ഒടുവില്‍ എല്ലാ അഭ്യൂഹങ്ങള്‍ക്കും വിരാമമായി. ബാലയുടെ വിവാഹം പ്രതീക്ഷിച്ചിരുന്നവര്‍ നിരാശരാകേണ്ട. അതിനേക്കാളും മധുരമുള്ള കാര്യമാണ് ബാല പങ്കുവച്ചിരിക്കുന്നത്.
റോയല്‍ അമേരിക്കന്‍ യൂണിവേഴ്‌സിറ്റി ബാലയെ ഹോണററി ഡോക്ടറേറ്റ് നല്‍കി ആദരിക്കുന്നു. പത്തൊമ്പതാം തീയതി കോട്ടയത്ത് വച്ചാണ് ബിരുദദാനച്ചടങ്ങ്.
കഴിഞ്ഞ ഡിസംബര്‍ 28 നാണ് ഔദ്യോഗിക അറിയിപ്പ് വന്നത്. അമേരിക്കയില്‍വച്ചായിരുന്നു ബിരുദദാനച്ചടങ്ങ് നടക്കേണ്ടിയിരുന്നത്. കോവിഡ് വ്യാപനത്തിന്റെ പശ്ചാത്തലത്തില്‍ ഔദ്യോഗിക രേഖകളടക്കം ബാലയ്ക്ക് നേരിട്ട് എത്തിച്ച് നല്‍കുകയായിരുന്നു.
ബാല ചെയ്തുവരുന്ന ജീവകാരുണ്യപ്രവര്‍ത്തനങ്ങളെ മുന്‍നിര്‍ത്തിയാണ് അമേരിക്കയിലെ ഡെലവാരെ ആസ്ഥാനമായി പ്രവര്‍ത്തിക്കുന്ന റോയല്‍ അമേരിക്കന്‍ യൂണിവേഴ്‌സിറ്റി ബാലയ്ക്ക് ഹോണററി ഡോക്ടറേറ്റ് നല്‍കുന്നത്. സൗത്ത് ഇന്ത്യയില്‍നിന്ന് ഈ അംഗീകാരം നേടുന്ന ആദ്യ സിനിമാതാരമാണ് ബാല. ഷാരൂഖ്ഖാനാണ് ഈ ബഹുമതി സ്വന്തമാക്കിയ ഇന്ത്യന്‍താരം.
ആക്ടര്‍ ബാല ചാരിറ്റബിള്‍ ട്രസ്റ്റ് എന്ന പേരില്‍ സംഘടന രൂപീകരിച്ച് നിരവധി ജീവകാരുണ്യ പ്രവര്‍ത്തനങ്ങളാണ് ബാല നേരിട്ട് നടത്തിവരുന്നത്. ഇതിനോടകം നാല് പേര്‍ക്ക് വീട് വച്ച് നല്‍കി. നിരവധി പേരുടെ ശസ്ത്രക്രിയാ ചെലവുകള്‍ പൂര്‍ണ്ണമായും ട്രസ്റ്റാണ് വഹിച്ചത്. കോവിഡ് കാലത്ത് നിരവധി വീടുകളില്‍ ഭക്ഷ്യവിഭവങ്ങള്‍ കൊടുക്കുന്നതിന് ബാല മുന്നിട്ട് ഇറങ്ങിയിരുന്നു. നിരവധിപ്പേര്‍ക്ക് ചികിത്സാസഹായങ്ങള്‍ നല്‍കിവരുന്നു.
Recent Comments