പ്രജേഷ് സെന്‍ സംവിധാനം ചെയ്യുന്ന ഹൗഡിനി എന്ന ചിത്രത്തില്‍ നായികയായി എത്തുന്നത് ദേവിയാണ്. മലയാളത്തിന്റെ ശാലീന സുന്ദരിയായിരുന്ന ജലജയുടെ മകളാണ് ദേവി. ദേവിക്കും അമ്മയെപ്പോലെ അഭിനേത്രിയാകണമെന്നായിരുന്നു ആഗ്രഹം.
വിവാഹത്തോടെ അഭിനയരംഗം വിട്ട ജലജ ഭര്‍ത്താവായ പ്രകാശുമൊത്ത് ബഹ്‌റിനില്‍ സെറ്റില്‍ ചെയ്തു. ദേവിയുടെ ജനനവും വിദ്യാഭ്യാസവുമൊക്കെ ബഹ്‌റിനില്‍ ആയിരുന്നു. പിന്നീട് ഹയര്‍ സ്റ്റഡീസ് യു.എസ്സിലും ചെയ്തു. ഗള്‍ഫ് ജീവിതം അവസാനിപ്പിച്ച് ജലജയും കുടുംബവും തിരുവനന്തപുരത്ത് സെറ്റില്‍ ചെയ്തതിനു ശേഷമാണ് മകള്‍ ദേവിയുടെ അഭിനയജീവിതത്തിലേക്കുള്ള വഴി തുറന്നത്.
‘ദേവിക്ക് അഭിനയം താല്‍പ്പര്യമാണങ്കില്‍ ആ വഴി തെരഞ്ഞെടുക്കട്ടെ; ‘ എന്നാണ് മകളുടെ കടന്നുവരവിനെക്കുറിച്ച് ജലജ പറഞ്ഞത്. മാലിക് എന്ന ചിത്രത്തില്‍ ശ്രദ്ധേയമായ ഒരു കഥാപാത്രത്തെ അവതരിപ്പിച്ചുകൊണ്ടാണ് ദേവി അഭിനയരംഗത്ത് ഹരിശീ കുറിച്ചത്. മാലിക്കില്‍ ജലജയും അഭിനയിച്ചിരുന്നു. മികച്ച നര്‍ത്തകി കൂടിയാണ് ദേവി. ചെറുപ്പം മുതല്‍ തന്നെ നൃത്തത്തില്‍ പരിശീലനം നേടിയിരുന്നു.
ഹൗഡിനി എന്ന ചിത്രത്തില്‍ ദേവി നായികയായതിനെക്കുറിച്ച് സംവിധായകന്‍ പ്രജേഷ് സെന്‍ പറഞ്ഞത് ഇങ്ങനെയായിരുന്നു.
‘കുറച്ചു നാളായി ദേവിയുടെ കാര്യം മനസ്സിലുണ്ടായിരുന്നു. ഹൗഡിനി തുടങ്ങാനുള്ള ഒരുക്കങ്ങള്‍ നടക്കുന്നതിനിടെ അസോസിയേറ്റ് ഡയറക്ടര്‍ ഗിരീഷ് മാരാര്‍ നായികയായി നിര്‍ദ്ദേശിച്ചതും ദേവിയുടെ പേരായിരുന്നു. അതിന് പിന്നാലെയാണ് ദേവിയെ നായികയായി കാസ്റ്റ് ചെയ്തതും. ദേവിക്ക് കഥാപാത്രത്തെക്കുറിച്ച് പറഞ്ഞു കൊടുക്കുകയും രണ്ടു സീനുകള്‍ ഭംഗിയായി അവതരിപ്പിക്കുകയും ചെയ്തു. അങ്ങനെ മീന എന്ന കഥാപാത്രം ദേവിയില്‍ ഭദ്രമായി.
മജീഷ്യനായ ആസിഫ് അലി അവതരിപ്പിക്കുന്ന നന്ദന് എന്ന കഥാപാത്രത്തിന്റെ ഭാര്യയാണ് മീന. നന്ദന്റെ ജീവിതത്തില്‍ എന്നും താങ്ങും തണലുമാകുന്ന കഥാപാത്രം. പല പ്രതിസന്ധികളേയും നന്ദന് തരണം ചെയ്യേണ്ടി വരുമ്പോഴൊക്കെ മീനയുടെ സാന്നിദ്ധ്യം ഏറെ നിര്‍ണ്ണായകമായിരുന്നു’
പി.ആര്‍.ഒ. വാഴൂര്‍ ജോസ്, ഫോട്ടോ ലിബിസണ്‍ ഗോപി.
Recent Comments