സിദിഖിന്റെയും രഞ്ജിത്തിന്റെയും രാജി സ്വാഗതം ചെയ്ത് ടൊവിനോ. കുറ്റം തെളിയിക്കപ്പെട്ടാല്‍ ആരാണെങ്കിലും ശിക്ഷ അനുഭവിക്കണം എന്നും ടൊവിനോ മാധ്യമങ്ങളോട് പ്രതികരിച്ചു.
‘കുറ്റാരോപിതരായിട്ടുള്ള ആള്‍ക്കാര് രാജിവെക്കുന്നത് അഥവാ മാറി നില്‍ക്കുന്നത് തീര്‍ച്ചയായിട്ടും നിഷ്പക്ഷമായിട്ടുള്ള ഒരു അന്വേഷണത്തിന് ആവശ്യമാണ്. അത് എന്തായാലും വേണം. കുറ്റം തെളിയിക്കപ്പെട്ടാല്‍ അത് ആരാണെങ്കിലും ശിക്ഷ അനുഭവിക്കണം.’ ടൊവിനോ തുടര്‍ന്നു.
‘ഈ ഇന്‍ഡസ്ട്രിക്കകത്ത് മാത്രമല്ല എല്ലാവരും സുരക്ഷിതമായിരിക്കണം. ഇത് ഏതെങ്കിലും ഒരു ഇന്‍ഡസ്ട്രിയിലോ അല്ലെങ്കില്‍ ഒരു ജോലി സ്ഥലത്തോ മാത്രമല്ല ഉള്ളത്. ലോകത്ത് എല്ലായിടത്തും എല്ലാ ജോലി സ്ഥലത്തും സ്ത്രീകള്‍ ആണെങ്കിലും കുട്ടികള്‍ ആണെങ്കിലും പുരുഷന്മാരാണെങ്കിലും മുതിര്‍ന്നവരാണെങ്കിലും അവര്‍ ജോലി സ്ഥലത്ത് സുരക്ഷിതരായിരിക്കണം എന്നുള്ളത് ഉറപ്പ് വരുത്തണം.’ ടൊവിനോ പറഞ്ഞു
ടൊവിനോ തോമസ് നായകനാകുന്ന ചിത്രം അജയന്റെ രണ്ടാം മോഷണത്തിന്റെ (എആര്‍എം) ട്രെയിലര്‍ റിലീസ് ചെയ്തു. സെപ്റ്റംബറില്‍ ഓണം റിലീസായാണ് ചിത്രമെത്തുന്നത്.കുഞ്ഞിക്കേളു, മണിയന്‍, അജയന്‍ എന്നിങ്ങനെ ട്രിപ്പിള്‍ റോളില്‍ ആണ് ടൊവിനോ തോമസ് ചിത്രത്തിലെത്തുന്നത്.മൂന്നു കാലഘട്ടങ്ങളിലൂടെ സഞ്ചരിച്ചാണ് എആര്‍എം കഥ പറയുന്നത്. അഞ്ച് ഭാഷകളിലായി പാന്‍-ഇന്ത്യന്‍ റീച്ചോടെയാണ് ചിത്രം തിയേറ്ററുകളില്‍ എത്തുന്നത്.
ബ്രഹ്‌മാണ്ഡ ചിത്രങ്ങളെ ഓര്‍മിപ്പിക്കുന്ന തരത്തിലുള്ള വിഷ്വലുകളാണ് ട്രൈലറില്‍ കാണുന്നത്. ഈ മൂന്ന് കഥാപാത്രങ്ങളിലൂടെയും ടൊവിനോ എന്ന നടന്റെ കൂടി അടയാളപ്പെടുത്തലായി ഏആര്‍എം മാറുമെന്ന സൂചനയാണ് ട്രൈലര്‍ തരുന്നത്. മൂന്ന് കഥാപാത്രങ്ങളായും വേറിട്ടതും മികച്ചതുമായ മേക്കോവറുകളുമാണ് ടൊവിനോ നടത്തിയിരിക്കുന്നത്. വ്യത്യസ്ത കാലഘട്ടങ്ങള്‍ റീ ക്രിയേറ്റ് ചെയ്തതില്‍ ചിത്രം വിജയിച്ചു എന്നു വേണം ട്രൈലറില്‍ നിന്ന് മനസ്സിലാക്കാന്‍. മികച്ച പശ്ചാത്തല സംഗീതവും ചിത്രത്തിന് കൈമുതലായി ഉണ്ട്. പ്രേക്ഷകനെ തീയറ്ററുകളിലേക്ക് പിടിച്ച് വലിച്ച് കയറ്റുന്ന അത്രയും വശ്യ മനോഹരമാണ് ഏആര്‍എമ്മിന്റെ ഈ ട്രെലര്‍.
കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി എന്നിവരാണ് നായികാ വേഷത്തില്‍ എത്തുന്നത്. കൃതി ഷെട്ടിയുടെ ആദ്യ മലയാളം സിനിമ കൂടിയാണ് എആര്‍എം. മാജിക് ഫ്രെയിംസ്, യു ജി എം മോഷന്‍ പിക്‌ചേര്‍സ് എന്നീ ബാനറുകളില്‍ ലിസ്റ്റിന്‍ സ്റ്റീഫന്‍, ഡോ. സക്കറിയ തോമസ് എന്നിവര്‍ ചേര്‍ന്നാണ് നിര്‍മ്മാണം.
Recent Comments