‘ജയ ജയ ജയ ജയ ഹേ’ എന്ന സൂപ്പര്‍ ഹിറ്റ് ചിത്രത്തിന് ശേഷം വിപിന്‍ ദാസ് സംവിധാനം ചെയ്യുന്ന ഏറ്റവും പുതിയ ചിത്രമാണ് ‘ഗുരുവായൂരമ്പല നടയില്‍’. ഇപ്പോള്‍ ചിത്രത്തില്‍ അജു വര്‍ഗീസ് പാടിയ ഗാനം അണിയറ പ്രവര്‍ത്തകര്‍ പുറത്ത് വിട്ടിരിക്കുകയാണ്. നടനായ അജുവിന്റെ പാട്ടുകാരനായുള്ള അവതാര പിറവിക്ക് കൂടിയാണ് ചിത്രം വഴി ഒരുക്കിയത്.
‘കൃഷ്ണ കൃഷ്ണ’ എന്ന് തുടങ്ങുന്ന ഈ ഗാനം അജു പാടുന്നതിന്റെ വീഡിയോയും പാട്ടിനൊപ്പം കാണാന്‍ സാധിക്കും. അങ്കിത് മേനോന്റെ സംഗീതത്തിന് വിനായക് ശശികുമാറാണ് വരികള്‍ എഴുതിയിരിക്കുന്നത്. പൃഥ്വിരാജ്, ബേസില്‍ ജോസഫ് എന്നിവര്‍ പ്രധാന വേഷത്തിലെത്തുന്ന ചിത്രം മെയ് 16 നാണ് തിയറ്ററുകളിലെത്തുന്നത്.
അനശ്വര രാജന്‍, നിഖില വിമല്‍ എന്നിവരാണ് നായിക കഥാപാത്രങ്ങളെ അവതരിപ്പിക്കുന്നത്. പൃഥ്വിരാജ് പ്രൊഡക്ഷന്‍സിന്റെ ബാനറില്‍ സുപ്രിയ മേനോന്‍, ഇഫോര്‍ എന്റര്‍ടൈന്‍മെന്റ് ബാനറില്‍ മുകേഷ് ആര്‍ മേത്ത, സി വി സാരഥി എന്നിവര്‍ ചേര്‍ന്ന് നിര്‍മ്മിക്കുന്ന ഈ ചിത്രത്തില്‍ യോഗി ബാബു, ജഗദീഷ്, രേഖ, ഇര്‍ഷാദ്, സിജു സണ്ണി, സഫ്വാന്‍, കുഞ്ഞികൃഷ്ണന്‍ മാസ്റ്റര്‍, മനോജ് കെ.യു. തുടങ്ങിയ പ്രമുഖരും അഭിനയിക്കുന്നു.
Recent Comments