രാഘവ ലോറന്‍സ് നായകനായി അഭിനയിച്ചു സംവിധാനം ചെയ്ത് വന്‍വിജയം നേടിയ തമിഴ് ചിത്രം ‘കാഞ്ചന’യുടെ ഹിന്ദി റീമേക്ക് ‘ലക്ഷ്മി ബോംബി’ന്റെ ആദ്യ ഗാന വീഡിയോ പുറത്തിറങ്ങി. അക്ഷയ് കുമാര്‍ നായകനാകുന്ന സിനിമ ലോറന്‍സ് തന്നെയാണ് ഹിന്ദിയിലും സംവിധാനം ചെയ്തിരിക്കുന്നത്. കിയാര അദ്വാനിയാണ് നായിക. ചിത്രം ദീപാവലി പ്രമാണിച്ച് നവംബര്‍ ഒന്‍പതിന് ഡിസ്നി പ്ലസ് ഹോട്ട്സ്റ്റാറിലൂടെ റിലീസ് ചെയ്യും.
‘ലക്ഷ്മി ബോംബി’ന്റെ ട്രെയ്ലര്‍ യു ട്യൂബില്‍ ഏതാനും ദിവസം മുമ്പ് പുറത്തിറങ്ങി വൈറലായതിനു പിന്നാലെ അണിയറക്കാര്‍ പുറത്തു വിട്ട, ‘ബുര്‍ജ് ഖലീഫ’ എന്ന ആദ്യ ഗാന വീഡിയോയും പ്രേക്ഷകര്‍ ഏറ്റെടുത്തുകഴിഞ്ഞിരിക്കുകയാണ്. അക്ഷയ് കുമാറും കിയാര അദ്വാനിയും തകര്‍ത്താടിയാണ് ഗ്ലാമറസായ ഈ ഗാനരംഗത്തില്‍ നൃത്ത ചുവടുകളാണുത്. വിവിധ വിദേശ രാജ്യങ്ങളില്‍ അവിടുത്തെ നയന മനോഹാരിതയുടെ പശ്ചാത്തലത്തിലാണ് ഈ ഗാനം ചിത്രീകരിച്ചിട്ടുള്ളത്.
തുഷാര്‍ കപൂര്‍, മുസ്ഖാന്‍ ഖുബ്ചന്ദാനി, ഷരദ് കേല്‍ക്കര്‍, തരുണ്‍ അറോറ, അശ്വിനി കല്‍സേക്കര്‍ എന്നിവരാണ് ലക്ഷ്മിബോംബിലെ മറ്റു അഭിനേതാക്കള്‍. അക്ഷയ്കുമാറിന്റെ ഇതിനു മുമ്പ് കണ്ടിട്ടില്ലാത്ത കഥാപാത്രമായിരിക്കും ‘ലക്ഷ്മി ബോംബി’ലേതെന്നാണ് അണിയറക്കാര്‍ അവകാശപ്പെടുന്നത്. അത് കൊണ്ടു തന്നെ ആരാധകര്‍ ചിത്രത്തിനായി ആകാംഷയോടെ കാത്തിരിക്കയാണ്. അക്ഷയ് കുമാറിന്റെ കേപ് ഓഫ് ഗുഡ് ഫിലിംസ്, ഷബീന ഖാന്‍, തുഷാര്‍ കപൂര്‍, ഫോക്‌സ് സ്റ്റാര്‍ സ്റ്റുഡിയോസ് എന്നിവര്‍ ചേര്‍ന്നാണ് നിര്‍മ്മാണം.
-സി.കെ. അജയ് കുമാര്‍, പി ആര്‍
Recent Comments