അന്തരിച്ച പ്രശസ്ത ഗായകന്‍ എം.എസ്. നസീമുമായുള്ള ഓര്‍മ്മകള്‍ പങ്കുവച്ചുകൊണ്ട് സംവിധായകന്‍ ബാലചന്ദ്രമേനോന്‍ എഴുതിയ ഫെയ്‌സ്ബുക്ക് കുറിപ്പ് ഹൃദയസ്പര്‍ശിയാകുന്നു.
ആദ്യമായി കണ്ടതോ, പരിചയപ്പെട്ടതോ ബാലചന്ദ്രമേനോന്റെ ഓര്‍മ്മയിലില്ലെങ്കിലും മനസ്സില്‍ ആദ്യം പതിഞ്ഞത് പിശുക്കില്ലാത്ത നസീമിന്റെ ചിരിയായിരുന്നുവെന്ന് അദ്ദേഹം ഓര്‍ക്കുന്നു. യൂണിവേഴ്‌സിറ്റി കോളേജില്‍ ബാലചന്ദ്രമേനോന്‍ ചെയര്‍മാനായിരുന്നപ്പോള്‍ നസീം ആര്‍ട്ട്‌സ് ക്ലബ്ബ് സെക്രട്ടറിയായിരുന്നു. ജനകീയ ഗായകന്‍ എന്ന നിലയില്‍ നസീം അന്നേ സര്‍വ്വസമ്മതനുമായിരുന്നു. ആലപ്പുഴയില്‍വച്ച് നടന്ന ഒരു ഇന്റര്‍ കോളേജിയസ് നാടകമത്സരത്തില്‍ ഇരുവരും ഒരുമിച്ച് പങ്കെടുത്തിരുന്നു. താന്‍ സംവിധായകനാകുമെന്ന് ആദ്യം പ്രഖ്യപിച്ചത് നസീമിനോടാണെന്നും ആദ്ദേഹം ഓര്‍ക്കുന്നു. പില്‍ക്കാലത്ത് തിരക്കുള്ള സംവിധായകനായി മാറിയിട്ടും തന്റെ സിനിമയില്‍ നസീമിനെക്കൊണ്ട് ഒരു പാട്ടുപോലും പാടിക്കാത്തതിന്റെ ദുഃഖവും ബാലന്റെ വാക്കുകളിലുണ്ട്. എന്നോട് ക്ഷമിക്കുക എന്ന അഭ്യര്‍ത്ഥനയോടെയാണ് അദ്ദേഹത്തിന്റെ കുറിപ്പ് അവസാനിക്കുന്നത്.
പക്ഷാഘാതത്തെത്തുടര്‍ന്ന് വര്‍ഷങ്ങളായി ചികിത്സയിലായിരുന്ന എം.എസ്. നസീമിന്റെ അന്ത്യം ഇന്ന് പുലര്‍ച്ചെയായിരുന്നു.
ബാലചന്ദ്രമേനോന്‍ എഴുതിയ ഫെയ്‌സ് ബുക്ക് കുറിപ്പിന്റെ പൂര്‍ണ്ണരൂപം:
‘എല്ലാം പെട്ടന്നായിരുന്നു… രണ്ടാഴ്ച മുന്‍പ് ഞാന്‍ നസീമുമൊത്തുള്ള ഒരു ഫോട്ടോ ഇഷ്ട്ടന്റെ വാട്ട്‌സാപ്പില്‍ അയച്ചിട്ട് ഒരു അടിക്കുറിപ്പെഴുതി…
‘എങ്ങനുണ്ട് നസീമേ ?’ എന്ന്.
