ഭാവനയെ നായികയാക്കി ഷാജികൈലാസ് സംവിധാനം ചെയ്യുന്ന പുതിയ ചിത്രമാണ് ഹണ്ട്. ചിത്രത്തിന്റെ ഷൂട്ടിംഗ് ഡിസംബര്‍ 26 ന് പാലക്കാട് ആരംഭിക്കും. ചിന്താമണി കൊലക്കേസിനുശേഷം ഭാവന അഭിനയിക്കുന്ന ഷാജികൈലാസ് ചിത്രംകൂടിയാണ് ഹണ്ട്.
ജയലക്ഷ്മി ഫിലിംസിന്റെ ബാനറില്‍ കെ. രാധാകൃഷ്ണനാണ് ചിത്രം നിര്‍മ്മിക്കുന്നത്. ജയലക്ഷ്മി ഫിലിംസ് നിര്‍മ്മിക്കുന്ന ആറാമത്തെ ചിത്രവും. നിറം, കളിയാട്ടം, മേഘസന്ദേശം, വസന്തമാളിക, വിന്റര്‍ എന്നിവയാണ് ഈ ബാനറില്‍ നിര്‍മ്മിച്ച മറ്റു ചിത്രങ്ങള്‍. കളിയാട്ടത്തിലൂടെയാണ് സുരേഷ് ഗോപിക്ക് മികച്ച നടനുള്ള ദേശീയ പുരസ്‌കാരം ലഭിച്ചത്. ദീപു സംവിധാനം ചെയ്ത വിന്ററില്‍ ജയറാമിന്റെ നായികയായി അഭിനയിച്ചതും ഭാവനയായിരുന്നു. നീണ്ട പതിനാല് വര്‍ഷങ്ങള്‍ക്ക് ശേഷമാണ് ജയലക്ഷ്മി ഫിലിം നിര്‍മ്മാണരംഗത്ത് സജീവമാകുന്നത്.
ഭാവനയെ കൂടാതെ അതിഥി രവി, ചന്ദുനാഥ്, രഞ്ജി പണിക്കര്‍, നന്ദു എന്നിവരും പ്രധാന വേഷത്തില്‍ എത്തുന്നു. നവാഗതനായ നിഖില്‍ ആനന്ദാണ് ഹണ്ടിനുവേണ്ടി കഥയും തിരക്കഥയും സംഭാഷണവും എഴുതുന്നത്. ജാക്‌സണ്‍ ഛായാഗ്രഹണം ഒരുക്കുന്ന ചിത്രത്തിന്റെ എഡിറ്റര്‍ അജാസാണ്. ബോബനാണ് കലാസംവിധായകന്‍. പ്രൊഡക്ഷന്‍ കണ്‍ട്രോളര്‍ സഞ്ജു ജെ., സംഗീത സംവിധായകന്‍ കൈലാസ് മേനോന്‍, മേക്കപ്പ് ബി. ശങ്കര്‍, സ്റ്റില്‍സ് ഹരി തിരുമല.
Recent Comments