ഹൃതിക് റോഷന്‍, ദീപിക പാദുക്കോണ്‍ എന്നിവരെ പ്രധാന കഥാപാത്രങ്ങളാക്കി സിദ്ധാര്‍ഥ് ആനന്ദ് സംവിധാനം ചെയ്യുന്ന ചിത്രമായ ഫൈറ്ററിന്റെ റിലീസ് തിയതി പ്രഖ്യാപിച്ചു. 26 ജനുവരി 2023 നാണ് ചിത്രം പ്രദര്‍ശനത്തിനെത്തുക. ബോളിവുഡിലെ ആദ്യത്തെ ഏരിയല്‍ ആക്ഷന്‍ സിനിമയായിരിക്കും ഫൈറ്റര്‍. നായകനും നായികയ്ക്കും ഒരുപോലെ പ്രാധാന്യമുള്ള ചിത്രം ലോകമെമ്പാടുമുള്ള പ്രേക്ഷകരെ മുന്നില്‍ക്കണ്ടുള്ള വലിയ ക്യാന്‍വാസിലായിരിക്കും ഒരുക്കുക.
അടുത്തിടെ ഹൃതിക് റോഷന്‍ തന്റെ ഇന്‍സ്റ്റാഗ്രാമിലൂടെ സംവിധായകന്‍ സിദ്ധാര്‍ഥും ഒപ്പം ദീപികയും ഒത്തുള്ള ചിത്രം പങ്കുവെച്ചിരുന്നു. ‘ദിസ് ഗാങ് ഈസ് റെഡി ടു ടേക്ക് ഓഫ്’ എന്ന ടാഗോടെ പുറത്ത് വിട്ട ചിത്രം വളരെ ആകാംഷയോടെയാണ് ആരാധകര്‍ സ്വീകരിച്ചത്. കോവിഡ് കാരണം സിനിമയുടെ ചിത്രീകരണം വൈകിയിരുന്നു. ദീപിക പദുക്കോണും ഹൃതിക് റോഷനും ആദ്യമായി ഒന്നിക്കുന്ന ചിത്രം കൂടിയാണിത്.
വൈകോം 18 സ്റ്റുഡിയോസ്, മംമ്ത ആനന്ദ്, രാമണ്‍, ചിബ്ബ്, അങ്കു പാണ്ഡെ എന്നിവരാണ് ചിത്രം നിര്‍മിക്കുന്നത്. ഹൃതിക് നായകനായ ‘ബാങ് ബാങ്’ ‘വാര്‍’ എന്നീ ഹിറ്റ് ചിത്രങ്ങളുടെ സംവിധായകനാണ് സിദ്ധാര്‍ഥ്. ഇപ്പോള്‍ ഷാരൂഖ് ഖാന്‍ -ജോണ്‍ എബ്രഹാം ചിത്രമായ ‘പത്താന്റെ’ ചിത്രീകാരണ തിരക്കിലാണ് അദ്ദേഹം.
Recent Comments