അതിനു മറുപടിയായി നസീമിന്റെ ഭാര്യ പറഞ്ഞപ്പോഴാണ് ഞാന്‍ അറിഞ്ഞത് നസീം ആശുപത്രിയിലാണെന്ന്… ഏറെ നാളുകളായി നസീം ആശുപത്രിയുമായി ബന്ധപ്പെട്ടും അല്ലാതെയും നിരീക്ഷണത്തിലായിരുന്നതുകൊണ്ട് ഞാന്‍ അതത്ര ഗൗരവമായി കണ്ടില്ല. എന്നാല്‍ ഇന്ന് രാവിലെ ടിവിയില്‍ മരണവാര്‍ത്ത അറിഞ്ഞപ്പോള്‍…
ഓര്‍ക്കാന്‍ എനിക്കൊരുപാടുണ്ട് നസീമിനെക്കുറിച്ചു…. ആദ്യമായി കണ്ടത് എന്നാണെന്നോ എവിടെ വെച്ചെന്നോ നിശ്ചയമില്ല. എന്നാല്‍ ആദ്യം കണ്ട നിമിഷം നിമിഷം തന്നെ എന്റെ മനസ്സില്‍ പതിഞ്ഞത് നസീമിന്റെ ‘പിശുക്കില്ലാത്ത ചിരി’യാണ്. ആ ചിരിക്കു അകമ്പടിയായി മില്ലിലെ ഗോതമ്പു പൊടിക്കുന്ന ഒരു തരം ഇരമ്പല്‍ ശബ്ദവുമുണ്ടാവും.
ഒരിക്കല്‍ ഞാന്‍ ചോദിച്ചു: എന്തിനാ നസീമേ നിങ്ങള്‍ പറയുമ്പോഴും പാടുമ്പോഴും ഇങ്ങനെ വെളുക്കെ ചിരിക്കുന്നെ? എല്ലാ പല്ലും ഇപ്പോഴും ഉണ്ടെന്നറിയിക്കാനാണോ?
നസീം പറഞ്ഞു: ‘എനിക്കിങ്ങനെയേ പറ്റൂ’
ശരിയാണ്. ആ ചിരി സത്യസന്ധമായ ചിരി ആയിരുന്നു. മനസ്സില്‍ അസൂയ എന്ന വിഷം തീണ്ടിയിട്ടില്ലാത്ത ഒരു അപൂര്‍വ്വം സുഹൃത്തായിരുന്നു നസീം. അല്ലെങ്കില്‍ ‘പാടാനെന്തു സുഖം’ എന്ന പേരില്‍ ജയചന്ദ്രന്‍ ഗാനങ്ങളെ ഞാന്‍ ആലപിക്കുന്ന ഒരു മ്യൂസിക് ആല്‍ബത്തിന്റെ റീകാര്‍ഡിങ് വേളയില്‍ ഗായകനായ നസീം എന്തിനു രാവുംപകലും എനിക്ക് ഉണര്‍വ്വും ഊര്‍ജ്ജവും പകര്‍ന്നു കൂട്ട് തന്നു?
കാരണം ഒന്നേയുള്ളു. ഒന്നാമത്, എന്നോടുള്ള ഇഷ്ട്ടം… പിന്നെ പാട്ടിനോടുള്ള പെരുത്ത ഇഷ്ട്ടം. കഴക്കൂട്ടത്തെ വീട്ടിലെ ആ കൊച്ചു സ്റ്റുഡിയോയില്‍ പാടിയും പറഞ്ഞും ഞങ്ങള്‍ ഇരുന്ന നിമിഷങ്ങള്‍…
യൂണിവേഴ്‌സിറ്റി കോളേജില്‍ ഞാന്‍ ചെയര്‍മാന്‍ ആയിരിക്കുമ്പോള്‍ നസീം അര്‍ട്‌സ് ക്ലബ് സെക്രട്ടറി ആയിരുന്നു… ഒരു ജനകീയ ഗായകന്‍ എന്ന നിലയില്‍ നസീം ഏവര്‍ക്കും അന്നേ സര്‍വ്വസമ്മതനുമായിരുന്നു. കോളേജിലെ മരച്ചോട്ടിലും കാന്റീനിലും ഒക്കെ ഇരുന്നു എത്ര തവണ ‘ഞാന്‍ സംവിധാനം ചെയ്യും നസീമേ’ എന്ന് ഈയുള്ളവന്‍ പ്രഖ്യാപിച്ചിട്ടുണ്ട്!
