വേട്ടൈയ്യനില്‍ അഭിനയിച്ചതിന് ഒരു രൂപ പോലും തനിക്ക് പ്രതിഫലം ലഭിച്ചില്ലെന്ന് നടന്‍ അലന്‍സിയര്‍ വെളിപ്പെടുത്തി. ഒരു ദിവസത്തെ ഷൂട്ട് മാത്രമാണ് ഉണ്ടായിരുന്നതെന്ന് താരം പറയുന്നു. നാരായണീന്റെ മൂന്നാണ്‍മക്കള്‍ എന്ന ചിത്രത്തിന്റെ പ്രൊമോഷന്റെ ഭാഗമായി നടത്തിയ പ്രസ് മീറ്റിലാണ് നടന്റെ ഈ വെളിപ്പെടുത്തല്‍.
‘എന്റെ ജീവിതത്തില്‍ നടന്ന കാര്യം നിങ്ങള്‍ അറിഞ്ഞിരുന്നോ/ നിങ്ങള്‍ ഇത്രയും നേരം ജോജുവിനോട് തമിഴ് സിനിമയില്‍ അഭിനയിച്ച കാര്യമൊക്കെ ചോദിച്ചു. എന്നാല്‍ ഞാന്‍ വേട്ടൈയ്യനില്‍ അഭിനയിച്ച കാര്യം നിങ്ങള്‍ അറിഞ്ഞോ? രജനികാന്ത്, അമിതാഭ് ബച്ചന്‍ എന്നിവര്‍ക്കൊപ്പം ഞാന്‍ അഭിനയിച്ചു. മുംബൈ വരെ ഫ്‌ളൈറ്റ്് ടിക്കറ്റ് തന്നാണ് എന്നെ കൊണ്ടുപോയത്. ഒരു തുറന്ന പുസ്തകംപോലെ പറുകയാണ്. എനിക്ക് ഒരു രൂപ ശമ്പളം കിട്ടിയില്ല. ഫൈവ് സ്റ്റാര്‍ ഹോട്ടലില്‍ താമസവും തന്നു. ഞാന്‍ അവിടെ ചെന്നിട്ട് ജഡ്ജി വേഷത്തില്‍ ഇരിക്കണം. തമാശയാണ്. ഇനി ഇത് പറഞ്ഞതുകൊണ്ട് തമിഴില്‍ എനിക്ക് വേഷം കിട്ടുമെന്ന് തോന്നുന്നില്ല. അമിതാഭ് ബച്ചനും രജനികാന്തും അഭിനയിക്കുന്നത് എങ്ങനെയാണെന്ന് കാണണമെന്ന് മോഹിച്ച് മാത്രം പോയതാണ്. അല്ലാതെ തമിഴില്‍ അഭിനയിക്കണമെന്നോ, തമിഴ് കീഴടക്കണമെന്നോ എന്നൊന്നും എനിക്ക് താല്‍പ്പര്യമില്ല.
ഞാന്‍ ജഡ്ജി വേഷവും കെട്ടി ചേംബറില്‍ ഇരിക്കുമ്പോള്‍, ഒരു വശത്ത് രജനിസാറും അപ്പുറത്ത് ഇരിക്കുന്നത് അമിതാഭ് ബച്ചന്‍ സാറും. എനിക്ക് ഷോട്ടില്ല. ഇവരുടെ പെര്‍ഫോമന്‍സ് ഒന്ന് നേരിട്ട് കാണണം. പറന്നു പോകുന്ന ഹെലികോപ്റ്ററിനെയൊക്കെ കയറുകൊണ്ട് കടിച്ചുപിടിച്ചു നിര്‍ത്തുന്നതൊക്കെ പ്രീഡിഗ്രി സമയത്ത് കണ്ടിട്ടണ്ട്. ഇദ്ദേഹം എങ്ങനെ പെര്‍ഫോം ചെയ്യുന്നുവെന്ന് നേരിട്ട് കാണാന്‍ വേണ്ടിയാണ് ഈ സിനിമയ്ക്ക് ഡേറ്റ് കൊടുത്തത്. ആകെ ഒരു ദിവസം മാത്രമായിരുന്നു എനിക്ക് ഷൂട്ട് ഉണ്ടായിരുന്നത്. രജനിസാര്‍ അപ്പോള്‍ പെര്‍ഫോം ചെയ്തു. ഒരു സ്റ്റൈലെസ്ഡ് ആക്ടിംഗ്. ആ ബോഡി ലാംഗ്വേജ് കൊണ്ട് പെര്‍ഫോം ചെയ്ത് കോര്‍ട്ടില്‍നിന്നും പുറത്തേയ്ക്ക് പോകുന്നതാണ് സീന്‍. പിന്നെ അടുത്തയാളുടെ പെര്‍ഫോമന്‍സാണ്. ഒരു സിംഹം ഗര്‍ജിക്കുന്നതുപോലെയുള്ള അഭിതാഭ് ബച്ചന്റെ ശബ്ദം. ജഡ്ജി ഞെട്ടി. അപ്പോള്‍ എനിക്ക് മനസ്സിലായി, ഇവരോടൊപ്പം പിടിച്ചുനില്‍ക്കാന്‍ എനിക്ക് പറ്റില്ല. കാരണം എനിക്ക് ഇത്രയും സ്റ്റൈലെസ്ഡ് ആക്ടിംഗ് അറിയില്ല. ഗാംഭീര്യമുള്ള ശബ്ദവും ഇല്ല. ഞാനിവിടെ ദിലീഷ്‌പോത്തന്റെ കൂടെയും ശരണിന്റെ കൂടെയും രാജീവ് രവിയുടെ കൂടെയും മര്യാദയ്ക്ക് അഭിനയിച്ചു നടന്നുകൊള്ളാം.’ അലന്‍സിയര്‍ തുറന്നുപറഞ്ഞു.
Recent Comments