ബിജുമേനോന്റെ പിറന്നാള്‍ ദിനത്തോടനുബന്ധിച്ചാണ് ലളിതം സുന്ദരം എന്ന ചിത്രത്തിന്റെ ഫസ്റ്റ് ലുക്ക് പോസ്റ്ററും റിലീസ് ചെയ്തത്.
പോസ്റ്ററില്‍ ബിജുമേനോനും, മഞ്ജുവാര്യരും സൈജു കുറുപ്പും ദീപ്തി സതിയും അനുമോഹനുമാണുള്ളത്. വീട്ടുകലഹം കഴിഞ്ഞ പ്രതീതി ഉണര്‍ത്തുന്നുണ്ട് ആ ചിത്രം. ആദ്യ കാഴ്ചയില്‍തന്നെ ആരുടെ ഉള്ളിലും ഒരു ചിരി പടര്‍ത്തും.
ഫസ്റ്റ് ലുക്ക് പോസ്റ്റര്‍ കണ്ട ഉടനെ സംവിധായകന്‍ മധുവാര്യരെ വിളിച്ചു. അദ്ദേഹം അപ്പോള്‍ എറണാകുളത്തുണ്ടായിരുന്നു. ഫസ്റ്റ് ലുക്ക് പോസ്റ്റര്‍ പുറത്തു വിട്ടതിനു പിന്നാലെ അഭിനന്ദന പ്രവാഹമാണ്. നേരിട്ടും മെസ്സേജുകള്‍ വഴിയും.
‘സിനിമയില്‍തന്നെയുള്ള ഒരു സീനിന്റെ അതിഭാവുകത്വം നിറഞ്ഞ വേര്‍ഷനാണ് ഫസ്റ്റ് ലുക്ക് പോസ്റ്ററില്‍ കൊടുത്തിരിക്കുന്നത്. ഇതിനുവേണ്ടി ഒരു പ്രത്യേക ഫോട്ടോഷൂട്ടും നടത്തിയിരുന്നു. കാഴ്ചക്കാരന്റെ ഭാവനയ്ക്കനുസരിച്ച് അതിനെ ഏതുവിധത്തില്‍ വേണമെങ്കിലും വ്യാഖ്യാനിക്കാം. അതവരുടെ സ്വാതന്ത്ര്യത്തിന് വിടുന്നു. റിലീസിന് എത്തുന്നതിമുമ്പായി ലളിതം സുന്ദരം എന്താണ് പറയുന്നതെന്ന് ഞങ്ങള്‍ വ്യക്തമാക്കിയിരിക്കും.’ മധുവാര്യര്‍ പറയുന്നു.
‘ഹ്യൂമറിന് പ്രാധാന്യമുള്ള ചിത്രം തന്നെയാണ്. പക്ഷേ സ്ലാപ്സ്റ്റിക് കോമഡിയാവില്ല. സന്ദര്‍ഭം ആവശ്യപ്പെടുന്ന നര്‍മ്മം അതിലുണ്ടായിരിക്കും. ഇത്തിരി ജോലികള്‍കൂടി അവശേഷിക്കുന്നുണ്ട്. അതിനുശേഷമേ റിലീസിനെ കുറിച്ച് ആലോചിക്കുന്നുള്ളൂ. തീയേറ്ററും ഒടിടിയും സാറ്റ്‌ലൈറ്റുമടക്കം എല്ലാ സാധ്യതകളും ഞങ്ങള്‍ ഇപ്പോള്‍ പരിഗണിക്കുന്നുണ്ട്.’ മധു പറഞ്ഞു.
മധുവാര്യര്‍ ആദ്യമായി സംവിധാനം ചെയ്യുന്ന ചിത്രം കൂടിയാണ് ലളിതം സുന്ദരം. സഹോദരി കൂടിയായ മഞ്ജുവാര്യരാണ് ഇതിന്റെ നിര്‍മ്മാതാവ്. നീണ്ട വര്‍ഷങ്ങള്‍ക്കുശേഷം ബിജുമേനോനും മഞ്ജുവാര്യരും ഒന്നിക്കുന്നുവെന്ന പ്രത്യേകതയും ഈ ചിത്രത്തിനുണ്ട്. സുധീഷ്, രഘുനാഥ് പലേരി, വിനോദ് തോമസ്, സറീനാ വഹാബ്, ആശാ അരവിന്ദ്, അഞ്ജന അപ്പുക്കുട്ടന്‍, മാസ്റ്റര്‍ അശ്വിന്‍ വാര്യര്‍, ബേബി തെന്നല്‍ അഭിലാഷ് എന്നിവരാണ് മറ്റ് അഭിനേതാക്കള്‍. പി. സുകുമാറും ഗൗരിശങ്കറും ഛായാഗ്രഹണം നിര്‍വ്വഹിക്കുന്ന ചിത്രത്തിന് തിരക്കഥ എഴുതുന്നത് പ്രമോദ് മോഹനാണ്.
Recent Comments