ജൂനിയര്‍ എന്‍.ടി.ആറിനെ നായകനാക്കി കൊരട്ടാല ശിവ സംവിധാനം ചെയ്യുന്ന ദേവര പാര്‍ട്ട് 1 ലെ ഫിയര്‍ സോങ് പുറത്തു വിട്ടിരിക്കുകയാണ് സംഗീത സംവിധായകന്‍ കൂടിയായ അനിരുദ്ധ് രവിചന്ദര്‍. ചിത്രത്തിന് സംഗീതം ഒരുക്കിയതും അനിരുദ്ധാണ്. അഞ്ച് ഭാഷകളിലായിട്ടാണ് പുറത്തിറക്കിയിരിക്കുന്നത്. തെലുങ്കില്‍ രാമജോഗയ്യ ശാസ്ത്രി, തമിഴില്‍ വിഷ്ണു എടവന്‍, ഹിന്ദിയില്‍ മനോജ് മുന്‍തഷിര്‍, മലയാളത്തില്‍ മങ്കൊമ്പ് ഗോപാലകൃഷ്ണന്‍, കന്നടയില്‍ വരദരാജ് ചിക്കബല്ലപുര എന്നിവരാണ് ഗാനത്തിന്റെ രചന നിര്‍വ്വഹിച്ചിരിക്കുന്നത്. തെലുങ്ക്, ഹിന്ദി, തമിഴ് ഭാഷകളില്‍ ഗാനം ആലപിച്ചിരിക്കുന്നത് അനിരുദ്ധ് തന്നെയാണ്. മലയാളം, കന്നട എന്നീ ഭാഷകളില്‍ സന്തോഷ് വെങ്കിയാണ് ആലപിച്ചിരിക്കുന്നത്. മികച്ചൊരു ഫിയര്‍ സോങ് എന്നാണ് സോഷ്യല്‍ മീഡിയ പ്രതികരണങ്ങള്‍ സൂചിപ്പിക്കുന്നത്.
വന്‍ ബജറ്റില്‍ ഒരുങ്ങുന്ന ചിത്രം രണ്ട് ഭാഗങ്ങളിലായിട്ടാണ് ചിത്രീകരിച്ചിരിക്കുന്നത്. ഒന്നാം ഭാഗം 2024 ഒക്ടോബര്‍ 10 ന് റിലീസാവും. ചിത്രത്തിന്റേതായി നേരത്തെ പുറത്തുവിട്ടിരുന്ന പോസ്റ്ററുകളും ഗ്ലിംസ് വീഡിയോയും ഏറെ ശ്രദ്ധിക്കപ്പെട്ടിരുന്നു.
മോഹന്‍ലാല്‍ ചിത്രം ജനതാ ഗാരേജിനുശേഷം കൊരട്ടാല ശിവയും എന്‍ടിആറും ഒരുമിക്കുന്ന ദേവരയില്‍ ബോളിവുഡില്‍നിന്നും ജാന്‍വി കപൂറും സെയ്ഫ് അലിഖാനും പ്രധാന വേഷങ്ങളില്‍ എത്തുന്നു. ജാന്‍വി കപൂറിന്റെ തെലുങ്ക് അരങ്ങേറ്റ ചിത്രമാണിത്. പ്രകാശ് രാജ്, ശ്രീകാന്ത് മേക്ക, ഷൈന്‍ ടോം ചാക്കോ, നരേന്‍ തുടങ്ങി വന്‍ താരനിരതന്നെ ചിത്രത്തിന്റെ ഭാഗമാകുന്നുണ്ട്. യുവസുധ ആര്‍ട്ട്‌സും എന്‍ടിആര്‍ ആര്‍ട്ട്‌സും ചേര്‍ന്ന് നിര്‍മ്മിക്കുന്ന ചിത്രം നന്ദമൂരി കല്യാണ്‍ റാം ആണ് അവതരിപ്പിക്കുന്നത്.
ഛായാഗ്രഹണം രത്‌നവേലു ഐ.എസ്.സി. പ്രൊഡക്ഷന്‍ ഡിസൈനര്‍ സാബു സിറിള്‍, എഡിറ്റര്‍ ശ്രീകര്‍ പ്രസാദ്. ചിത്രത്തിന്റെ ഡിജിറ്റല്‍ വിതരണാവകാശം നെറ്റ്ഫ്‌ളിക്‌സ് സ്വന്തമാക്കിയിട്ടുണ്ട്.
Recent Comments