വരാനിരിക്കുന്ന മോഹന്‍ലാല്‍ ചിത്രങ്ങളുടെ പട്ടിക പുറത്ത് വിട്ടിരിക്കുകയാണ് ആശിര്‍വാദ് സിനിമാസ്. സിനിമയും അവയുടെ റിലീസ് തീയതിയും ഉള്‍പ്പെടെയുള്ള വിവരങ്ങള്‍ ഉള്‍പ്പെട്ടുന്ന ഒരു വീഡിയോയാണ് പുറത്തിറക്കിയിരിക്കുന്നത്. ഈ വര്‍ഷം അവസാനം റിലീസ് ചെയ്യുന്ന ബറോസ് മുതല്‍ അടുത്ത വര്‍ഷം ഒക്ടോബറില്‍ റിലീസ് ചെയ്യാനിരിക്കുന്ന ചിത്രം വൃഷഭ വരെയുള്ള സിനിമകളാണ് പട്ടികയിലുള്ളത്. ബറോസ്, തുടരും, എമ്പുരാന്‍, ഹൃദയപൂര്‍വ്വം, വൃഷഭ എന്നീ ചിത്രങ്ങളെക്കുറിച്ചുള്ള വിവരങ്ങളാണ് വീഡിയോയില്‍ ഉള്ളത്.
ക്രിസ്മസ് ദിനമായ ഡിസംബര്‍ 25 ന് റിലീസ് ചെയ്യാനൊരുങ്ങുന്ന ‘ബറോസ്’ ആണ് പട്ടികയില്‍ ആദ്യം ഇടം നേടിയത്. മോഹന്‍ലാല്‍ ആദ്യമായി സംവിധാനം ചെയ്യുന്ന ഫാന്റസി ത്രില്ലര്‍ ചിത്രം കൂടിയാണ് ബറോസ്. മോഹന്‍ലാല്‍-ശോഭന ജോഡികളായി ഒന്നിക്കുന്ന, തരുണ്‍മൂര്‍ത്തി ചിത്രം തുടരും 2025 ല്‍ ആദ്യം റിലീസ് ചെയ്യുന്ന മോഹന്‍ലാല്‍ ചിത്രം. മലയാളം ഇതുവരെ കേട്ടിട്ടില്ലാത്ത വന്‍ ബജറ്റില്‍ ഒരുങ്ങുന്ന എമ്പുരാന്‍ മാര്‍ച്ച 27 നാണ് തീയേറ്ററുകളില്‍ എത്തുക. പൃഥ്വിരാജ് സംവിധാനം ചെയ്യുന്ന ചിത്രത്തില്‍ ടൊവിനോ തോമസ്, മഞ്ജുവാര്യര്‍, പൃഥ്വിരാജ് തുടങ്ങി ഒട്ടനവധി താരങ്ങള്‍ അണിനിരക്കുന്നുണ്ട്.
അടുത്തത് സത്യന്‍ അന്തിക്കാട് സംവിധാനം ചെയ്യുന്ന ഹൃദയപൂര്‍വ്വം ആഗസ്റ്റ് 28 ന് തീയേറ്ററുകളിലെത്തും. ഒരിടവേളയ്ക്കുശേഷം സത്യന്‍ അന്തിക്കാടും മോഹന്‍ലാലും ഒന്നിക്കുന്ന ചിത്രം കൂടിയാണിത്.
മോഹന്‍ലാലിനെ നായകനാക്കി നന്ദകിഷോര്‍ സംവിധാനം ചെയ്യുന്ന വൃഷഭയാണ് അടുത്തത്. ചിത്രം 2025 ഒക്ടോബര്‍ 16 ന് റിലീസ് ചെയ്യും. 200 കോടി ബജറ്റിലൊരുങ്ങുന്ന ചിത്രമാണ് വൃഷഭ. സഹ്‌റ എസ്. ഖാന്‍ ആണ് നായിക. പുലിമുരുകനുശേഷം പീറ്റര്‍ ഹെയ്‌നും മോഹന്‍ലാലും ഒന്നിക്കുന്ന ചിത്രം കൂടിയാണ് വൃഷഭ.
Recent Comments