കേരളത്തില്‍ കോവിഡിന്റെ രണ്ടാംതരംഗം അതിശക്തമായതോടെ മലയാള സിനിമാമേഖലയും അക്ഷരാര്‍ത്ഥത്തില്‍ പ്രതിസന്ധിയിലായിരിക്കുകയാണ്. മൂന്ന് സൂപ്പര്‍താര ചിത്രങ്ങളാണ് കോവിഡ് വ്യാപനത്തെത്തുടര്‍ന്ന് നിര്‍ത്തിവച്ചത്. നടന്‍ ടൊവിനോ, കോവിഡ് ബാധിതനായതിനെത്തുടര്‍ന്ന് മിന്നല്‍ മുരളിയുടെ ഷൂട്ടിംഗ് നിര്‍ത്തിവച്ച് ഒരാഴ്ച പിന്നിട്ടതിന് പിറകെയാണ് പുതിയ സംഭവവികാസങ്ങള്‍. പുതുതായി നടക്കാനിരിക്കുന്ന ചിത്രങ്ങളുടെ ഷൂട്ടിംഗും ഇതോടെ അനിശ്ചിതാവസ്ഥയിലായി.
ബേസില്‍ ജോസഫ് സംവിധാനം ചെയ്യുന്ന മിന്നല്‍ മുരളിയുടെ സെക്കന്റ് ഷെഡ്യൂള്‍ കര്‍ണാടകയിലും പൊള്ളാച്ചിയിലും ഈരാറ്റുപേട്ടയിലുമായി നടന്നുകൊണ്ടിരിക്കുന്നതിനിടെയാണ് ടൊവിനോ തോമസിനടക്കം കോവിഡ് പിടിപെട്ടത്. തുടര്‍ന്ന് ഷൂട്ടിംഗ് ബ്രേക്ക് ചെയ്തു. ഇപ്പോള്‍ ആലുവയിലെ ഒരു വില്ലയില്‍ ക്വാറന്റൈനിലാണ് ടൊവിനോ. ടൊവിനോയുടെ ഫിസിക്കല്‍ ട്രെയിനര്‍ ഹഷ്‌കര്‍ക്കും കോവിഡ് പിടിപെട്ടിരുന്നു. കോവിഡ് വ്യാപനം ശക്തമായ സ്ഥിതിക്ക് മിന്നല്‍ മുരളിയുടെ അടുത്ത ഷെഡ്യൂള്‍ ഇനിയും നീളാന്‍ ഇടയുണ്ട്.
മോഹന്‍ലാല്‍ സംവിധാനം ചെയ്യുന്ന ബറോസിന്റെ ഗോവന്‍ ഷെഡ്യൂളും ബ്രേക്ക് ചെയ്തിരുന്നു. ഗോവയിലെ ചില പ്രൊഡക്ഷന്‍ ടീമിനടക്കം കോവിഡ് ബാധിച്ച പശ്ചാത്തലത്തിലായിരുന്നു തീരുമാനം. പൃഥ്വിരാജും നിരവധി വിദേശ താരങ്ങളുമടക്കം പങ്കെടുക്കേണ്ടിയിരുന്ന ഷെഡ്യൂളായിരുന്നു. സുരക്ഷയെ മുന്‍നിര്‍ത്തിയാണ് ഷൂട്ടിംഗ് ബ്രേക്ക് ചെയ്തത്. നവോദയ സ്റ്റുഡിയോയില്‍ സന്തോഷ് രാമന്റെ നേതൃത്വത്തില്‍ സെറ്റ് വര്‍ക്കുകളുടെ പണി ഇപ്പോള്‍ തകൃതിയായി നടന്നുകൊണ്ടിരിക്കുകയാണ്. അത് പൂര്‍ത്തിയാകുന്ന മുറയ്ക്ക് ഷൂട്ടിംഗ് തുടങ്ങാനാണ് പദ്ധതി. ഇന്‍ഡോര്‍ ഷൂട്ടിംഗ് ആയതിനാല്‍ ജനക്കൂട്ടത്തെ പൂര്‍ണ്ണമായും ഒഴിവാക്കാന്‍ കഴിയുമെന്നൊരു മെച്ചമുണ്ട്.
അമല്‍ നീരദ്-മമ്മൂട്ടി ചിത്രമായ ഭീഷ്മപര്‍വ്വത്തിന്റെയും ജോഷി-സുരേഷ്‌ഗോപി ചിത്രമായ പാപ്പന്റെയും ഷൂട്ടിംഗ് ഇന്നലെ ഷെഡ്യൂളായി. ജൂനിയര്‍ ആര്‍ട്ടിസ്റ്റുകളടക്കം 150 ലേറെ ആളുകളെ പങ്കെടുപ്പിച്ചുകൊണ്ടുള്ള രംഗങ്ങളാണ് പ്രത്യേകിച്ച് പാപ്പനില്‍ ഇനി ചിത്രീകരിക്കാനുള്ളത്. ആള്‍ക്കൂട്ടത്തെ ഒഴിവാക്കണമെന്ന കോവിഡ് പ്രോട്ടോകോള്‍ നിലനില്‍ക്കുന്നതിനാല്‍ അതിന് കഴിയാത്ത സാഹചര്യത്തിലാണ് ഷൂട്ടിംഗ് ബ്രേക്ക് ചെയ്തത്.
സെന്‍ട്രല്‍ പിക്‌ച്ചേഴ്‌സ് നിര്‍മ്മിച്ച് ജിസ്‌ജോയ് സംവിധാനം ചെയ്യുന്ന ആസിഫ് അലി ചിത്രത്തിന്റെ ഷൂട്ടിംഗ് ഇന്ന് എറണാകുളത്ത് ആരംഭിച്ചിട്ടുണ്ട്. രണ്ടുദിവസം മുന്നേ ഷാജികൈലാസ്-പൃഥ്വിരാജ് ചിത്രമായ കടുവയും. എന്നാല്‍ തുടങ്ങാനിരിക്കുന്ന മമ്മൂട്ടിയുടെ ‘പുഴു’വടക്കമുള്ള ഷൂട്ടിംഗ് ഇന്നത്തെ സാഹചര്യത്തില്‍ അനിശ്ചിതമായി നീളാനിടയുണ്ട്.
Recent Comments