അഭിനയിക്കണം, അതായിരുന്നു ബിബിന്റെയും വിഷ്ണുവിന്റെയും ഏറ്റവും വലിയ സ്വപ്നം. അവര്‍ അമര്‍ അക്ബര്‍ അന്തോണിയുടെ തിരക്കഥ എഴുതിയതുതന്നെ ഈയൊരു സ്വപ്‌നസാക്ഷാത്ക്കാരത്തിനുവേണ്ടിയാണ്. നാദിര്‍ഷയോട് കഥ പറയുമ്പോഴും അവരുടെ ആവശ്യം തങ്ങളെ നായകന്മാരാക്കണം എന്നുള്ളതായിരുന്നു. പക്ഷേ അവരുടെ സ്വപ്നത്തെ മുളയിലേ നുള്ളിക്കളഞ്ഞത് നാദിര്‍ഷയായിരുന്നു.
‘എന്റെയും ആദ്യത്തെ സിനിമയാണ്. നിങ്ങളെപ്പോലെ രണ്ട് പുതുമുഖങ്ങളെവച്ച് സിനിമ ചെയ്താല്‍ നമുക്ക് രണ്ടുപേര്‍ക്കും അത് ഗുണം ചെയ്യില്ല.’ നാദിര്‍ഷ പറഞ്ഞു.
അങ്ങനെയായിരുന്നു പൃഥ്വിരാജും ജയസൂര്യയും ഇന്ദ്രജിത്തും നായകന്മാരാകുന്നത്. സിനിമ സൂപ്പര്‍ ഹിറ്റ്. അത് ഗുണം ചെയ്തത് നാദിര്‍ഷയ്ക്ക് മാത്രമല്ല, ബിബിനും വിഷ്ണുവിനുംകൂടിയാണ്.
ഇന്ന് ഏറ്റവും മൂല്യമുള്ള സംവിധായകരുടെ നിരയിലാണ് നാദിര്‍ഷ. ബിബിനും വിഷ്ണുവും തിരക്കഥാകൃത്തുക്കള്‍ എന്ന നിലയില്‍ മാത്രമല്ല, തിരക്കുള്ള അഭിനേതാക്കളായും വളര്‍ന്നു.
ഇപ്പോഴിതാ ബിബിനും വിഷ്ണുവും ചേര്‍ന്ന് ഒരു സിനിമ സംവിധാനം ചെയ്യാനൊരുങ്ങുന്നു. തങ്ങളുടെ ഫെയ്‌സ്ബുക്കിലൂടെയാണ് ഈ വിവരം അവര്‍ പുറത്ത് വിട്ടിരിക്കുന്നത്.
തിരക്കഥ എഴുതുന്നതും ബിബിനും വിഷ്ണുവും ചേര്‍ന്നാണ്. ഇവരുടെ ആദ്യ സംവിധാന സംരംഭം നിര്‍മ്മിക്കുന്നത് ബാദുഷയാണ്.
‘പുതുമുഖങ്ങള്‍ക്ക് പ്രാമുഖ്യം നല്‍കുന്ന സിനിമയാണിത്. അടുത്ത വര്‍ഷം പകുതിയോടെ സിനിമയുടെ ഷൂട്ടിംഗ് തുടങ്ങും. കൂടുതല്‍ വിവരങ്ങള്‍ വൈകാതെ പറയാം.’ ബാദുഷ കാന്‍ ചാനലിനോട് പറഞ്ഞു.
Recent Comments