബാനറില്‍ നിര്‍മ്മിക്കുന്ന ഈ ചിത്രത്തിന്റെ ആദ്യഘട്ട ചിത്രീകരങ്ങള്‍ നേപ്പാളിലും കുളു മണാലിയുമായി പൂര്‍ത്തിയായി. തിരിമാലിയുടെ അടുത്ത ലൊക്കേഷന്‍ കൊച്ചിയാണ്.
ബിബിന്‍ ജോര്‍ജ്, ധര്‍മ്മജന്‍ ബോള്‍ഗാട്ടി, ജോണി ആന്റണി എന്നിവര്‍ ഈ ചിത്രത്തിലെ കേന്ദ്ര കഥാപാതങ്ങളെ അവതരിപ്പിക്കുന്നു. സലിംകുമാര്‍, ഇന്നസന്റ്, സോഹന്‍ സീനുലാല്‍, കൊച്ചുപ്രേമന്‍, നസീര്‍ സംക്രാന്തി, അസീസ് പാലക്കാട്, തെസ്‌നി ഖാന്‍ തുടങ്ങിയവരും താരനിരയിലുണ്ട്. അന്നാ രേഷ്മരാജനാണ് നായിക.
‘കേരളത്തില്‍ ചെറുകിട ലോട്ടറി കച്ചവടം നടത്തുന്ന ബേബി എന്ന യുവാവും തന്റെ ആത്മ സ്‌നേഹിതനായ പീറ്ററും പലിശക്കാരനായ അലക്‌സാണ്ടറും ഒന്നിച്ച് നേപ്പാളിലേക്കു ഒരു യാത്ര പോകേണ്ടി വന്നു. ആ യാത്രയില്‍ അവര്‍ക്ക് നേരിടേണ്ടിവരുന്ന സംഭവങ്ങള്‍ രസകരമായി അവതരിപ്പിക്കുന്നതാണ് ചിത്രം.
ബേബിയെ ബിബിന്‍ ജോര്‍ജും പീറ്ററിനെ ധര്‍മ്മജന്‍ ബോള്‍ഗാട്ടിയും അലക്‌സാണ്ടറെ ജോണി ആന്റണിയും അവതരിപ്പിക്കുന്നു. നേപ്പാളിലെ നായിക സ്വസ്തിമാ കട്ക ഈ ചിത്രത്തിലെ സുപ്രധാനമായ ഒരു കഥാപാത്രത്തെ അവതരിപ്പിക്കുന്നു.
സേവ്യര്‍ അലക്‌സും രാജീവ് ഷെട്ടിയും ചേര്‍ന്നാണ് തിരക്കഥ രചിക്കുന്നത്. ഒരു ഹിന്ദി ഗാനമുള്‍പ്പടെ നാലു ഗാനങ്ങളാണ് ഈ ചിത്രത്തിലുണ്ട്. പ്രശസ്ത ബോളിവുഡ് ഗായികയായ സുനി ഡി ചൗഹാനാണ് ഹിന്ദി ഗാനം ആലപിക്കുന്നത്. ഗാനങ്ങള്‍ അജീഷ് ദാസ്, സംഗീതം ബിജിപാല്‍.
ഫൈസല്‍ അലി ഛായാഗ്രഹണവും വി. സാജന്‍ എഡിറ്റിംഗും നിര്‍വ്വഹിക്കുന്നു.
കലാസംവിധാനം അഖില്‍രാജ്, മേക്കപ്പ് റോണക്‌സ് സേവ്യര്‍, കോസ്റ്റ്യും ഡിസൈന്‍ ഇര്‍ഷാദ് ചെറുകുന്ന്, അസ്സോസ്സിയേറ്റ് ഡയറക്ടേഴ്‌സ് മനേഷ് ബാലകൃഷ്ണന്‍, രതീഷ് മൈക്കിള്‍. പ്രൊജക്ട് ഡിസൈനര്‍ ബാദ്ഷ, പ്രൊഡക്ഷന്‍ കണ്‍ട്രോളര്‍ ശ്രീകുമാര്‍ ചെന്നിത്തല, വാര്‍ത്താപ്രചരണം വാഴൂര്‍ ജോസ്.
Recent Comments