ആലപ്പുഴയില്‍ വെച്ച് നടന്ന ഇന്റര്‍ കോളേജിയേറ്റ് നാടക മത്സരത്തില്‍ യൂണിവേഴ്‌സിറ്റി കോളേജിനെ പ്രതിനിധീകരിച്ചു ‘ബാലികേറാമല’ എന്ന നാടകവുമായി പോയ സംഘത്തിലും നസീം ഉണ്ടായിരുന്നത് ഞാന്‍ ഓര്‍ക്കുന്നു. കാറിനുള്ളില്‍ കണ്ട പൂച്ച എന്തിനെന്നു നസീം ചോദിച്ചുകൊണ്ടേയിരുന്നു. ‘ഒക്കെയുണ്ട്’ എന്ന് ഞാന്‍ ഉഴപ്പി പറഞ്ഞപ്പോഴൊക്കെ നസീം അന്തം വിട്ടിരുന്നു. ഒടുവില്‍ ‘ബീന’ എന്ന പൂച്ചയാണ് എന്റെ നാടകത്തിലെ നായിക എന്ന് പറഞ്ഞപ്പോള്‍ നസീമിന്റെ മുഖത്തു കണ്ട ആ ചിരിയും മില്ലിലെ ശബ്ദവും’ ഇന്നലത്തേതു പോലെ എന്റെ മനസ്സില്‍…
സംഗീത സംവിധായകന്‍ ജോണ്‍സന്‍ പറഞ്ഞിട്ടാണ് മാര്‍ക്കോസിനെ ‘കേള്‍ക്കാത്ത ശബ്ദത്തില്‍’ ഞാന്‍ പാടിച്ചത്… വേണു നാഗവള്ളിയുടെ ശുപാര്‍ശയിലാണ് ‘എന്റെ അമ്മു നിന്റെ തുളസി അവരുടെ ചക്കി’ എന്ന ചിത്രത്തില്‍ ബാലഗോപാലന്‍ തമ്പി എന്ന പുതു ഗായകന്‍ വരുന്നത്.
…എന്നിട്ടും നസീമേ നിങ്ങള്‍ക്ക് വേണ്ടി ആരും എന്നോട് ശുപാര്‍ശ ചെയ്തില്ലല്ലോ…. വേണ്ട, എത്രയോ പുതുമുഖങ്ങളെ പരിചയപ്പെടുത്തിയ നിങ്ങളെ ഒരു പാട്ടില്‍ പോലും പെടുത്തുവാന് എനിക്ക് കഴിയാതെ പോയല്ലോ… ഇത്രയും സ്വാതന്ത്ര്യമുണ്ടായിട്ടും നിങ്ങളും എന്നോടു പറഞ്ഞില്ലല്ലോ… …അതാണ് പഴമക്കാര്‍ പണ്ടേ പറഞ്ഞത്, കരയുന്ന കുഞ്ഞിനേ പാലുള്ളൂ എന്ന്…
അക്കാര്യത്തില്‍ ഇപ്പോള്‍ എനിക്ക് അനല്പമായ ദുഃഖമുണ്ട് ചങ്ങാതി, എന്നോട് ക്ഷമിക്കുക.
ഏതാനും മണിക്കൂറുകള്‍ക്കുള്ളില്‍ നസീം ഒരു യാത്രക്ക് പോവുകയായി… ….ഒരുപാട് തവണ നസീം ആ യാത്ര പാടി പാടി ആഘോഷിച്ചിട്ടുമുണ്ട്…
‘മധുരിക്കും… ഓര്‍മ്മകളെ… മലര്‍മഞ്ചല്‍ കൊണ്ടുവരൂ… കൊണ്ടുപോകൂ… ഞങ്ങളെ… ആ… മാഞ്ചുവട്ടില്‍… മാഞ്ചുവട്ടില്‍…’
Recent Comments