ഇന്ദ്രജിത്തിനെയും സുരാജ് വെഞ്ഞാറമ്മൂടിനെയും കേന്ദ്രകഥാപാത്രങ്ങളാക്കി പത്മകുമാര്‍ സംവിധാനം ചെയ്യുന്ന പത്താം വളവ് മെയ് 13ന് തീയേറ്ററുകളില്‍ പ്രദര്‍ശനത്തിനെത്തുകയാണ്. ഒരു പരോള്‍ പ്രതിയുടെയും പോലീസ് ഓഫീസറുടേയും കഥ പറയുന്ന ചിത്രമാണ് പത്താം വളവ്. പരോള്‍പ്രതി സോളമനെ സുരാജും പോലീസ് ഓഫീസര്‍ സേതുവിനെ ഇന്ദ്രജിത്തും അവതരിപ്പിക്കുന്നു. ക്യാമറയ്ക്ക് പിറകിലെ അവരുടെ അത്ഭുതപ്പെടുത്തുന്ന പ്രകടനങ്ങളെക്കുറിച്ചാണ് പത്മകുമാര്‍ കാന്‍ ചാനലിനോട് പറഞ്ഞത്.
‘ക്യാമറയ്ക്ക് മുന്നില്‍ ചിലപ്പോഴെങ്കിലും താരങ്ങളെ എനിക്ക് തിരുത്തേണ്ടി വരാറുണ്ട്. തിരക്കഥ ആവശ്യപ്പെടുന്ന കാര്യങ്ങളായിരിക്കില്ല അപ്പോള്‍ അവര്‍ പിന്തുടര്‍ന്നിട്ടുണ്ടാവുക. എന്നാല്‍ പത്താംവളവില്‍ എന്നെ അത്ഭുതപ്പെടുത്തിയ കാര്യം ഇന്ദ്രന്റെയും സുരാജിന്റെയും പ്രകടനം തന്നെയാണ്. അവര്‍ ശരിക്കും എന്നെ ഞെട്ടിച്ചുകളഞ്ഞു. അഭിനേതാക്കളെന്ന നിലയില്‍ ഒരിക്കല്‍പോലും എനിക്കവരെ തിരുത്തേണ്ടിവന്നിട്ടില്ല.’ പത്മകുമാര്‍ പറഞ്ഞു.
‘ഞാന്‍ ഇന്ദ്രജിത്തിനെ വച്ച് ഇതുവരെ പടങ്ങളൊന്നും സംവിധാനം ചെയ്തിട്ടില്ല. എന്നാല്‍ ഇന്ദ്രജിത്ത് നായകവേഷം ചെയ്ത മിഴി രണ്ടിലും എന്ന സിനിമയുടെ അസോസിയേറ്റായിരുന്നു ഞാന്‍. സുരാജ് എന്റെതന്നെ ചിത്രങ്ങളായ പരുന്തിലും ശിക്കാറിലുമൊക്കെ അഭിനയിച്ചിട്ടുണ്ട്. അതൊക്കെ ഹ്യൂമര്‍ വേഷങ്ങളായിരുന്നു. അന്ന് സീരിയസ് ട്രാക്കിലേയ്ക്ക് സുരാജ് മാറിയിട്ടില്ല. പത്താംവളവില്‍ ഇന്ദ്രന്റെയും സുരാജിന്റെയും മത്സരിച്ചുള്ള അഭിനയ പ്രകടനങ്ങള്‍ക്കാണ് ഞാന്‍ സാക്ഷ്യം വഹിച്ചത്. ഏറ്റവും സൂക്ഷാംശം വെളിപ്പെടുത്തുന്ന അഭിനയരീതിയായിരുന്നു അവരുടേത്.’ പത്മകുമാര്‍ തുടര്‍ന്നു.
‘നമ്മുടെ പുതുമുഖ താരങ്ങളില്‍ പലരും ആക്ടിംഗ് സ്‌കൂളില്‍ പോയി പരിശീലനം നേടിയിട്ടുണ്ടെന്ന് കേട്ടിട്ടുണ്ട്. അങ്ങനെ പ്രകടനം മികച്ചതാക്കിയ അഭിനേതാക്കളുമുണ്ട്. പക്ഷേ സുരാജ് ഏത് യൂണിവേഴ്‌സിറ്റിയില്‍നിന്നാണ് അഭിനയം പഠിച്ചതെന്നറിയില്ല. ഈ ചുരുങ്ങിയ കാലംകൊണ്ട് എങ്ങനെ അദ്ദേഹത്തിന് മികച്ച അഭിനേതാവാകാന്‍ കഴിഞ്ഞുവെന്നും അറിയില്ല. അദ്ദേഹത്തിലെ അഭിനേതാവ് ഇത്രയുംകാലം എവിടെ ഒളിച്ചിരിക്കുകയായിരുന്നു. സുരാജിലെ അഭിനേതാവിനെ ആര് കണ്ടെത്തിയാലും അവര്‍ അഭിനന്ദനം അറിയിക്കുന്നു. മലയാളസിനിമയ്ക്ക് അത്ര മുതല്‍കൂട്ടായ നടനെയാണ് ലഭിച്ചിരിക്കുന്നത്.’ പത്മകുമാര്‍ പറഞ്ഞുനിര്‍ത്തി.
അഭിലാഷ് പിള്ള തിരക്കഥയെഴുതിയിരിക്കുന്ന ചിത്രത്തിന് ഛായാഗ്രഹണം ഒരുക്കിയിരിക്കുന്നത് രതീഷ് റാമാണ്. യു.ജി.എം. എന്റര്‍ടെയിന്‍മെന്റ്‌സിന്റെ ബാനറില്‍ ഡോ. സക്കറിയ തോമസ്, ജിജോ കാവനാല്‍, ശ്രീജിത്ത് രാമചന്ദ്രന്‍, പ്രിന്‍സ് പോള്‍, നിഥിന്‍ കെനി എന്നിവര്‍ ചേര്‍ന്നാണ് പത്താംവളവ് നിര്‍മ്മിച്ചിരിക്കുന്നത്.
Recent Comments