നടന് മധുവിന് ഇന്ന്(സെപ്റ്റംബര്‍ 23) 91-ാം പിറന്നാള്‍. ജന്മദിനത്തോടനുബന്ധിച്ച് മലയാളത്തിലെ മഹാനടന്റെ സമഗ്ര ചരിത്രവും വിശേഷങ്ങളും ഉള്‍പ്പെടുത്തി ഒഫീഷ്യല്‍ വെബ് സൈറ്റ് പുറത്തിറക്കി. നടന്റെ ജീവചരിത്രവും സിനിമയിലേക്കുള്ള സംഭാവനകളും ഉള്‍പ്പെടുത്തി madhutheactor.com എന്ന വെബ്‌സൈറ്റ് നടന് മമ്മൂട്ടിയാണ് ഉദ്ഘാടനം ചെയ്തത്.
നടന് ഇതുവരെ ലഭിച്ച അവാര്‍ഡുകള്‍, അഭിനയിച്ച സിനിമയിലെ പോസ്റ്ററുകള്‍, ഹിറ്റ് ഗാനങ്ങള്‍, മികച്ച അഭിമുഖങ്ങള്‍ ഇവയെല്ലാം വെബ്‌സൈറ്റില്‍ ഉള്‍പ്പെടുത്തിയിട്ടുണ്ട്. മമ്മൂട്ടി, മോഹന്‍ലാല്‍, കമല്‍ഹാസന്‍, ശ്രീകുമാരന്‍ തമ്പി, എം ടി വാസുദേവന്‍ നായര്‍, ഷീല, ശാരദ, സീമ തുടങ്ങിയവര്‍ മധുവിനെ കുറിച്ചെഴുതിയ കുറിപ്പും ഉള്‍പ്പെടുത്തിയിട്ടുണ്ട്.
വെബ്‌സൈറ്റിന്റെ ലിങ്ക് സമൂഹമാദ്ധ്യമങ്ങളിലൂടെ പ്രശസ്ത മാധ്യമപ്രവര്‍ത്തകന്‍ ബൈജു ചന്ദ്രനും ഫെയ്‌സ്ബുക്കിലൂടെ പുറത്ത് വിട്ടിരുന്നു. ‘മലയാളത്തിന്റെ അന്തസ്സും അഭിമാനവുമായ വിഖ്യാത നടന് മധുവിന്റെ ജന്മദിനമായ ഇന്ന്, അദ്ദേഹത്തിന്റെ കലാ ജീവിതത്തെ സംബന്ധിക്കുന്ന വെബ്‌സൈറ്റ് പൊതുസമക്ഷത്തിലേക്ക് എത്തുകയാണ്. അപൂര്‍വമായ ചിത്രങ്ങള്‍, ഹിറ്റ് ഗാനങ്ങള്‍, ജീവചരിത്രം, അഭിമുഖ സംഭാഷണങ്ങള്‍, ലേഖനങ്ങള്‍ തുടങ്ങിയവയെല്ലാം ചേര്‍ന്ന് ആ മഹാപ്രതിഭയുടെ ജീവിതത്തിലൂടെയുള്ള സമഗ്രമായ ഒരു സഞ്ചാരമാണ് ഈ വെബ്‌സൈറ്റ്. മധു സാറിന്റെ പുത്രി ഉമയും ജീവിത പങ്കാളി കൃഷ്ണ കുമാറും ചേര്‍ന്നു തയ്യാറാക്കിയ വെബ്‌സൈറ്റിന്റെ ലിങ്ക് ഞാന്‍ അഭിമാനത്തോടെ സമര്‍പ്പിക്കുന്നു. ഒപ്പം മധു സാറിന് എല്ലാ ആയുരാരോഗ്യസൗഖ്യങ്ങളും നേരുകയും ചെയ്യുന്നു’ -ബൈജു ചന്ദ്രന്‍ കുറിച്ചു.
ഒരിക്കലും അടങ്ങാത്ത കടലിലെ ഓളം പോലെ മനസില്‍ നിറയെ സ്വപ്നങ്ങളുമായി പുറക്കാട് കടപ്പുറത്ത് കറുത്തമ്മയെ തേടിയെത്തിയ പരീക്കുട്ടി എന്ന ദുരന്ത കാമുകന്‍ മലയാള സിനിമാ പ്രേക്ഷകരുടെ ഹൃദയത്തിലേക്കാണ് നടന്നു കയറിയത്. പ്രണയ നൈരാശ്യത്തെ ഇന്നും മലയാളികള്‍ ഓര്‍ക്കുന്നത് പരീക്കുട്ടിയിലൂടെയാണ്.
കാമുകനില്‍ ആരംഭിച്ച് മുത്തച്ഛനില്‍ വരെ എത്തി നില്‍ക്കുമ്പോഴും മധുവിനെ ഇരുകയ്യും നീട്ടിയാണ് പ്രേക്ഷകര്‍ സ്വീകരിച്ചിട്ടുള്ളത്. മധുവിന്റെ ജീവിതം കാമറയ്ക്കുമുന്നില്‍ മാത്രം ഒതുങ്ങി നില്‍ക്കുതായിരുന്നില്ല. സംവിധായകന്‍, നിര്‍മാതാവ്, സ്റ്റുഡിയോ ഉടമ, സ്‌കൂള്‍ ഉടമ, കര്‍ഷകന്‍ തുടങ്ങിയ റോളുകളിലും തിളങ്ങിയിട്ടുണ്ട്.
Recent Comments