മോഹന്‍ലാലും റോഷന്‍ മേക്കയും പ്രധാന വേഷങ്ങളിലെത്തുന്ന വൃഷഭയുടെ ആദ്യ ഷെഡ്യുള്‍ മൈസൂരില്‍ പൂര്‍ത്തിയായി. 2023 ജൂലൈ 25നാണ് ഷൂട്ടിംഗ് ആരംഭിച്ചത്. മോഹന്‍ലാലും റോഷന്‍ മേക്കയും സഹ്റ എസ്. ഖാനും ഷാനയ കപൂറും പങ്കെടുത്ത രംഗങ്ങളാണ് ചിത്രീകരിച്ചത്.
‘ഞങ്ങള്‍ പ്രതീക്ഷിച്ചതിലും കൂടുതല്‍ നേടാന്‍ ആദ്യ ഷെഡ്യൂളില്‍തന്നെ സാധിച്ചതില്‍ സന്തോഷമുണ്ട്. അതിനുവേണ്ടി കഠിനാദ്ധ്വാനം ചെയ്ത മുഴുവന്‍ പ്രൊഡക്ഷന്‍ ടീമിനും നന്ദി പറയുന്നു. പ്രധാന അഭിനേതാക്കളായ മോഹന്‍ലാല്‍ സാര്‍, റോഷന്‍, ഷാനയ, ശ്രീകാന്ത്, രാഗിണി എന്നിവര്‍ തിരക്കേറിയ ഷൂട്ടിംഗ് ഷെഡ്യൂളുകള്‍ക്കിടയിലും രാപ്പകലില്ലാതെ പ്രയത്‌നിച്ചു. പുലിമുരുകനു ശേഷം മോഹന്‍ലാല്‍ സാറും പീറ്റര്‍ ഹെയ്‌നും വീണ്ടുമൊന്നിക്കുന്നുവെന്നതാണ് ഈ ചിത്രത്തിന്റെ മറ്റൊരു ഹൈലൈറ്റ്. ഇന്ത്യന്‍ സിനിമയിലെ ഏറ്റവും വലിയ ആക്ഷന്‍ സീക്വന്‍സുകളില്‍ ഒന്ന് ഇരുവരും ഒരുക്കുകയും ചെയ്തു.’ സംവിധായകന്‍ നന്ദകിഷോര്‍ പറഞ്ഞു.
വൃഷഭ പൂര്‍ത്തിയാക്കി ലാല്‍ ഊട്ടിയിലെത്തി. സെപ്തംബര്‍ ഒന്നിന് ‘നേരി’ല്‍ ജോയിന്‍ ചെയ്യും. ജീത്തുജോസഫ് സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് ഇപ്പോള്‍ തിരുവനന്തപുരത്ത് പുരോഗമിച്ചുകൊണ്ടിരിക്കുകയാണ്. ആന്റണി പെരുമ്പാവുരാണ് നേര് നിര്‍മ്മിക്കുന്നത്.
Recent Comments