നവാഗതരായ വിജേഷ് പാണത്തൂര്‍, ഉണ്ണി വെള്ളാറ എന്നിവര്‍ ചേര്‍ന്ന് തിരക്കഥ എഴുതി സംവിധാനം ചെയ്യുന്ന ചിത്രമാണ് നദികളില്‍ സുന്ദരി യമുന. ചിത്രത്തിന്റെ മോഷന്‍ പോസ്റ്റര്‍ റിലീസ് ചെയ്തു.
‘കുഞ്ചാക്കോ സംവിധാനം ചെയ്ത അനാര്‍ക്കലി എന്ന ചിത്രത്തില്‍ വയലാര്‍ എഴുതി എം.എസ്. ബാബുരാജ് സംഗീതം പകര്‍ന്ന പ്രശസ്തമായ ഒരു ഗാനത്തിലെ ഈരടികളാണ് നദികളില്‍ സുന്ദരി യമുന. ഞങ്ങളുടെ ചിത്രത്തിലെ നായികയുടെ പേരും യമുനയെന്നാണ്. മോഷന്‍ പോസ്റ്ററില്‍ പുറംതിരിഞ്ഞ നില്‍ക്കുന്ന സുന്ദരിയാണ് ഞങ്ങളുടെ നായിക യമുന. അവരെ തല്‍ക്കാലം ഒളിമറയില്‍ നിര്‍ത്താനാണ് ആഗ്രഹിക്കുന്നത്. യമുനയെ നിങ്ങള്‍ക്ക് തീയേറ്ററുകളില്‍ കാണാം. ഏതായാലും യമുന നിങ്ങളെ നിരാശപ്പെടുത്തില്ല.’ സംവിധായകരില്‍ ഒരാളായ വിജേഷ് പാണത്തൂര്‍ കാന്‍ ചാനലിനോട് പറഞ്ഞു.
‘ഇതൊരു ഫെസ്റ്റിവല്‍ ചിത്രമാണ്. കണ്ണൂരിലെ നാട്ടിന്‍പുറങ്ങളാണ് ഈ ചിത്രത്തിന്റെ പശ്ചാത്തലം. അവിടെ ജീവിക്കുന്ന രണ്ട് ചെറുപ്പക്കാരാണ് കണ്ണനും വിദ്യാധരനും. അവരുടെ ജീവിതത്തിലുണ്ടാകുന്ന സംഭവമാണ് നര്‍മ്മത്തിലൂടെ പറയാന്‍ ശ്രമിക്കുന്നത്. കണ്ണനെ ധ്യാനും വിദ്യാധരനെ അജുവും അവതരിപ്പിക്കുന്നു.’ വിജേഷ് പറഞ്ഞു.
സുധീഷ്, നിര്‍മ്മല്‍ പാലാഴി, കലാഭവന്‍ ഷാജോണ്‍, നവാസ് വള്ളിക്കുന്ന്, അനീഷ്, പാര്‍വ്വണ, ആമി, ഉണ്ണിരാജ, ഭാനു പയ്യന്നൂര്‍, ദേവരാജ് കോഴിക്കോട്, രാജേഷ് അഴിക്കോടന്‍, സോഹന്‍ സിനുലാല്‍, ശരത് ലാല്‍, കിരണ്‍ രമേശ്, വിസ്മയ ശശികുമാര്‍ എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തില്‍ അഭിനയിക്കുന്നു. മനു മഞ്ജിത്തിന്റെയും ഹരിനാരായണന്റെയും വരികള്‍ക്ക് ഈണം പകര്‍ന്നിരിക്കുന്നത് അരുണ്‍ മുരളീധരനാണ്. പശ്ചാത്തലസംഗീതം ശങ്കര്‍ ശര്‍മ്മ. ഫൈസല്‍ അലി ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ രതിന്‍ രാധാകൃഷ്ണനാണ്. പ്രൊഡക്ഷന്‍ കണ്‍ട്രോളര്‍ സജീവ് ചന്തിരൂര്‍. പി.ആര്‍.ഒ വാഴൂര്‍ ജോസ്. ആതിര ദില്‍ജിത്ത്.
വാട്ടര്‍മാന്‍ മുരളി അവതരിപ്പിക്കുന്ന ഈ ചിത്രം സിനിമാറ്റിക് ഫിലിംസിന്റെ ബാനറില്‍ വിലാസ് കുമാര്‍, സിമി മുരളി എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. മെയില്‍ ചിത്രം തീയേറ്ററുകളില്‍ പ്രദര്‍ശനത്തിനെത്തും.
Recent Comments