നടനും മുന്‍ എം.പിയുമായ ഇന്നസെന്റ് അന്തരിച്ചു. അല്‍പ്പം മുമ്പ് കൊച്ചിയിലെ ലേക്ക് ഷോര്‍ ആശുപത്രിയില്‍വച്ചായിരുന്നു അന്ത്യം. 75 വയസ്സായിരുന്നു. എട്ട് വര്‍ഷം മുമ്പ് കാന്‍സര്‍ ബാധിതനായ ഇന്നസെന്റ് അതിനെ അതിജീവിച്ച് ജീവിതത്തിലേയ്ക്ക് തിരിച്ചെത്തിയിരുന്നു. അടുത്തിടെ കൊറോണ ബാധിച്ചത് അദ്ദേഹത്തിന്റെ ശാരീരാവസ്ഥകളെ മോശമായി ബാധിച്ചിരുന്നു. അതിനെത്തുടര്‍ന്നാണ് ചികിത്സ തേടി ലേക്ക് ഷോര്‍ ഹോസ്പിറ്റലില്‍ എത്തിത്. വെന്റിലേറ്ററിലായിരുന്ന ഇന്നസെന്റിന്റെ നില കഴിഞ്ഞ ദിവസമാണ് അതീവ ഗുരുതരാവസ്ഥയിലേയ്ക്ക് നീങ്ങിയത്. ജീവന്‍ രക്ഷാ ഉപകരണങ്ങളുടെ സഹായത്തോടെയാണ് ജീവന്‍ നിലനിര്‍ത്തിയിരുന്നത്. ഇന്ന് രാത്രി പത്തരയോടെ അന്ത്യം സംഭവിക്കുകയായിരുന്നു.
ഇന്നസെന്റിന്റെ മൃതശരീരം നാളെ കാലത്ത് 8.00 മുതല്‍ 11.00 മണിവരെ എറണാകുളത്ത് കടവന്തറയിലെ രാജീവ്ഗാന്ധി ഇന്‍ഡോര്‍ സ്‌റ്റേഡിയത്തില്‍ പൊതുദര്‍ശനത്തിന് വയ്ക്കും. അതിനുശേഷം സ്വദേശമായ ഇരിങ്ങാലക്കുടയിലേയ്ക്ക് കൊണ്ടുപോകും. ഉച്ചയ്ക്ക് 1.00 മണി മുതല്‍ വൈകിട്ട് 3.30 വരെ ഇരിങ്ങാലക്കുട മുന്‍സിപ്പല്‍ ഠൗണ്‍ഹാളിലും തുടര്‍ന്ന് സ്വവസതിയായ പാര്‍പ്പിടത്തിലും പൊതുദര്‍ശനത്തിന് വയ്ക്കും. 5.00 മണിക്ക് സെന്റ് തോമസ് കത്തീഡ്രല്‍ ദേവാലയത്തില്‍വച്ചാണ് ശവസംസ്‌കാരം നടക്കുന്നത്.
Recent Comments