ലുലു മാളിനെ ആവേശക്കടലാക്കി മാറ്റി മലയാളത്തിന്റെ ദുല്‍ഖര്‍ സല്‍മാന്‍. തന്റെ ഏറ്റവും പുതിയ ചിത്രമായ ലക്കി ഭാസ്‌കറിന്റെ പ്രചരണാര്‍ത്ഥം കഴിഞ്ഞ ദിവസം വൈകുന്നേരം ആറ് മണിക്കാണ് ദുല്‍ഖര്‍ സല്‍മാന്‍ കൊച്ചിയിലെ ലുലു മാളില്‍ എത്തിയത്. ലക്കി ഭാസ്‌കറിന്റെ സംവിധായകനായ വെങ്കി അറ്റ്‌ലൂരി, ചിത്രത്തിലെ നായികയായ മീനാക്ഷി ചൗധരി എന്നിവരും ദുല്‍ഖറിനൊപ്പം ഉണ്ടായിരുന്നു. ആരാധകര്‍ക്കൊപ്പം സംവദിക്കുകയും ലക്കി ഭാസ്‌കറിനെ കുറിച്ച് സംസാരിക്കുകയും ചെയ്ത ദുല്‍ഖര്‍, തന്റെ പുതിയ മലയാള ചിത്രങ്ങളെ കുറിച്ചുള്ള വിവരങ്ങളും പ്രേക്ഷകരുമായി പങ്കു വെച്ചു.
ഇവര്‍ക്കൊപ്പം ഡിജെ ശേഖര്‍, ഡബ്‌സി, രശ്മി സതീഷ് എന്നിവരുടെ പെര്‍ഫോമന്‍സും ആ വേദിയില്‍ വെച്ചു നടന്നു. ഡബ്‌സിയുടെ ഗാനത്തിനൊപ്പം ദുല്‍ഖര്‍ ഉള്‍പ്പെടെയുള്ളവര്‍ നൃത്തം വെച്ചതും ആരാധകരെ ആവേശം കൊള്ളിച്ചു. ദുല്‍ഖര്‍ നായകനായ പുതിയ പാന്‍ ഇന്ത്യന്‍ തെലുങ്ക് ചിത്രമായ ലക്കി ഭാസ്‌കര്‍ ഒക്ടോബര്‍ 31 നു ആഗോള റിലീസായെത്തും. കേരളത്തിലും ഗള്‍ഫിലും ഈ ചിത്രം വമ്പന്‍ റിലീസായി വിതരണം ചെയ്യുന്നത് ദുല്‍ഖര്‍ സല്‍മാന്റെ വേഫെറര്‍ ഫിലിംസാണ്. തെലുങ്ക്, മലയാളം, തമിഴ്, ഹിന്ദി ഭാഷകളില്‍ റിലീസ് ചെയ്യുന്ന ഈ ചിത്രത്തിന്റെ മറ്റു പ്രമോഷന്‍ ഇവന്റുകള്‍ ഇനി ദുബായ്, ചെന്നൈ, ഹൈദരാബാദ് എന്നീ നഗരങ്ങളില്‍ വെച്ചും നടക്കും.
സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റര്‍ടൈന്‍മെന്റ്‌സും ഫോര്‍ച്യൂണ്‍ ഫോര്‍ സിനിമാസും ചേര്‍ന്ന് നിര്‍മ്മിച്ച ഈ ചിത്രം അവതരിപ്പിക്കുന്നത് ശ്രീകര സ്റ്റുഡിയോസ്. ഒരു പീരീഡ് ഡ്രാമ ത്രില്ലറായി ഒരുക്കിയ ഈ ചിത്രത്തിന്റെ ട്രെയിലര്‍ സമൂഹ മാധ്യമങ്ങളില്‍ വലിയ ഹിറ്റായി മാറിയിട്ടുണ്ട്. ഒരു സാധാരണക്കാരന്റെ ജീവിതത്തിലെ അസാധാരണമായ കഥ പറയുന്ന ചിത്രമാണ് ലക്കി ഭാസ്‌കര്‍.
Recent Comments