കോവിഡ് രണ്ടാംതരംഗത്തിനു ശേഷം തിയേറ്ററുകള്‍ തുറന്ന് ബോളിവുഡില്‍ നിന്നെത്തുന്ന ആദ്യ സൂപ്പര്‍താര ചിത്രമാണ് ബെല്‍ബോട്ടം. അതുകൊണ്ട് തന്നെ ഏറെ പ്രതീക്ഷയോടെയായിരുന്നു തിയേറ്റര്‍ ഉടമകള്‍ സിനിമയ്ക്കായി കാത്തിരുന്നത്. എന്നാല്‍ ഇപ്പോള്‍ ഏവരെയും ആശങ്കയിലാഴ്ത്തിക്കൊണ്ട് ചിത്രത്തിന്റെ വ്യാജപതിപ്പ് ഓണ്‍ലൈനില്‍ പ്രചരിച്ചുകൊണ്ടിരിക്കുകയാണ്. ചിത്രത്തിന്റെ എച്ച്ഡി നിലവാരമുള്ള പ്രിന്റുകളാണ് പല പൈറേറ്റഡ് സൈറ്റുകളിലും എത്തിയിരിക്കുന്നത്.
ഓഗസ്റ്റ് 19 നായിരുന്നു ചിത്രം റിലീസ് ചെയ്തത്. ആദ്യദിനത്തില്‍തന്നെ ഭേദപ്പെട്ട അഭിപ്രായമാണ് ചിത്രത്തിന് ലഭിച്ചത്. എന്നാല്‍ റിലീസ് ചെയ്ത് ഏതാനും മണിക്കൂറുകള്‍ക്കകം വ്യാജന്‍ പുറത്തിറങ്ങുകയായിരുന്നു. ഇതോടെ തിയേറ്റര്‍ കളക്ഷനെ അതേറെ ബാധിക്കുകയും ചെയ്തു.
രഞ്ജിത്ത് എം തിവാരി സംവിധാനം ചെയ്തിരിക്കുന്ന ബെല്‍ബോട്ടം സ്‌പൈ ആക്ഷന്‍ ത്രില്ലര്‍ വിഭാഗത്തില്‍ പെടുന്ന ഒന്നാണ്. എണ്‍പതുകള്‍ പശ്ചാത്തലമാക്കുന്ന ചിത്രത്തില്‍ വാണി കപൂര്‍ ആണ് നായിക. ഹുമ ഖുറേഷിയും ലാറ ദത്തയും മറ്റു രണ്ട് പ്രധാന കഥാപാത്രങ്ങളെ അവതരിപ്പിക്കുന്നു. ഡെന്‍സില്‍ സ്മിത്ത്, അനിരുദ്ധ ദവെ, ആദില്‍ ഹുസൈന്‍, തലൈവാസല്‍ വിജയ് തുടങ്ങിയവരും അഭിനയിക്കുന്നു. മലയാളിയായ രാജീവ് രവിയാണ് ഛായാഗ്രഹണം.
Recent Comments