കോൺഗ്രസ് നേതാവ് ശശി തരൂർ തന്റെ മുൻ നിലപാടിൽ മാറ്റം വരുത്തി; എന്താണ് പുതിയ നിലപാട്

കോൺഗ്രസിൽ നിന്നും ശക്തമായ പ്രതിഷേധം ഉണ്ടായതിനെ തുടർന്ന് തിരുവനന്തപുരം എം പിയും കോൺഗ്രസ് നേതാവുമായ ശശി തരൂർ തന്റെ നിലപാടിൽ മാറ്റം വരുത്തി .കഴിഞ്ഞ ദിവസം പിണറായി സർക്കാരിന്റെ വ്യവസായ നയത്തെ പുകഴ്ത്തി ശശി തരൂർ ഇന്ത്യൻ എക്സ്പ്രസിൽ ലേഖനം എഴുതിയിരുന്നു.അത് വിവാദമായി.തുടർന്ന് ഇന്നലെ പ്രതിപക്ഷ നേതാവും കെ മുരളീധരനും ശശി തരൂരിനെ തള്ളിപ്പറഞ്ഞു .കൂടാതെ തരൂർ കോൺഗ്രസിൽ ഒറ്റപ്പെട്ടതോടെയാണ് തന്റെ നിലപാടിൽ വെള്ളം ചേർക്കാൻ അദ്ദേഹം നിർബന്ധിതമായത് .നിലപാടിൽ മാറ്റം വരുത്തിക്കൊണ്ട് ശശി തരൂർ ഫേസ് ബുക്കിൽ പോസ്റ്റ് ചെയ്യുകയുണ്ടായി .ആ പോസ്റ്റിന്റെ പൂർണരൂപം താഴെ ചേർക്കുന്നു.

“എന്റെ ഇന്ത്യൻ എക്സ്പ്രസിൽ വന്ന ലേഖനത്തിൽ കഴിഞ്ഞ ഉമ്മൻ ചാണ്ടി സർക്കാരിൻ്റെ കാലത്ത് നേടിയ വ്യവസായ സാങ്കേതികവിദ്യ പുരോഗതി പരാമർശിക്കാത്തത് ചിലർ ചൂണ്ടിക്കാണിക്കുകയുണ്ടായി. അത് മനപ്പൂർവമല്ല.

ആ ലേഖനത്തിൽ പ്രതിപാദിച്ചിരുന്നത് നിലവിലെ സിപിഎം നേതൃത്വം നൽകുന്ന സർക്കാർ കഴിഞ്ഞ കാലങ്ങളിൽ സാങ്കേതികവിദ്യക്കും വ്യവസായ വളർച്ചയ്ക്കും പിന്തിരിഞ്ഞ് നിന്ന സമീപനങ്ങളിൽ ഒരു മാറ്റം വരുത്തിയിരിക്കുന്നു എന്നു പറയുന്നത് കേരളത്തിന് ഗുണം ചെയ്യുന്നുണ്ടോ എന്ന വിഷയത്തെ കുറിച്ചായിരുന്നു.

ഉമ്മൻ ചാണ്ടി സർക്കാരിൽ വ്യവസായ വിവരസാങ്കേതികവിദ്യ വകുപ്പുകൾ കൈകാര്യം ചെയ്തിരുന്ന ശ്രീ പി കെ കുഞ്ഞാലിക്കുട്ടിയുടെ നേതൃത്വത്തിൽ വലിയ നേട്ടങ്ങൾ കൈവരിക്കുകയും കേരളത്തിന് കാതലായ വളർച്ച നേടിക്കൊടുക്കുകയും ചെയ്തിട്ടുണ്ട്.

കേരളത്തിൽ ആദ്യമായി ഒരു ഗ്ലോബൽ ഇൻവെസ്റ്റർ മീറ്റ് എ കെ ആൻറണി സർക്കാറിൻ്റെ കാലത്ത് നടത്തിയതും ശ്രീ പി കെ കുഞ്ഞാലിക്കുട്ടിയുടെ നേതൃത്വത്തിൽ ആയിരുന്നു. സിപിഎമ്മിന്റെ ഇതുവരെയുള്ള പൊതു നയം ഇക്കാര്യത്തിൽ വ്യവസായ നിക്ഷേപ അനുകൂലമല്ലാതിരുന്നതിൽ മാറ്റങ്ങൾ വരുത്തിയെന്ന് നിലവിലെ വ്യവസായ മന്ത്രി പറയുകയും അവതരിപ്പിക്കുകയും ചെയ്ത കണക്കുകൾ ആയിരുന്നു എൻ്റെ ലേഖനത്തിന്റെ പ്രധാന പ്രതിപാദ്യം.”