നാടകനടനും ചലച്ചിത്ര നടനുമായ രിസബാവ അന്തരിച്ചു. 54 വയസ്സായിരുന്നു പ്രായം. ആസ്റ്റര്‍ മെഡി സിറ്റിയില്‍വച്ചായിരുന്നു അന്ത്യം. രണ്ട് ദിവസം മുമ്പ് സ്‌ട്രോക്ക് വന്നതിനെത്തുടര്‍ന്ന് ആശുപ്രത്രിയില്‍ പ്രവേശിപ്പിച്ചിരുന്നു. അസുഖം മൂര്‍ച്ഛിച്ചതിനെത്തുടര്‍ന്ന് വെന്റിലേറ്ററില്‍ പ്രവേശിപ്പിക്കുകയായിരുന്നു. അരമണിക്കൂര്‍ മുമ്പാണ് ഡോക്ടര്‍മാര്‍ അദ്ദേഹത്തിന്റെ മരണം സ്ഥിരീകരിച്ചത്. മകളും മരുമകനും ആശുപത്രിയില്‍തന്നെയുണ്ട്. അല്‍പ്പസമയത്തിനകം മൃതദേഹം ബന്ധുക്കള്‍ക്ക് വിട്ടുകൊടുക്കും.
യഥാര്‍ത്ഥ പേര്‍ രിസബാവ എന്നായിരുന്നു. അദ്ദേഹത്തിന്റെ സിനിമാപ്രവേശന കാലം മുതല്‍ക്ക് മാധ്യമങ്ങള്‍ അടക്കം റിസബാവ എന്നാണ് എഴുതിയിരുന്നത്. ചില അഭിമുഖങ്ങളില്‍ അദ്ദേഹം തുറന്ന് പറഞ്ഞിട്ടുണ്ടെങ്കിലും ആരും അത് തിരുത്താന്‍ തയ്യാറായിരുന്നില്ല. അങ്ങനെ റിസബാവയായിത്തന്നെ തുടര്‍ന്നു.
ഷാജി കൈലാസ് സംവിധാനം ചെയ്ത പശുപതിയിലൂടെയാണ് സിനിമയിലേയ്ക്കുള്ള അരങ്ങേറ്റം. ഇന്‍ ഹരിഹര്‍ നഗറിലിലെ ജോന്‍ ഹോനായ് എന്ന കഥാപാത്രത്തിലൂടെയാണ് അദ്ദേഹത്തിന്റെ കരിയര്‍ ബ്രേക്കുണ്ടാകുന്നത്. തുടര്‍ന്ന് 120 ല്‍ പരം ചിത്രങ്ങളില്‍ അദ്ദേഹം അഭിനയിച്ചു. മമ്മൂട്ടിയുടെ വണ്ണാണ് അദ്ദേഹത്തിന്റേതായി പുറത്തിറങ്ങിയ അവസാനത്തെ ചലച്ചിത്രം. ഇടക്കാലത്ത് അദ്ദേഹം സീരിയലുകളിലും അഭിനയിച്ചിട്ടുണ്ട്.
Recent Comments